Ĩĩ. Mbivilia yĩ na myolooto ĩna ĩtonya ũtũtetheesya ĩla twĩ na mathĩna kana makoani:

1.   Vanga nesa ũndũ ũũtũmĩa mbesa syaku. “Mosũanĩo ma ala athingu maelete wingĩnĩ wa syĩndũ; ĩndĩ kĩla mũndũ ũla wĩkalaataa ekalaataa kũvika akaĩwe tũ.” (Nthimo 21:5) Ndũkasembee kũthooa kĩndũ atĩ nũndũ thooa wakyo wĩ nthĩ kana nĩ mũoleku. Andĩka syĩndũ ila ũkwenda kũthooa na mbesa ila ũtonya kũtũmĩa, na ũilũmanyʼa na ũu.

2.   Taanĩsya na makoani mate ma lasima. “Ũla ũkovaa nĩ mũthũkũmi wa ũla ũkovethasya.” (Nthimo 22:7) Ethĩwa wĩ na makoani na nũkũemwa nĩ kũĩva ũndũ mweewʼanie, neena na ũla wakũkovethisye ĩũlũ wa ũndũ ũvangĩte kũmũĩvaa. Mũthingʼĩĩsye etĩkĩle mũvango ũsu waku. Atĩĩa ũtao wa Mbivilia ũla wanengiwe ũla mũndũ waĩkĩĩthisye ĩkoani ya mũtũi wake: “Enda, wĩnyivĩtye, noimwĩsũva mũtũi waku; ndũkaeke metho maku makome.” (Nthimo 6:1-5) Ethĩwa ĩvinda ya mbee mũinewʼana, ndũkatule, syoka ĩngĩ na ĩngĩ.

3.   Ĩthĩwa na woni waĩle ĩũlũ wa mbesa. “Mũndũ ũte mũlau endaa kũthua mĩtũkĩ, na ndesĩ kana eteelwe nĩ ũkya.” (Nthimo 28:22, The Holy Bible in Current Kikamba Language) Kĩwĩu na ĩtomo nĩtonya kũtuma tũthelelwa na twaĩwa nĩ ĩvinda ya kwĩka maũndũ ma kĩ-veva.

4.   Ĩanĩwa nĩ syĩndũ ila sya vata. “Tweethĩwa na kya ũya na kya kwĩvwʼĩka, syĩndũ isu ikatwĩanĩa.” (1 Timotheo 6:8) Mbesa iituma wĩthĩwa wĩ mũtanu kana wĩ mwĩanĩe. Andũ ala atanu vyũ ĩũlũ wa nthĩ ti ala methĩawa na mbesa mbingĩ. Ũtanu woo wumanaa na kwĩthĩwa na mũsyĩ wendanĩte, anyanya, na kwĩthĩwa me anyanya ma Ngai.​—Nthimo 15:17; 1 Vetelo 5:6, 7.