Mĩvothi ya ngenda ĩla yumawʼa nĩ Ngũsĩ sya Yeova nĩyo ĩtethasya vanene kũendeesya wĩa witũ wa nthĩ yonthe. a Kũla tũmbanĩaa kwĩthĩawa kwĩ na tũsandũkũ twa kumya mĩvothi. Nzĩa ingĩ sya kumya mĩvothi nĩsyonanĩtwʼe kĩsesenĩ kitũ, vala vaeleetye ĩũlũ wa mĩvothi (Donations). Kĩsesenĩ kĩu nĩvonanĩtwʼe nzĩa syĩ kĩvathũkanyʼo sya kumya mĩvothi nĩ kana wĩthĩe mũndũ no aumye mĩvothi kwondũ wa kũendeesya wĩa witũ wa nthĩ yonthe, wĩa wa kĩsionĩ kĩla ũĩ, kana o maũndũ asu elĩ

 Ngũsĩ sya Yeova iikũlawʼa syumye kĩlungu kya ĩkũmi. O na vayĩkĩawa mwĩao mũndũ aumye mbesa siana ũna. (2 Akolintho 9:7) Vaiĩ mbesa ikolanawʼa maũmbanonĩ maitũ na vaiĩ mbesa mũndũ wendekaa aumye nĩ kana oke maũmbanonĩ. Ala mekwenda kũvatiswa kana ala mekwenda kũthikĩwa mũndũ woo maikũlawʼa maumye mbesa. O na ala meũtwaana, kana mekwĩka maũndũ angĩ makonetye ũthaithi mayĩtawʼa mbesa. Ithyĩ tũivangĩthasya tũmaũndũ twa kũsangĩthya mbesa ta syathĩ sya kumya mbesa, mathaũ, kũthoosya syĩndũ sya mbaa ngetha, na maũndũ angĩ ta asu. O na tũyĩsaa kũthi kũũ na kũũ tũivoya. Ũla waumya mũvothi ndatangaasawa kana akatavanwʼa kwa nzĩa ingĩ. (Mathayo 6:2-4) Ũkasisya isesenĩ sitũ kana mavukunĩ maitũ, ndwona matangaso ma viasala mekĩĩtwʼe vo nĩ kana matũetee mbesa.

 Maũmbanonĩ kĩla mwei, ikundi sya Ngũsĩ sya Yeova nisomaa livoti ĩkwonanyʼa ũndũ mbesa syumĩtwʼe na ũndũ itũmĩkĩte, na kĩla mũndũ ethĩawa athoketwʼe maũmbanonĩ asu. Lekoti sya mbesa ila siawa vailinĩ nisiawʼa nĩ kana vaĩkĩĩthwʼe kana mbesa nitũmĩkĩte ũndũ vaĩle.—2 Akolintho 8:20, 21

•   Masandũkũ ma kwĩkĩa mĩvothi: No wĩkĩe mbesa kana check masandũkũnĩ ma kumya mĩvothi ala methĩawa Nyũmbanĩ sya Ũsumbĩ, Nyũmba sya Maũmbano Manene, kana o kũndũ kũngĩ kũla kwĩkĩawa maũmbano ma ũthaithi.

•   Kumya mĩvothi Indanetinĩ: Nthĩnĩ wa nthĩ mbingĩ, no umye mĩvothi kĩsesenĩ kitũ vala vonanĩtwʼe “Donate to Jehovah’s Witnesses” ũtũmĩĩte syĩndũ ta credit card, na debit card. O na no umye mũvothi wa mbesa syĩ vengi yaku ũkaitũma vengi ĩngĩ, kana o ũkatũmĩa nzĩa ingĩ syonanĩtwʼe vo sya kũtũma mbesa. b Ngũsĩ imwe syĩkaa “kwia kĩndũ ũtee” kwa kũvatha mbesa siana ũna itũmawe kĩla mwei matũmĩĩte ĩmwe ya nzĩa isu.—1 Akolintho 16:2

•   Kũvanga tene ũndũ ũkumya mĩvothi: Nzĩa imwe sya kumya mĩvothi syendaa mũndũ eke mĩvango kwĩ tene, kana akũlye ũtao kwa ala mesene na mĩao. Mĩvango ta ĩsu no ĩũtetheesye maũndũnĩ makonetye koti ũla ũtalĩlwe kũĩva nthĩ yenyu. Andũ aingĩ nĩmatethekete kwa kwĩka ũkunĩkĩli mamanye nesa ũndũ mũndũ ũtonya kũnengane mũthĩnzĩo yĩla wĩ thayũ kana kũvangĩthya mũthĩnzĩo wĩnenganwe amina kũkwʼa. Nũseo ũkaneena na ovisi wa ũvonge wa kwenyu nĩ kana ũkwate ũvoo mwingangĩ ethĩwa nũkwenda kumya mĩvothi ĩkonetye maũndũ aa:

  •   mbesa syĩ akaondinĩ

  •   inisualenzi (insurance) na mĩvango ya litaya

  •   stocks na bonds

  •   Wĩlũ (wills and trusts)

 Nĩ kana ũkwate ũvoo mwingangĩ ĩũlũ wa nzĩa sya kumya mĩvothi kĩsionĩ kyenyu sisya kĩsesenĩ kitũ vala ve “Donate to Jehovah’s Witnesses.”