Mono butukaka na Ouganda, na distrike ya Gomba. Bantu mingi ya ke zingaka kuna ke vandaka bansukami. Kuran vandaka ve na mbanza na beto. Yo yina kana mpimpa me bwa beto vandaka kusadila bamwinda ya petrole sambu na nsemo.

 Bibuti na mono vandaka bantu ya ke salaka bilanga. Bo katukaka na Rwanda mpi kumaka kuzinga na Ouganda. Bo vandaka kusala kafe mpi kukuna mankondo. Bo vandaka kusala malafu mosi ya ngolo yo bo ke bingaka waragi. Bo vandaka kusala yo ti mankondo. Bantu vandaka kunwa malafu yango mingi na Ouganda. Katula yo, bo vandaka kusansa bansusu, bankombo, bangulu mpi bangombe. Mutindu bantu vandaka kusala mambu na kisika yina mono yelaka mpi mutindu bo vandaka kulonga mono, mono vandaka kuyindula nde nkento fwete lemfukilaka kaka bakala na yandi mpi nde yandi kele ve ti nswa ya kupesa dibanza na yandi.

 Ntangu mono lungisaka bamvula 23, mono kwendaka na Rwanda. Mono vandaka kukwenda kukina ti batoko ya mvula na mono na bisika yina bantu ke kwendaka kusala ambianse na mpimpa (boîtes de nuit). Mbala mingi, mono vandaka kukwenda na kisika mosi na kati ya bisika yai. Yo yina, bo pesaka mono karti mosi ya vandaka kupesa mono nzila ya kukota kukonda kufuta mbongo. Mono vandaka mpi kuzola bafilme ya bitumba yina bo vandaka kusongisa mambu ya nku kibeni. Bantu yina mono vandaka kukutana ti bo mpi bansaka ya kulutisa ntangu yina mono vandaka kusala salaka nde mono kuma muntu mosi ya nku mpi ya ke salaka pite.

 Na mvu 2000, mono kumaka kuzinga ti toko mosi ya nkento. Zina na yandi Skolastique Kabagwira. Beto butaka bana tatu. Sambu yandi pesa mono mbote to yandi lomba mono kima mosi buna, mono vandaka kuzola nde yandi fukama na ntwala na mono. Bo longaka mono mutindu yina ntangu mono vandaka toko. Mono tubaka mpi nde konso kima ya dibuta na mono fwete vanda kima na mono mosi mpi mono lenda kaba yo mutindu mono me zola. Mbala mingi, mono vandaka kubasika na nkokila mpi mono vandaka kuvutuka na nzo kaka na ngunga ya tatu ya mpimpa. Mbala mingi, mono vandaka kuvutuka ya kulawuka malafu. Kana Skolastique me wumela na kukangudila mono porte, mono vandaka kubula yandi.

 Na ntangu yina, mono vandaka mfumu na kompani mosi ya vandaka kusala kisalu ya kutanina banzo ya bantu. Bo vandaka kufuta mono mbongo mingi. Skolastique vandaka kusosa kundimisa mono na kukota na dibundu ya ba pentecôtiste. Yandi vandaka kusambila kuna. Ntembe kele ve nde yandi vandaka kuyindula nde dibundu lenda sadisa mono na kusoba. Kansi mambu yina vandaka ve kutala mono. Na kisika ya kukota na dibundu yina, mono kumaka makangu ya nkento ya nkaka. Skolastique vandaka diaka ve kukanga ntima mutindu mono vandaka kubula yandi mpi kumonisa nde mono kele ve ya kukangama kaka na yandi. Yo yina, yandi kwendaka na bibuti na yandi ti bana na beto tatu.

 Bakala mosi ya mbuta vandaka nduku na beto. Yandi yindulaka ti mono mpi beto tadilaka mutindu mono ke zingaka. Yandi siamisaka mono na kubanda diaka kuzinga ti Skolastique. Yandi songaka mono nde mono kele ti bana ya mbote mpi yo fwanaka ve nde bo zinga ya kukabwana ti tata na bo. Yo yina na 2005, mono yambulaka kunwa malafu. Mono yambulaka nkento yina ya nkaka mpi beto wakanaka ti Skolastique. Na 2006, beto kwelanaka. Ata mpidina, mono vandaka kaka kubula yandi mpi kufinga yandi.

