შრი-ლანკაში პირველად ჩატარდა სპეციალური კონგრესი, რომელსაც ადგილობრივ იეჰოვას მოწმეებთან ერთად 7 ქვეყნიდან ჩასული ათასობით მოწმე დაესწრო. კონგრესი სახელწოდებით „იყავით გაბედულები!“ დედაქალაქ კოლომბოში გაიმართა სუგათადასას ეროვნულ სპორტულ კომპლექსში 2018 წლის 6—8 ივლისს. დამსწრეთა უმაღლესი რიცხვი იყო 14 121. ეს შეხვედრა მრავალმხრივ იყო განსაკუთრებული; დასკვნითი მოხსენებები წარმოთქვა ხელმძღვანელი საბჭოს წევრმა; მონათლულთა რიცხვმა რეკორდულ მაჩვენებელს მიაღწია; ადგილობრივმა და-ძმებმა განსაკუთრებული სტუმართმოყვარეობა გამოავლინეს 3 500-ზე მეტი დელეგატის მიმართ.

სამზადისი ჯერ კიდევ 2017 წლის სექტემბერში დაიწყო, როდესაც კრებებში გაკეთდა განცხადება, რომ მათ ქვეყანაში მომავალ წელს სპეციალური კონგრესი გაიმართებოდა. გარდა იმისა, რომ ამ შეხვედრისთვის საჭირო იყო არაერთი ღონისძიების დაგეგმვა, სტადიონზე სარემონტო და დასუფთავების ისეთი სამუშაოები უნდა ჩატარებულიყო, როგორიცაა მაგალითად, შეღებვა, ნაგვის გატანა, სკამების შეკეთება და გზებზე ორმოების ამოვსება. კონგრესამდე სამი კვირით ადრე ასობით იეჰოვას მოწმე ჩავიდა ადგილობრივი და-ძმების დასახმარებლად. დაცვის ერთ-ერთმა თანამშრომელმა აღნიშნა, რომ იმ სამუშაოების შესრულებას, რაც მოწმეებმა ასეთ მოკლე დროში შეძლეს, ტექმომსახურების თანამშრომლები დაახლოებით ოთხ წელს მოანდომებდნენ.

სულიერი პროგრამის გარდა მოეწყო ექსკურსიები და ღონისძიებები, სადაც მასპინძლებმა სტუმრებს შრი­-ლანკის კულტურა გააცნეს. საღამოს გამართულ კონცერტზე ადგილობრივმა და-ძმებმა ტრადიციული ცეკვები და სიმღერები წარმოადგინეს. შთამბეჭდავი იყო პატარების მიერ შესრულებული სამეფო სიმღერები.

ეშლი ფერდინანდსმა, შრი-ლანკის ფილიალის წარმომადგენელმა, აღნიშნა: „ეს სპეციალური კონგრესი განსაკუთრებული საჩუქარი იყო ადგილობრივი და-ძმებისთვის; ჩვენთვის დიდი პატივი იყო ამდენი დელეგატის გამასპინძლება. ძალიან ვაფასებთ მოხალისეების თავდაუზოგავ შრომას. მათი ხელშეწყობით ყველაფერმა ასე კარგად ჩაიარა. და რაღა თქმა უნდა, მთელი დიდება ჩვენს ზეციერ მამას ეკუთვნის, რომლისგანაც მოდის „ყოველი კარგი ძღვენი“ (იაკობი 1:17).