Sanit ning sha re ai ma hpe maumwi tsun dan nga ai kawa a lam hpe shingran yu u. Kawa gaw, “Moi shawng de, Karai Kasang gaw mungkan ga hte ndai mungkan ntsa nga ai yawng hpe hpan wa ai. Jan, shata hte shagan ni hpe mung hpan wa ai” ngu tsun ai shaloi, ma gaw chyahkring mi myit la nna, “Awa, rai jang Karai Kasang hpe kadai hpan da ai rai?” ngu nna bai san ai.

“Karai Kasang hpe kadai mung hpan da ai n re. Karai Kasang gaw galoi mung agrin nga ai Karai re” ngu kawa bai htai ai. Ndai zawn loi ai mahtai gaw, shi a ma hpe myit dik shangun ai. Raitim, dai ma asak kaba mat ai shaloi, dai ga san hpe bai myit hkrup ai. Karai Kasang hpe kadai n hpan ai ngu ai gaw, shi a matu chye na yak nga ai. Ninggawn tawa hpe pyi hpan ai wa nga ai. ‘Karai Kasang gaw gara hku byin wa ai kun?’ ngu shi myit ai.

Chyum Laika hta gara hku htai da ai kun? Chyum Laika a mahtai gaw ma hpe kawa bai htai ya ai mahtai hte bung ai daram re. Mawshe gaw ndai hku ka wa ai: “Madu e, . . . Bum ni hpe garai n shangai nna, Mungkan ga hte dinghta aga hpe garai n shaprat yang, Nang gaw chyi nma hpri nhpra kaw nna, Karai Wa, rai nga ndai.” (Shakawn 90:1, 2) Dai hte maren, myihtoi Esaia mung ndai hku tsun wa ai: “Nang n chye n ni? nang n na yu n ni? Nga yawng nga pra Hpan da Madu, n htum n wai Karai Kasang Yehowa gaw, n-gun yawm ai n rai.” (Esaia 40:28) Yuda laika hta mung Karai Kasang gaw “chyi nma pri npra aten kaw nna” a nga nga ai ngu tsun da ai.​—Yuda 25.

Dai chyum daw ni hta tsun da ai hte maren Karai Kasang gaw “htani htana re ai . . . Hkawhkam” ngu, kasa Pawlu mung tsun wa ai. (1 Timohti 1:17) Lachyum gaw, anhte myit yu mai ai moi prat na lai wa sai aten ngu garai n nga shi yang kaw nna, Karai Kasang gaw nga nga sai. Hpang de mung htani htana galoi mung nga mat na ngu ai lachyum re. (Shingran 1:8) Dai majaw, Karai Kasang htani htana agrin nga ai ngu ai lam gaw, Karai hte seng ai madung lam langai re.

Dai lam hpe atsawm chyena na matu hpa majaw yak ai kun? Masha a asak aprat gaw kadun ai majaw, aten hte seng nna masha ni a ningmu hte Karai a ningmu gaw shai ai. Htani htana Karai Kasang a matu lani mi gaw, shaning hkying mi hte bung ai. (2 Petru 3:8) Dai hpe chyena na matu dinggam yaw a lam hpe myit yu u. Shanhte gaw nhtoi 50 sha asak hkrung ai majaw, masha ni a asak 70, 80 a lam hpe chye na lu na kun? Chyena na n re. Grau Htum Ai Hpan Madu hte shingdaw dat jang, masha ni gaw dinggam yaw hte bung ai ngu, Chyum Laika hta tsun da ai. Karai Kasang a nyan hpaji hte shingdaw yu jang, anhte a myit sawn lu ai nyan gaw hpa n rai mat sai. (Esaia 40:22; 55:8, 9) Dai majaw, masha ni hku nna Yehowa Karai Kasang hte seng ai ahkri ahkrai lam yawng hpe, atsawm chyena lu na n re ai gaw mauhpa n re.

Karai Kasang gaw htani htana agrin nga ai ngu ai hpe chyena na matu yak tim, Karai a hpan da ai lam ni hpe hkaja yu ai rai jang, chye na lu na lam hpe tam mu na re. Langai ngai gaw, Karai Kasang hpe hpan da ai rai jang, dai wa gaw Hpan Madu byin mat na re. Raitim, Karai Kasang gaw “nga yawng nga pra hte hpe nang hpan tawn da” ai ngu Chyum Laika hta tsun da ai. (Shingran 4:11) Dai hta n-ga, ninggawn tawa gaw moi shawng de n nga yu ga wa ai hpe anhte chye da ai. (Ningpawt 1:​1, 2) Ninggawn tawa gara hku byin wa ai kun? Karai Kasang hpan da ai majaw re. De a shawng hta Karai Kasang gaw Kasha Shingtai Yesu hte kaga lamu kasa ni hpe hpan wa ai. (Yoba 38:4, 7; Kolose 1:15) Asan sha chye lu ai gaw, kaga hpa n nga shi ai aten kaw nna Karai Kasang nga nga sai. Hpan Ai bungli hpe Karai Kasang n galaw hpang shi ai aten hta, kadai n nga ai majaw kadai mung Karai Kasang hpe hpan lu na n re.

Anhte nga nga ai hte ninggawn tawa nga nga ai lam ni gaw, htani htana Karai Kasang nga ai lam a sakse nan re. Ninggawn tawa hpe galaw da ai, dai hpe hkang da ai tara ni hpe shabyin ya ai Karai gaw, galoi mung agrin nga ai. Shi a majaw mung anhte yawng asak hkrung nga ai re.​—Yoba 33:4.