Niyuu Yɔrɩkɩ tɛtʋ taa ɛgbɛyɛ nɖɩ payaɣ se Autorité de recherche et de développement énergétiques (NYSERDA) yɔ, ɖɩwɛnɩ ɖʋtʋ natʋyʋ nɛ tiseɣtiɣ ɛyaa se pamaɣ kuduyuŋ kɩbaŋ, nɛ payaɣ ɖʋtʋ ndʋ se «Buildings of Excellence Competition» (concours Bâtiments d’excellence.) Ɛgbɛyɛ nɖɩ ɖɩwɩlɩ ɖɩ-ɛsɩmɩyɛ Yehowa Aseɣɖe Tɩnaa nɛ ɖɩha-wɛ liidiye sɔsɔɖɛ naɖɩyɛ (un million de dollars américains.) Palabɩ-wɛ kʋjɔʋ ŋgʋ mbʋ pʋyɔɔ yɔ kuduyuŋ weyi pakaɣ maʋ yɔ ɩɩkaɣ wɛnʋʋ ɖoŋ kɩdɛkɛdɩŋ tɩŋ nɛ kpɩna wena awɛ lone nɖɩ ɖɩ-taa pakaɣ maʋ kuduyuŋ ɛnɩ yɔ a-yɔɔ. a Kajalaɣ ɖeɖe lɛ pahaʋ kʋjɔʋ ŋgʋ kuduyuŋ maʋ ɖʋtʋ natʋyʋ Ramapo tɛtʋ taa yaa Rockland egeetiye taa yɔ.

Keith Cady wɛ Kuduyuŋ maʋ ɖʋtʋ kɔɔmitee taa, ɛyɔɔdaa se: «Alɩwaatʋ ndʋ ɖɩlakaɣ Ramapo kuduyuŋ maʋ ɖʋtʋ yɔ, ɖa-kaɖʋwa kaakɛnaa se ɖɩma kuduyuŋ weyi ɩɩkɩlɩɣ labɩnʋʋ tʋmɩyɛ laatriki miŋ yaa ɩɩkɩlɩɣ pisuu helim yaa tɛtʋ yɔ. Ða-taa labɩ leleŋ kpem se tɛtʋ taa ñʋndɩnaa na ɖa-pana ñaɣʋ nɛ pawɩlɩ-ɖʋ pɛ-ɛsɩmɩyɛ halɩ pʋcɔ nɛ ɖɩpaɣzʋʋ kuduyuŋ ɛnɩ maʋ. Ðɩkaɣ kpaɣʋ liidiye nɖɩ nɛ ɖɩsɔzɩ sɔɔlɩm haɖɛ nɛ Yehowa Aseɣɖe Tɩnaa lakɩ yɔ ɖɩ-yɔɔ nɛ ɖɩlabɩnɩ-ɖɩ tʋmɩyɛ camɩyɛ.»

Kuduyuŋ maʋ ɖʋtʋ ndʋ payaɣ se «Buildings of Excellence Competition» (concours Bâtiments d’excellence) yɔ, ti-ɖeke tɩwɛnɩ Etaazuunii ɛjaɖɛ taa nɛ tiseɣtiɣ ɛyaa kuduyuŋ kɩbaŋ maʋ hɔɔlʋʋ taa. Mars 2019 papaɣzɩ ɖʋtʋ ndʋ, nɛ pɩtalɩɣnɩ sɔnɔ yɔ kʋjɔŋ weyi palaba yɔ ɩkpɛndɩ 63. NYSERDA ɛgbɛyɛ (L’Autorité de recherche et de développement énergétiques) tɛ intɛrnɛɛtɩ lone wɩlɩɣ se kʋjɔŋ weyi palakɩ yɔ iseɣtiɣ kuduyuŋ mayaa lalaa se pamaɣzɩnɩ mba paha-wɛ kʋjɔŋ yɔ pa-kɩɖaʋ.

Ða-taa wɛ leleŋ siŋŋ ɛsɩmɩyɛ nɖɩ tɛtʋ taa ñʋndɩnaa wɩlɩ-ɖʋ yɔ ɖɩ-yɔɔ nɛ ɛzɩma pɩɖʋʋ hɩɖɛ Yehowa yɔ pɩ-yɔɔ.—Matiiyee 5:16.