ZWE BATHU BA CHECHANA
9: Cha u li Icho
CHA KU NO DWA
Cha u li icho cho leba ku njinji ku pinda zina lilo ne zila ya u no lingika nayo. Ko shanganyila zwa u no tolela pezhugwi, cha u no dumila, ne buthu gugo. Dumbu, cha u li icho i chingwe ne chingwe chi no ku thama kuti u be iwe, iwe—mu mazwiwo ne se kwa u lingika.
INI KU FANILA
Ha u tolela pezhugwi cha u li icho, u no milila cha u no dumila mu bumo gwe ku lechedzela bakhwinya babo ku lawula buchilo gugo.
“Bathu ba njinji ba nonga bo mpopi ba ka mbadziwa zwimbhalo mu dzishopo. Ha ba to zwishalulila zwimbhalo zwa ba no mbhala; ba no shaluligwa ne bangwe.”—Adrian.
“Nda ka zwidiya ku milila malebeswa nenguba kwa ka sima. Ndo khona ziba bakhwinya bangu be malebeswa ne zila ya ba no zwibata nayo ne se kwa ndi zwibata ha ndi nabo.”—Courtney.
NLAYONTEWO WE BAIBILI: “Mu si zwifananye ne shango ino, koga shandugwani ngo bumbiwa butshwa . . .kwe mikumbulo yenyu.”—Baroma 12:2.
CHA U NGA THAMA
Ibe ne nkumbulo we ku ziba cha u li icho ngwenu ne kuti u no shaka ku be yani ne ku lingisisa bukhoni gugo, zwa u singa khone, ne mazwimisilo awo. Cha wu nga thama wu dabila dzibuzo dzi no tobela.
Bukhoni: Ndina bukhoni ne bunyambi gwa ka tini? Zwa ndi no khona kwazo ini? (Ha ti lakidzila: Apa ndi nthu u no bata nako? ndo-zwibata? ndo shinga kwazo? ndo pana?) Zwithu zwa ka naka ne kwangu ndi zwipi?
GUMBULUDZO: Apa u no simigwa ne ku bona zwithu zwa ka naka ne kuko? Buzwa nzwadzi uwo kene nkhwinya uwo wa u no themba kuti u no bona bukhoni gupi gwa ka naka mu kuli ne kutini.
NLAYONTEWO WE BAIBILI: “Mmwe ne mmwe nga a lingisise mishingo iye, ngono ndizo ku dwapo u nga zwikudza, a singa zwifananye ne mmwe.”—Bagalatiya 6:4.
Zwa u singa khone: I zwithu zwipi mu buthu gwangu zwi no sheta kuti ndi shingile mu zwili kwazo? Ha nda ka lingisana ne ku kwebegwa mu ndiko? Ndi ngayi kwa ndi nga gwisa ku zwibata kwazo?
NLAYONTEWO WE BAIBILI: “Ha titi a tina jinyo, to zwitjengedza.”—1 Johani 1:8.
Mazwimisilo: Mazwibato e buthu ndi api, ngono ne kutini? Apa ndo dumila mu Ndzimu? Busupi gupi gwa ka thama kuti ndi dume kuti u yapo? Mazwibato api a ndi no tola a sa ka lulwama, ngono ne kutini? Ndo linga chibaka chi no zha ne zila ya ka tini?
NLAYONTEWO WE BAIBILI: “Njalakang’wa dzowo ku linda, ku hwisisa kowo ku tjengeta.”—Zwiani 2:11.
