ĨVINDANĨ ya tene, mũũngamĩi wa nyũmba asũvĩaa mũsyĩ na syĩndũ sya mũndũ ũngĩ. Ndeto ya Kĩevelania na ya Kĩkiliki ĩla ĩalyũlĩtwe “mũũngamĩi wa nyũmba,” mavinda angĩ no yonany’e mũsyaĩĩsya kana mũnene wa nyũmba.

Yĩla Yosevu, mwana wa Yakovo, waĩ ngombo Misili, nĩwatw’ĩkie mũũngamĩi wa nyũmba ya vwana wake, ũla waĩ Mũmisili. Na eka ũu, vwana wake nĩwoosie “kyonthe kĩla waĩ nakyo aia kw’okonĩ kwa Yosevu.” (Mwa. 39: 2-6) Ĩtina, yĩla Yosevu watw’ĩkĩthiw’e mũnene wĩ vinya wa nthĩ ya Misili, nĩwanyuvie mũũngamĩi wa nyũmba asũvĩe mũsyĩ wake.—Mwa. 44:4.

Ĩvindanĩ ya Yesũ, mavinda maingĩ ene mĩũnda mekalaa ndũanĩ syĩ vaasa na mĩũnda yoo. Na kwoou nĩmaandĩkaa aũngamĩi ma nyũmba masyaĩĩsye maũndũ ala mekwĩkwa kĩla mũthenya nĩ athũkũmi ala me mĩũndanĩ ĩsu.

Nĩ kana mũndũ atw’ĩke mũũngamĩi wa nyũmba, aaĩle kwĩthĩwa ailye ata? Ĩvindanĩ ya atũmwa, ve mũandĩki Mũlomi weetawa Columella waisye kana ngombo ĩla ĩkũnyuvwa ĩtw’ĩke mũsyaĩĩsya kana mũũngamĩi wa nyũmba yaaĩle kwĩthĩwa “yĩmanyĩĩtye wĩa ũsu nesa.” Aaĩle kwĩthĩwa e mũndũ “wĩsĩ nũtonya kũĩkĩĩthya athũkũmi nĩmathũkũma wĩa nesa, ĩndĩ ate kũmavinyĩĩa.” Ongelile kwasya: “Ve ũndũ ũngĩ wa vata mũno wendekaa. Ndaaĩlĩte kwona ta wĩsĩ mũno, na aaĩlĩte kwĩthĩwa eyũmbanĩtye kwĩmanyĩsya maũndũ meũ.”

Ndeto ya Ngai ĩtũmĩaa ngelekany’o ya mũũngamĩi wa nyũmba na wĩa ũla watethasya kwonany’a maũndũ amwe maendeeaa kĩkundinĩ kya Kĩklĩsto. Kwa ngelekany’o, mũtũmwa Vetelo eekĩie vinya Aklĩsto matũmĩe ũtonyi ũla Ngai wamanengete “kũtetheanĩsya ta aũngamĩi aseo ma ũseo mwingĩ wa Ngai.”—1 Vet. 4:10.

O nake Yesũ nĩwatũmĩie ngelekany’o ya mũũngamĩi wa nyũmba ĩandĩkonĩ ya Luka 16: 1-8. O na ĩngĩ, ayathana ĩũlũ wa ĩvinda ya kwĩthĩwa vo kwake ta Mũsumbĩ, nĩwaĩkĩĩthisye aatĩĩi make kana akanyuva “ngombo ndĩkĩĩku na mbũĩ,” kana “mũũngamĩi wa nyũmba mũĩkĩĩku.” Kĩanda kĩla kĩnene vyũ kya mũũngamĩi ũsu wa nyũmba kyesaa kwĩthĩwa kĩ kũnenga aatĩĩi ma Klĩsto lĩu wa kĩ-veva ũla me na vata naw’o ĩvindanĩ ya mũminũkĩlyo. (Mt. 24:45-47; Luka 12:42) Nĩtũtũngaa mũvea mũno nũndũ wa kwĩthĩwa tũtonya kũkwata mavuku ma kwĩkĩa vinya ala mũũngamĩi ũsu wa nyũmba mũĩkĩĩku ũseũvasya na ayĩĩkĩĩthya nĩmavikĩa andũ kĩla vandũ ĩũlũ wa nthĩ.