Ngwi pyaw ai Karai Kasang, Yehowa kaw na kabu gara shiga gaw, kun dinghku ni hpe ngwi pyaw shangun mayu ai. Shi gaw dinghku hpe n nan de ya ai wa re. Tara shang hkungran na matu ahkyak ai. Dai hku galaw yang, ma ni a prat gaw, shim lum ai hte galu kaba wa na re. Hkristan ni gaw, hkungran ai hte seng ai tara upadi ni hpe hkan sa ra ai.—Luka 2:​1, 4, 5 hpe hti u.

Dinghku hpe Karai Kasang gara hku mu mada ai rai? Shi gaw dinghku hpe, prat tup ngang grin na matu ra sharawng ai. Madu wa hte madu jan gaw, langai hte langai sadi dung ra ai. (Hebre 13:​4) Jahka ai hpe shi n ra ai. (Malahki 2:​16) Raitim, shi gaw Hkristan ni hpe, shanhte a dinghku la, dinghku num mahtang num shaw, la shaw yang, jahka kau nna dinghku bai de na ahkang jaw ai.—Mahte 19:​3-6, 9 hpe hti u.

Dinghku hta madu wa hte madu jan, shada da ra kadawn ai lam hpe, madi shadaw ya na matu, Yehowa hpan da ai. (Ningpawt 2:​18) Dinghku hpe woi awn ai madu wa gaw, kun dinghku a lusha, bu hpun na matu madi shadaw ya ra nna, Karai Kasang a lam hpe mung, sharin achyin ya ra ai. Madu jan hpe mung n-gaw nwai tsawra myit hte tsawra ra ai. Madu wa hte madu jan shada da tsawra nna, hkungga lara ra ai. Madu wa hte madu jan, yawng gaw n hkum tsup ai ni re ai majaw, mara raw dat chye na matu sharin la yang she, dinghku hta ngwi pyaw lu na re.—Ehpesu 4:​31, 32; 5:​22-​25, 33; 1 Petru 3:7 ni hpe hti u.

Dinghku hta manghkang ni byin wa yang, madu jan hte madu wa shada da tsawra myit hte hparan ra ai. (1 Korinhtu 13:​4, 5) Dinghku hta byin chye ai, manghkang ni hpe hparan ai nga nna, hka nga ai hpe Chyum Laika hta n-gun n jaw ai.—1 Korinhtu 7:​10-​13 hpe hti u.

Yehowa gaw nanhte hpe ngwi pyaw shangun mayu ai. Ramma prat hpe ngwi pyaw hkra, gara hku galaw na hpe, kaja htum ai hku hpaji jaw da ai. Shi gaw, kanu kawa ni a nyan hpaji hte mahkrum madup kaw na, nang hpe akyu lu shangun mayu ai. (Kolose 3:​20) Hpan Da Madu Yehowa gaw, shi hte shi a Kasha ra sharawng ai hpe, galaw ai kaw na, ngwi pyaw ai lam lu la shangun mayu ai.—Hpaji Ningli 11:9–​12:1; Mahte 19:​13-​15; 21:​15, 16 ni hpe hti u.

Ma ni a, nga shara hte lusha bu hpun na matu, kanu kawa ni shakut nna galaw ra ai. (1 Timohti 5:​8) Raitim, ma ni ngwi pyaw ai prat hpe lu la na matu, Karai Kasang hpe tsawra nna, shi a lam hpe hkaja na matu, shanhte hpe sharin ya ra ai. (Ehpesu 6:​4) Na a kasi kaja hte, Karai Kasang hpe tsawra ai lam madun ai gaw, ma ni a myit masin hta prat tup matsing lu na re. Chyum Laika hpe madung tawn nna sharin ya yang, ma ni gaw kaja ai hku myit mang chye wa na re.—Tara Jahprang 6:​4-7; Ga Shagawp 22:6 ni hpe hti u.

Ma ni hpe sharin shaga ra ai. Shanhte hpe shakawn ya nna, n-gun mung jaw ra ai. Dai hku galaw yang, shanhte a prat ngwi pyaw wa na re. (Ga Shagawp 22:15) Raitim, sharin shaga ai shaloi, aja awa shing nrai zingri ai hku n mai galaw ai.—Kolose 3:21 hpe hti u.

Laksan hku nna, kanu kawa hte ma ni hpe karum ya lu ai, laika buk law law hpe, Yehowa Sakse Ni dip shapraw da ai. Dai laika buk ni yawng gaw, Chyum Laika hpe madung tawn nna ka da ai.—Shakawn Kungdawn 19:​7, 11 hpe hti u.