Papaɣzɩ ɖɛzʋʋ Bibl taa toovenim tɔm Papiyamɛnto kʋnʋŋ taa pileɖaa nɛ pɩtalɩ pɩnaɣ 2023 lɛ, pɩlabɩ pɩnzɩ 75. Papiyamɛnto kɛ Kreyɔɔlɩ kʋnʋŋ nɛ kɩlɩnɩ Caama, Pɔrtiigaalɩ nɛ Ɛsɩpaañɩ kʋnʋmɩŋ taa. Sɔnɔ ɛyaa mba pɛwɛ lɩm hɛkʋ taa tɛtʋ ndʋ payaɣ se ABC (Aruba, Bonaire, Curaçao) fransɩɩ taa yɔ, tɩ-taa ɛyaa 350 000 yɔɔdʋʋnɩ Papiyamɛnto kʋnʋŋ.

Pɩnzɩ 1920 waa tɛŋaɣ lɛ, papaɣzɩ tɔm susuu tɛtʋ ndʋ tɩ-taa. Ɛsɔtɔm tiyiyaa mba pafalɩsɩ-wɛ Galaadɩ sukuli taa yɔ patalaɣ Kurasawo taa pɩnaɣ 1946 taa lɛ, agbaa pazɩ kaatɛm wɛʋ peeɖe. Ɛlɛ pataatɩɩpaɣzɩtɩ ɖɛzʋʋ ɛgbɛyɛ takayɩsɩ Papiyamɛnto kʋnʋŋ taa. Palakaɣ agbaa taa kediɣzisi Aŋglɛɛ nɛ Papiyamɛnto kʋnʋmɩŋ taa; ɛlɛ Aŋglɛɛ, Caama nɛ Ɛsɩpaañɩ kʋnʋmɩŋ taa takayɩsɩ palakaɣnɩ tʋmɩyɛ. Koobiya kaaɖiɣzinaa se pɩpɔzɩ ɛgbɛyɛ takayɩsɩ Papiyamɛnto kʋnʋŋ taa, ɛlɛ kala ndɩ ndɩ kaawɛɛ. Tɔm kpou takayaɣ nakɛyɛ taawɛɛ nɛ paɣtʋ ndʋ tɩsɩɣna se patɩlɩ ɛzɩma pɩwɛɛ se pama Papiyamɛnto kʋnʋŋ yɔ, pɩtaawɛɛ. Koobu Bill Yeatts paacalɩ tiyinuu lɩm hɛkʋ tɛtʋ ndʋ tɩ-taa se ɛla Ɛsɔtɔm tiyiyu tʋmɩyɛ; ɛsɩnaa ɖɔɖɔ nɛ pala tɔm ɖɛzʋʋ tʋmɩyɛ nɖɩ. Ɛzɩ pɔyɔɔdʋʋ Annuaire 2002 des Témoins de Jéhovah taa yɔ, koobu ɛnʋ ɛyɔɔdaa se: «Ðɩɖɛzaɣ ɛgbɛyɛ takayɩsɩ lɛ, pɩɩwɛɛ se ɖɩyɔɔdɩ nɛ ɖɩma tɔm ndʋ yɔ, wiɖiyi nɔɔyʋ tɩyɔɔdɩ yaa nɔɔyʋ tɩma tɔm ndʋ nɛ ɛna Papiyamɛnto kʋnʋŋ taa. Pʋcɔ nɛ ɖɩpaɣzɩ ɖʋʋ paɣtʋ ndʋ pɩpɔzɩ-ɖʋ yɔ lɛ, pɩɩlabɩ kaɖɛ kpem.» Paa pɩɩlabɩ kaɖɛ yɔ, koobiya wobi pɩ-yɔɔ nɛ pañaɣ pana nɛ pɛɖɛzɩ tɔm.

Hatʋ cabɩ takayaɣ ŋga pacalɩ ɖɛzʋʋ Papiyamɛnto kʋnʋŋ taa yɔ, payaɣ-kɛ se La joie pour tous les hommes. Pɛtɛm-kɛ ɖɛzʋʋ pɩnaɣ 1948 taa. Pʋwayɩ lɛ, pɛɖɛzɩ takayɩsɩ sakɩyɛ taa tɔm, pɩkpɛndɩnɩ Feŋuu Tilimiye nɛ Fe! (Réveillez-vous !) takayɩsɩ. Lɛɛlɛɛyɔ, pɛwɛɛ nɛ palɩzɩɣ Bibl—Ɛjaɖɛ kɩfaɖɛ tɔm ɖɛzʋʋ pazɩ pazɩ Papiyamɛnto kʋnʋŋ taa. Bibl taa Ruti takayaɣ pacalɩ ɖɛzʋʋ nɛ palɩzɩ-kɛ 1^er octobre 2021 wiye.

Pana wena pañakɩ nɛ pɛɖɛzɩɣ ɛgbɛyɛ takayɩsɩ mbʋ yɔ, ayeba nɛ tɔm susuyaa huu sakɩyɛ lɩm hɛkʋ taa tɛtʋ ndʋ tɩ-tɩŋa tɩ-taa. Paacalɩ ɖʋʋ ɛgbɛyɛ Papiyamɛnto kʋnʋŋ taa pɩnaɣ 1956 taa lɛ, tɔm susuyaa 16 kaawɛnɩ ɖɩ-taa. Sɔnɔ tɔm susuyaa cɛzɩ 1 600 nɛ pɛwɛ Papiyamɛnto agbaa wena a-taa yɔ, acɛzɩ 25. Pɩnaɣ 2023 taa ɛyaa mba pɛkpɛlɩkɩnɩ Bibl yɔ, pɛcɛzɩ 1 200.

Ða-taa tɛma se Yehowa kaɣ wobu pɩ-yɔɔ nɛ ɛwazɩɣ pana wena Papiyamɛnto kʋnʋŋ taa koobiya halaa nɛ abalaa pañakɩ se peyele nɛ pa-ñalɩmɩyɛ ñandɩ ɛyaa ɛsɩndaa nɛ pɩsa Yehowa yɔ.—Maatiyee 5:16.