Nu ta sustenta nos trabadju di pregason prinsipalmenti através di kontribuisons di livri vontadi ki Tistimunhas di Jeová ta faze. a Na nos Salons di Reinu ten kaxas di kontribuison, má ten otus manera di faze kontribuisons ki sta splikadu na nos pájina di Kontribuisons. Na kel pájina la, algen pode skodje maneras di faze kontribuison ki el krê pa djuda na nos trabadju na mundu interu, pa dispézas di kongregason ô pa tudu dôs.

 Ka ta pididu pa Tistimunhas di Jeová da dízimu nen un kuantidadi sértu ô un párti di ses dinheru ki es ta ganha tudu mês. (2 Coríntios 9:7) Nunka nu ka ta pidi dinheru ô kobra pa algen pode sisti runion. Tanbê ninhun Tistimunha di Jeová ka ta pidi dinheru pa batiza algen, pa faze funeral, pa faze kazamentu ô pa otus kuza. Nu ka ta ranja kontribuisons ku atividadis sima bende kuzas pa djunta dinheru, faze fera, organiza jogus, faze féstas, faze kumida i konvida algen pa paga pa kume, faze sorteiu ô otus atividadi sima kes-li i nen nu ka ta pidi dinheru. Nunka nu ka ta fla ô dexa públiku sabe informasons di kes algen ki ta faze kontribuisons. (Mateus 6:2-4) Nos sites i nos publikasons ka ten ninhun avizu di publisidadi.

 Tudu kongregason di Tistimunhas di Jeová ta mostra un rilatóriu di kónta tudu mês na ses runion, ki é pa públiku. Kada kongregason ta analiza sénpri ses rilatóriu di kónta, asi pa garanti ma kes kontribuison sta ta uzadu dretu. — 2 Coríntios 8:20, 21.

•   Kaxas di kontribuison: Bu pode faze kontribuison ku dinheru ô xéki na kes kaxa di kontribuison ki ta sta na Salons di Reinu, Salons di Asenbleia ô na otus lugar undi ta fazedu runions.

•   Kontribuison pa internet: Na txeu país, bu pode uza kel pájina “Faze kontribuisons pa Tistimunhas di Jeová” pa bu faze kontribuisons ku kartons di kréditu i kartons di débitu. Tanbê bu pode transfiri dirétu pa kónta na banku ô uza otus manera di faze kontribuison ki ten na internet. b Alguns Tistimunha di Jeová ta faze planu pa tudu mês es ‘poi algun kuza apárti’ pa faze ses kontribuison através di un di kes manera li. — 1 Coríntios 16:2.

•   Kontribuison ku planu: Ten alguns manera di faze kontribuison ki ta iziji pa bu faze planu antis ô pa bu pidi konsedju di kenha ki ta ntende di asuntu. Planu ki bu ta faze pode djuda-u tra pruvetu di kes direitu di inpostu di bu país. Txeu algen konsigi kel-li pamodi es informa más dretu sobri kontribuisons ki pode fazedu timenti algen sta bibu ô kes ki ta sirbi dipôs ki algen móre. Favor txoma pa un skritóriu di filial di Tistimunhas di Jeová pa bu sabe más informason si bu ta gostaba di faze un kontribuison ki ta nvolve:

  •   kóntas na banku

  •   suguru i planu di refórma

  •   propriadadis sima kaza ku txon

  •   pártis na un inpréza

  •   testamentu

 Pa más informason sobri manera di faze kontribuison ki sta disponível na undi ki bu ta mora, djobe kel párti “Faze kontribuisons pa Tistimunhas di Jeová” na internet.