Karai Kasang gaw yawng mayawng hpe mu lu nna, gara shara kaw mi raitim shi myit ra ai hku galaw lu ai. (Ga Shagawp 15:3; Hebre 4:13) Raitim, Karai Kasang gaw shara shagu hta nga ai ngu Chyum Laika hta n tsun da ai. Karai Kasang gaw wenyi hkum rai nna, shi shanu ai shara nga ai ngu gaw tsun da ai.

•   Karai Kasang a hkrang nsam: Karai Kasang gaw wenyi hkum re. (Yawhan 4:24) Shi hpe masha ni n mu lu ai. (Yawhan 1:18) Chyum Laika hta lawm ai shingran ni hta Karai Kasang hpe shara mi hta shanu nga ai ngu nna ayan tsun ai. Shara shagu hta nga ai ngu kalang mung n tsun da ai.​—Esaia 6:1, 2; Shingran 4:2, 3, 8.

•   Karai Kasang shanu ai shara: Karai Kasang gaw, myi hte n mu lu ai wenyi hkum ni nga ai shara hta shanu ai. Dai shara hta Karai Kasang ‘shanu ai shara’ nga ai. (1 Hkawhkam 8:30) Kalang mi hta wenyi hkum ni gaw, “Yehowa a man e sa shadan dan” ai ngu Chyum Laika hta tsun da ai majaw, Karai Kasang shanu ai laksan shara langai nga ai hpe chye lu ai.​—Yoba 1:6.

Karai Kasang gaw shara shagu hta n nga ai nga yang, langai hpra hpe lanu lahku ya lu na kun?

 Karai Kasang gaw langai hpra hpe lanu lahku ya lu ai. Wenyi hkum ni nga ai shara hta nga ai raitim, Karai ra sharawng ai lam galaw ai masha ni hpe shadi hkrup nna, shanhte akyu a matu galaw ya ai. (1 Hkawhkam 8:39; 2 Hkawhkam Labau 16:9) Yehowa gaw, myit madung hte shi hpe nawku ai ni hpe gara hku lanu lahku ai lam yu yu ga:

•   Akyu hpyi ai shaloi: Yehowa gaw, akyu hpyi ai shaloi madat ya ai.—2 Hkawhkam Labau 18:31.

•   Grai myitru myit tsang nga ai shaloi: “Dai Madu gaw myit daw myit hten ai ni hte ani sha nga nga ai; myit mada shara n nga mat sai ni hpe shi hkye hkrang la nga ai.”​—Shakawn 34:18, JCLB.

•   Lam matsun ni ra ai shaloi: Yeowa gaw Chyum Laika hku nna “sa ang ai lam” hpe madun ya ai.​—Shakawn 32:8, JCLB.

“Shara shagu hta nga taw ai” nga ai hte seng nna chye na shut ai lam ni

 Chye na shut ai lam: Shakawn Kungdawn 139:8 hta “Sumsing lamu de lung wa yang, dai yang e, nang nga nga ndai; Katsan ga e, ngai panep nep yang, dai hta e mung, nang nga nga ndai” ngu tsun da ai majaw, Karai Kasang gaw shara shagu hta nga ai ngu ai hpe madun ai.

 Tengman lam: Ndai Chyum daw gaw Karai Kasang shanu ai shara hte seng nna tsun taw ai n re. Masha ni hpe karum ya na matu, Karai a matu n mai byin ai shara n nga ai ngu ai hpe tsun mayu ai re.