PA JÓVENS
9: Konxe ken ki bo é
KUZÊ KI KEL-LI SIGINIFIKA
Konxe ken ki bo é ta nvolve mutu más di ki sô sabe bu nómi i bu aparénsia. El ta inklui bus prinsípiu, kuzê ki bu ta kridita na el i bu manera di ser. Nton, kel-li krê fla ma kel algen ki bo é, ta inklui tudu kes kuza ki ta pô-u ta ser di manera ki bo é di pa déntu i di pa fóra.
PAMODI KI KEL-LI É INPORTANTI
Óras ki bu sabe dretu ken ki bo é, bu ta difende kel ki bu ta kridita na el, envês di dexa bus koléga kontrola-u.
“Txeu algen é sima kes bonéka grandi ki ta sta na móntra di lója pa mostra ropa. Es ka ta skodje ki ropa ki es ta bisti. Otus algen ki ta skodje pa es.” — Adrian.
“N prende modi ki N pode difende kel ki é sértu mésmu óras ki é difísil. N sabe kenha ki nhas amigu é, pa manera ki es ta konporta i pa manera ki N ta konporta óras ki N sta djuntu ku es.” — Courtney.
KONSEDJU DI BÍBLIA: ‘Nhos para di sigi kel mundu li, má nhos troka nhos manera di pensa pa nhos pode transforma’. — Romanos 12:2.
KUZÊ KI BU PODE FAZE
Analiza bus pontu fórti, bus frakéza i kes kuza ki bu ta kridita na el, asi pa bu pode sabe kenha ki bo é gósi i kenha ki bu ta gostaba di ser na futuru. Un bon manera di kumesa, é responde kes pergunta li.
Pontus fórti: Ki taléntus i kapasidadis ki N ten? Kal ki é nhas pontu fórti? (Pur izénplu: N ta kustuma txiga sénpri na óra? N ta kontrola nha kabésa? Ami é trabadjador? N gosta di da?) Ki kuzas dretu ki N ta kustuma faze?
AJUDA: Bu ka sta konsigi atxa ninhun kuza dretu ki bu fla ô faze? Pidi bu pai, bu mai ô un amigu ki bu ta kunfia na el, pa fla-u ki pontus fórti ki es ta atxa ma bu ten i pamodi.
KONSEDJU DI BÍBLIA: ‘Kada un debe djobe pa kel ki el ta faze, asi el ta ten motivu di fika kontenti sô ku se kabésa, sen konpara ku otus algen.’ — Gálatas 6:4.
Frakézas: Ki kuzas N meste midjora más na nha manera di ser? Na ki situason ki N ta xinti ma é más fásil N faze un kuza mariadu? Na kuzê ki N pode kontrola nha kabésa más txeu?
KONSEDJU DI BÍBLIA: ‘Si nu fla: “Nu ka ten pekadu”, nu sta ta ngana nos kabésa’. — 1 João 1:8.
Kuzê ki bu ta kridita na el: Ki prinsípius ki N ta sigi sobri manera di konporta i pamodi? N ta kridita na Deus? Ki próva dja djuda-m ten sertéza ma Deus ta izisti mê? Kuzê ki N ta atxa ma é ka justu i pamodi? Kuzê ki N ta kridita ma ta ben kontise na futuru?
KONSEDJU DI BÍBLIA: ‘Kapasidadi di pensa ta guarda-u i disirnimentu ta proteje-u.’ — Provérbios 2:11.
Bu pode gosta di kes-li tanbê
RESPÓSTAS PA 10 PERGUNTA KI JÓVENS TA FAZE
N konxe nha kabésa dretu?
Sta konsienti di kuzê ki bu ta kridita na el, di bus pontu fórti, pontu fraku i bus obijetivu ta djuda-u toma bon disizon óras ki bu sta sufri influénsia.
