WOO ŨLA MŨNDŨ WĨW’AA YĨLA WAKW’ĨĨWA NĨ MWENDWA WAKE, WĨTHĨĨTWE ŨYĨKĨWA ŨKUNĨKĨLI MŨNO MYAKANĨ YA MĨTŨKĨ. Ĩndĩ o tondũ vaelew’a ilungunĩ mbĩtu, ũtao ũla mũseo vyũ atai matonya kũnenga mũndũ, mavinda maingĩ wĩthĩawa wosanĩte na ũĩ ũla wĩ Mbivilianĩ. Na ũndũ ũsu nĩ ũĩkĩĩthĩtye kana Mbivilia ĩtũnengae ũtao ũtakavĩtwa nĩ ĩvinda. Ĩndĩ o na ũu wĩ o vo, Mbivilia no ĩtũtethye kwa nzĩa ingĩ mbingĩ, eka o kũtũnenga ũtao wa kwĩkwatw’a. Yĩ na ũvoo ũte vandũ vangĩ, ũla ũtonya kũkiakisya mũno ala makw’ĩĩwe.

• Ũĩkĩĩthyo wa kana endwa maitũ ala makwie maikũthĩna

  Ĩandĩko ya Mũtavan’ya 9:5 yaĩtye atĩĩ: “Ala akw’ũ matyĩsĩ ũndũ o na wĩva.” O na ĩngĩ Mbivilia yaĩtye kana ũla wakw’a “mosũanĩo make nĩmaaa.” (Savuli 146:4) O na eka ũu, ĩelekanĩtye kĩkw’ũ na too mũito.—Yoana 11:11.

• Kũĩkĩĩa vyũ kana Ngai e wendo nĩkũetae ũkiakisyo

  Ĩvukunĩ ya Savuli 34:15, Mbivilia yaĩtye atĩĩ: “Metho ma Yeova * melekele alũngalu, na matũ make nũteete ew’e kĩĩo kyoo.” Kũelesya Ngai ũndũ tũkwĩw’a mboyanĩ, nĩ ũndũ ũtonya kũtũkiakisya mũno, kwĩ ũndũ tũtonya kwĩw’a twakiakiw’a yĩla twaneena na mũndũ ũngĩ. Mboya nĩtũtetheeasya kwĩthĩwa na ngwatanĩo na Mũmbi witũ, nake nũtũmĩaa vinya wake kũtũkiakisya.

• Wĩkwatyo mũseo wa ĩvinda yũkĩte

  Sũanĩa ĩũlũ wa ĩvinda yũkĩte, yĩla ala me mbũanĩ makathayũũkw’a na mayĩkala vaa ĩũlũ wa nthĩ! Mbivilia nĩyĩeleetye mũno ĩũlũ wa ĩvinda yĩu. Nĩeleetye ũndũ nthĩ ĩkethĩwa yĩilye. Yaĩtye kana Ngai “akavangũla methoi onthe methonĩ moo, na kĩkw’ũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.”—Ũvuany’o 21:3, 4.

Andũ aingĩ ala mamũĩkĩĩaa Yeova, Ngai ũla ũwetetwe Mbivilianĩ, nĩmakwataa vinya mwingĩ wa kũmĩanĩsya na kyeva meemanyĩsya ĩũlũ wa wĩkwatyo wa kwĩsa kwona endwa moo ĩngĩ. Kwa ngelekany’o, Ann, ũla wakw’ĩĩwe nĩ mũũme mekalanĩtye myaka 65, aĩtye atĩĩ: “Mbivilia nĩndĩkĩĩthĩtye kana endwa maitũ ala makwie maiendeee kũthĩna na kana Ngai akathayũũkya onthe ala me kĩlilikanonĩ kyake. Nĩnĩlilikanaa ũndũ ũsu kĩla ĩvinda nasũanĩa ĩũlũ wa wasyo ũla ngwatĩte, na nũndũ wa ũu, nĩnĩthĩĩtwe ndonya kũmĩĩsya ũndũ ũla mũthũku vyũ waangwata thayũnĩ!”

Nake Tiina ũla ũwetiwe kĩlungunĩ kĩvĩtu, aĩtye: “Kuma yĩla Timo wakwie, nĩnonete Ngai aindw’ĩĩka. Nĩnonete aindetheesya mũno ĩvindanĩ yĩĩ ya thĩna. Nĩnĩĩkĩĩte vyũ watho ũla wĩ Mbivilianĩ wa ũthayũũkyo. Nũnengae vinya wa kũsonga na mbee nginya mũthenya ũla nĩona Timo ĩngĩ.”

Ndeto isu nĩsieleetye woni wa andũ milioni mbingĩ ala matethĩawa na nzika kana Mbivilia nĩyakũĩkĩĩka. O na ethĩwa wĩona maũndũ ala Mbivilia ĩwetete ta mate ma w’o, kana ta ndoto, nĩ ũndũ wa vata ũkeyĩkĩa ũkunĩkĩli wĩyĩĩkĩĩthye ethĩwa ũtao na mawatho mayo nĩ ma w’o. Weeka ũu, nũtonya kwĩthĩa kana Mbivilia nĩyo yĩ na ũtao ũla mũseo vyũ kwa ala me na kyeva.

Ĩloele vitio ikonanĩtye na ũndũ ũsu nthĩnĩ wa jw.org/kam

KWĨTHĨAWA ATA YĨLA MŨNDŨ WAKW’A?

WE NO WENDE KWĨW’A ŨVOO MŨSEO?