“Nĩndataa kũsoma Mbivilia, ĩndĩ ngilasya noona ũndũ ĩnenevete ngewʼa ndesa kũmĩmina!”—Briana, ula wi na myaka 15.

 We nĩwĩwʼaa ũu mavinda amwe? Ũvoo ũũ nũũkũtetheesya!

•  Nĩkĩ naĩle kũsoma Mbivilia?

•  Naĩle kũsoma Mbivilia ata?

•  Kĩla andũ angĩ ma mũika maasya

 We nĩwĩwʼaa kũsoma Mbivilia ta kĩvalũa kĩ vinya? Ti ũndũ wĩ vinya kwĩwʼa ũu. Na kĩtumi nũndũ Mbivilia nĩ ĩvuku ĩnene yĩ mathangũ ngili mbingĩ me mũandĩko mũnini, na o na yĩi mavisa ta televiseni kana vitio!

 Ĩndĩ kwasũanĩa ũndũ ũũ: Ũkethĩa ĩsandũkũ ĩnene ya tene yĩvingĩwe syĩndũ sya lato mũnene vandũ, we tyo wende kũyĩvingũa ũmanye nĩ kyaũ kĩ vo?

 Mbivilia no ta ĩsandũkũ yĩu ĩnene yĩ syĩndũ sya lato. Na kĩtumi nũndũ yĩthĩawa na ũĩ mwingĩ ũtonya kũelekanwʼa na tũvila twa thooa mũnene. Ũĩ ũsu no ũũtetheesye

•   Kwĩka motwi maseo

•   Kwĩkalanyʼa nesa na asyai maku

•   Kũkwata anyanya ala aseo vyũ

•   Kũmĩanĩsya na mawĩmakĩo

 Vatonyeka ata ĩvuku ya tene ũu yĩkethĩwa yĩtonya kũtũtethya mũno wĩana ũu ũmũnthĩ? Kĩtumi nũndũ “maandĩko onthe nĩmaveveeiwe nĩ Ngai.” (2 Timotheo 3:16) Kĩu kĩonanyʼa kana ũtao ũla wĩ Mbivilianĩ wĩthĩawa wumĩte kwa mũtai ũla mũseo vyũ.

 Nzĩa ĩmwe nĩ kũvanga ũmĩsome yonthe. Kwĩka ũu no kũũtetheesye kũelewa ũvoo wʼonthe ũla wĩ Mbivilianĩ na ũndũ ũvangĩtwe. No ũsome Mbivilia yonthe kwa nzĩa syĩ kĩvathũkanyʼo. Kwasũanĩa nzĩa ii ilĩ:

•    No ũtwʼe kũsoma mavuku onthe o ũndũ mavangĩtwe, kuma Mwambĩlĩlyo nginya Ũvuanyʼo.

•    No ũtwʼe kũmĩsoma kwosana na ũndũ maũndũ ala mawetetwe maatĩanĩe, kana kwosana na ĩvinda yĩla meekĩkie.

 Kaũndũ ũtonya kwĩka: Nthĩnĩ wa Mbivilia Tafsiri ya Ulimwengu Mpya, soma ũvoo ũla wĩ nthĩnĩ wa Nyongeza kĩlungunĩ kya A7, kĩla kyonanĩtye maũndũ manene ala meekĩkie Yesũ e vaa ĩũlũ wa nthĩ kwosana na ũndũ maatĩanĩe.

 Nzĩa ya kelĩ nĩ kũvanga ũsome ngewa yĩ Mbivilianĩ ĩneneete ũndũ mũna ũendeee kũũthĩnyʼa. Kwa ngelekanyʼo:

•   We no wende kũkwata anyanya matonya kũĩkĩĩka? Soma ngewa ya Yonathani na Ndaviti. (1 Samueli kĩlungu kya 18-20) Wamina kũsoma, mantha nĩ nguma syĩva Ndaviti waĩ nasyo syatumie Yonathani enda kũtwʼĩka mũnyanyae.

•   Nĩwĩthĩwa ũyenda kwĩkĩwa vinya ũsinde ĩtatwa ĩna? Soma ngewa ya Yosevu wone ũndũ wasindie ĩtatwa yĩla wakomanie nayo. (Mwambĩlĩlyo, kĩlungu kya 39) Wamina kũsoma, mantha nĩ kyaũ kyatetheeisye Yosevu asinda ĩtatwa yĩla wakomanie nayo.

•   No wende kwĩmanyĩsya ũndũ mboya ĩtonya kũũtetheesya? Soma ngewa ya Neemia. (Neemia, kĩlungu kya 2) Wamina kũsoma, mantha maũndũ mekwonanyʼa kana mboya nĩyatethisye Neemia.

 Kaũndũ ũtonya kwĩka: Yĩla ũũsoma Mbivilia ĩkĩĩthasya kana wĩ vandũ vate kelele nĩ kana kĩlĩko kyaku kĩikelelũke.

 Nzĩa ya katatũ nĩ kũvanga kũsoma ngewa kana savuli ĩmwe yĩ Mbivilianĩ na ĩndĩ ũivindĩĩsya ũndũ ĩtonya kũũtetheesya. Wamina kũsoma ĩkũlye makũlyo ta aa:

•    Nĩkĩ Yeova weekĩie ũvoo ũũ Mbivilianĩ?

•    Ngewa ĩno yĩvuanyʼa kyaũ ĩũlũ wa Yeova na nzĩa yake ya kwĩka maũndũ?

•    Ndonya kũtũmĩa ata ũvoo ũũ thayũnĩ wakwa?

 Kaũndũ ũtonya kwĩka: Vanga na ũiandĩka vandũ matukũ ala ũkwenda kwambĩĩa kũsoma Mbivilia.