Inki Mutindu Mono Lenda Kuma Mbangi ya Yehowa?

TALA NA

Yezu tubaka mambu yina yo ke lomba nde muntu kusala sambu na kukuma Mbangi ya Yehowa. Mambu yango kele na Matayo 28:19, 20. Verse yai ke tubila mambu yina muntu fwete sala sambu na kukuma longoki ya Kristu disongidila kutuba to kulonga bantu mambu ya Yehowa.

Diambu ya 1: Longuka mambu yina Biblia ke longaka. Yezu songaka balongoki na yandi na ‘kukumisa bantu balongoki mpi kulonga bo.’ (Matayo 28:19, 20) Ngogo ya bo me balula na “longoki” ke tendula “muntu yina ke longuka.” Biblia mpi mingi-mingi malongi ya Yezu Kristu kele ti mambu yina nge kele na yo mfunu sambu na kuvanda ti luzingu ya kiese mpi ya mbote. (2 Timoteo 3:16, 17) Beto ke zola kusadisa nge na kulonguka mambu yina Biblia ke longaka na nsadisa ya manaka na beto ya kulonguka Biblia ya ofele.—Matayo 10:7, 8; 1 Batesalonika 2:13.

Diambu ya 2: Sadila mambu ya nge ke longuka.

Yezu tubaka nde bantu yina ke longuka fwete ‘zitisa mambu yonso ya yandi songaka bo.’ (Matayo 28:20) Yo ke tendula nde mambu ya nge ke longuka na Biblia fwete bikala kaka ve na ntu kansi yo fwete pusa nge mpi na kusoba kibeni mabanza mpi bikalulu na nge. (Bisalu 10:42; Baefezo 4:22-29; Baebreo 10:24, 25) Bantu yina ke zitisaka bansiku ya Yezu ke bakaka lukanu ya kulanda yandi ntangu bo ke pesaka luzingu na bo na Yehowa Nzambi.—Matayo 16:24.

Diambu ya 3: Kubaka mbotika. (Matayo 28:19) Biblia ke fwanisaka mbotika ti kuzika muntu. (Fwanisa ti Baroma 6:2-4) Yo ke monisa nde nge me fwa na yina me tala luzingu na nge ya ntama mpi nge me yantika luzingu ya mpa. Mbotika ya nge ta baka ta monisa na meso ya bantu yonso nde nge me sala dezia mambu zole ya ntete yina Yezu tubaka mpi nge ke lomba nde Nzambi kusadisa nge na kuvanda ti kansansa ya bunkete.—Baebreo 9:14; 1 Piere 3:21.

Inki mutindu mono ta zaba nde mono kele ya kuyilama sambu na kubaka mbotika?

Zabisa bankuluntu ya dibundu. Bo ta solula ti nge sambu na kuzikisa kana nge ke bakisa mambu ya nge me longukaka, ke sadilaka yo mpi me kudipesaka na Nzambi na luzolo na nge mosi.—Bisalu 20:28; 1 Piere 5:1-3.

Keti mambu yai ke tadila mpi bana yina bibuti na bo kele Bambangi ya Yehowa?

Ee. Beto ke sansaka bana na beto “na malongi mpi na balukebisu ya Yehowa,” kaka mutindu Biblia ke pesaka nsiku. (Baefezo 6:4) Kansi, kana bo yela, bo mosi fwete baka lukanu ya kulonguka, ya kundima mpi ya kusadila mambu yina Biblia ke longaka na ntwala nde bo baka mbotika. (Baroma 12:2) Nsuka-nsuka, konso muntu fwete pona yandi mosi lusambu na yandi.—Baroma 14:12; Bagalatia 6:5.