Na ntoto ya mvimba, Bambangi ya Yehowa kele ti bafiliale 15 yina ke niemaka mikanda. Filiale ya Eropa ya Kati-Kati kele na kati na yo; yo kele na Selters, na Allemagne, na kisika mosi ya bo ke bingaka Steinfels, disongidila “Ditadi ya Ngolo” Kialema.

Na Mayi 23-25, 2014, biro ya filiale ya Eropa ya Kati-Kati bingaka bantu ya ke zingaka pene-pene na bo, bantu ya mumbongo, mpi bamfumu ya bwala na bo ntangu yo kangulaka kielo na yo. Bo pesaka yo zina “Bamvula 30 na Selters” sambu bo tambikaka biro ya filiale na Yehowa na Aprili 21, 1984.

Na kilumbu yina ya kukangula kielo, bantu kuluta 3000 salaka viziti ya banzo ya filiale. Maire ya mbanza, yina me salaka ti bamfumu ya bwala yina kiteso ya bamvula 30, tubaka nde: “Kusala viziti ya biro ya filiale ya Bambangi ya Yehowa ke vandaka ntangu yonso diambu ya sipesiali. Mono ke landa kuyituka mutindu bo tungaka biro ya filiale na Selters na ntangu fioti, katuka na mvu 1979 tii na mvu 1984.”

Kisika mosi vandaka na ntu-diambu “Bantu ya Yehowa na Eropa ya Kati-Kati.” Bantu yina kwisaka kusala viziti, talaka kiteso ya bamvula 120 ya disolo ya Bambangi ya Yehowa na kitini yina ya ntoto. Kifwanisu yina kele ntangu yai na kati ya bima yina bo ke songaka na biro ya filiale yina.

Kisika ya nkaka vandaka kumonisa ba Biblia yina ke monanaka mingi ve mpi ya mfunu mingi. Mu mbandu, yo vandaka ti mbalula mosi ya ntama ya Biblia ya Kialema ya bamvu 1534 mpi ndambu ya Biblia ya bandinga mingi ya Elias Hutter ya bamvu 1599, yina vandaka ti mambu na bandinga 12. Diaka, bafoto, bakarte, mpi bavideo vandaka kumonisa mfunu ya minsiku ya Biblia na luzingu ya bubu yai.

Na baviziti zole yina muntu fwete sala yandi mosi, bantu yina kwisaka kusala viziti zabaka mambu yina babakala ti bankento kuluta 1000 yina ke zingaka mpi ke salaka na biro ya filiale yina ke salaka konso kilumbu. Na viziti ya ntete, yina vandaka na ntu-diambu “Mutindu Beto Ke Zingaka,” bantu yina kwisaka kusala viziti talaka ndambu ya basuku ya kulala. Bo diaka mpi na suku ya kudia mpi bo tambulaka na banzo yina vandaka bonso parke. Muntu mosi tubaka nde, “Kisika yai kele kitoko mingi.”

Viziti ya zole, yina vandaka na ntu-diambu “Kubasisa Mikanda,” monisaka Nzo yina kele ti bamashini ya kuniemina mikanda, Kisika bo ke kangaka mikanda, mpi Departema ya Kutinda Mikanda. Bantu yina salaka viziti monaka bo mosi mutindu bo ke niemaka mikanda ya ke tendulaka Biblia, ke kangaka yo, mpi na nima ke tindaka yo na bansi kuluta 50. Muntu mosi tubaka nde: “Mono me yindulaka ntete ve nde Bambangi ya Yehowa kele organizasio ya ntoto ya mvimba. Mikanda na bo ke kumaka na bisika yonso na ntoto. Kusala yo ti bansadi ya luzolo ya mbote kele kimangu.”

Diambu mosi ya sipesiali vandaka kisika bo tulaka jw.org, yina vandaka kumonisa site internet ya Bambangi ya Yehowa yina me zabanaka. Baleke ti bambuta monaka masolo mpi talaka bavideo, mpi bo pesaka bamvutu na bangiufula na bo.

Sambu bo bakisaka na mutindu ya mpa kisalu yina Bambangi ya Yehowa ke salaka na ntoto ya mvimba, bantu mingi yina kwisaka kusala viziti manisaka viziti na bo ti ntonda sambu na kisalu yina ke salama mpi ti mamweta na baluse na bo. Muntu mosi tubaka nde: “Mono vandaka ti bangindu mingi ya mbi sambu na Bambangi. Mono fwete soba bangindu na mono.” Nkento mosi vandaka kutuba ntangu yonso nde: “Kilumbu yai me bwisa kibeni bangindu na mono yonso ya mbi.”