Mũsyĩ ũla wĩthĩawa na asyai mendanĩte na manenganĩte ndaĩa wĩthĩawa ne vandũ vaseo va kũeea syana. (Akolosai 3:14, 19) Asyai aseo nĩmethĩawa mendete syana syoo na nĩmaikathaa o tondũ Yeova wakathie Mwana wake.—Soma Mathayo 3:17.

Ĩthe witũ wa ĩtunĩ nĩwĩthukĩĩasya athũkũmi make na nũthĩnĩkĩaa ũndũ mekwĩwʼa. Kwoou, wĩthĩwa wĩ ũndũ mũseo asyai makemanyĩsya kuma kwake na mayĩthukĩĩasya ũndũ syana syoo syĩkũmatavya. (Yakovo 1:19) Nĩmaĩle kwendeeawʼa nĩ kũmanya ũndũ syana syoo syĩkwĩwʼa, o na ĩla syĩ na mawoni mataĩle.—Soma Motalo 11:11, 15.

Wĩ mũsyai, wĩthĩawa wĩ na ũkũmũ wa kumya mĩao. (Aeveso 6:1) Ĩmanyĩsye kumana na ngelekanyʼo ya Ngai. Onanasya kana nĩwendete syana syake kwa kũelesya mĩao yake nesa, na kwa kwonanyʼa ũthũku wa kũlea kũmĩatĩĩa. (Mwambĩlĩlyo 3:3) Vandũ va kũlasimĩthya andũ methĩwe me ewʼi, amamanyĩasya ũndũ matonya kũtetheka meeka maũndũ ala maĩlĩte.—Soma Isaia 48:18, 19.

Eka kĩeleelo kyaku kĩthĩwe ne kũtetheesya syana syaku imwende Ngai. Weeka ũu, syana syaku ikeekaa motwi maseo o na ĩla ũte vakuvĩ nasyo. O tondũ Ngai ũmanyĩasya kwa kwĩthĩwa e ngelekanyʼo nzeo, manyĩasya syana syaku kũmwenda Ngai kwa ngelekanyʼo yaku nzeo.—Soma Kũtũngĩlĩlwa Kwa Mĩao 6:5-7; Aeveso 4:32; 5:1.