 Na 2008, Mbangi mosi ya Yehowa kwisaka kutala mono. Zina na yandi Joël. Mono waka mambu yina yandi kanaka kusonga mono. Yandi kwisaka bangonda mingi mpi mbala na mbala sambu na kutala mono. Yandi vandaka kukwisa ti Mbangi ya nkaka ya Yehowa. Zina na yandi Bonaventure. Mono vandaka kutula ntembe ya ngolo sambu na mambu yina Biblia ke tubaka ntangu beto vandaka kusolula mambu ya Biblia ti Joël. Mu mbandu, mono vandaka kuyula bo bangiufula mingi, mingi-mingi bangiufula ya me tala mukanda ya Kusonga. Na kutuba ya masonga, mono vandaka kusosa kumonisa nde Bambangi ya Yehowa vandaka ve ti raison. Mu mbandu, mono vandaka kuyula bo nde nki mutindu Bambangi ya Yehowa lenda tuba nde ‘kimvuka ya nene ya bantu’ yina Kusonga 7:9 ke tubila ta zinga awa na ntoto kansi verse ke tuba nde kimvuka yango ‘me telama na ntwala ya kiti ya kimfumu ya [Nzambi] mpi na ntwala ya mwana ya dimeme’ Yezu Kristu. Joël vandaka kupesa bamvutu na bangiufula na mono ti kukanga ntima yonso. Yandi songaka mono mpi Yezaya 66:1. Na verse yai, Nzambi ke tuba nde ntoto kele “kazune” na yandi. Yo ke monisa nde kimvuka yango ya nene kele ya kutelama na ntwala ya kiti ya kimfumu ya Nzambi awa na ntoto. Mono tangaka mpi Nkunga 37:29 yina ke tuba nde bantu ya lunungu ta zinga mvula na mvula na ntoto.

 Nsuka-nsuka, mono ndimaka kulonguka Biblia. Mono ti Skolastique, beto kumaka kulonguka Biblia ti Bonaventure. Malembe-malembe, mambu ya mono vandaka kulonguka kumaka kupusa mono na kusala bansoba na luzingu na mono. Mu mbandu, mono zabaka nde mono fwete sadila nkento na mono mambu ti luzitu. Mono vandaka diaka ve kuzola nde yandi fukama na ntwala na mono sambu na kupesa mono mbote to kulomba mono kima mosi buna. Mono yambulaka mpi kukumisa bima ya dibuta na mono bima na mono mosi. Mono yambulaka mpi kutala bafilme yina vandaka kumonisa mambu na nku. Yo vandaka ve pete sambu na kusala bansoba yina lombaka nde mono kuma ti kudikulumusa mingi mpi kudiyala.

 Mwa bamvula na ntwala, mono tindaka mwana na mono ya ntete Christian na Ouganda sambu na kuzinga ti bantu ya dibuta na beto. Na nima mono tangaka mukanda ya Kulonga 6:4-7 mpi mono bakisaka nde mono ti nkento na mono, beto bantu kele ti mukumba na ntwala ya Nzambi ya kusansa bana na beto, mingi-mingi ya kulonga bo minsiku ya Biblia. Beto vandaka kibeni na kiese mutindu beto vandaka ya kuvukana beto yonso na nzo.

 Mono kwisaka kuzaba nde Yehowa kele Nzambi yina ke wilaka bantu mawa, mpi mono ke ndima nde yandi me lolulaka mono mutindu mono vandaka ti bangindu ya mbi mpi bikalulu ya mbi na bilumbu me luta. Mono kele kibeni na kiese mutindu Skolastique mpi ndimaka kulonguka Biblia. Beto pesaka luzingu na beto na Yehowa mpi na Desembri 4, 2010, beto bakaka mbotika beto zole. Bubu yai, beto me kumaka kutudilana ntima mpi mutindu beto ke sadilaka minsiku ya Biblia, beto ke zingaka na kiese na dibuta na beto. Nkento na mono ke sepelaka mingi mutindu mono me kumaka kuvutuka mbala mosi na nzo kana kisalu me mana. Yandi ke sepelaka mpi mutindu mono ke sadilaka yandi mambu ti luzitu mpi mutindu mono me bakaka lukanu ya kunwa diaka ve malafu mpi mutindu mono ke bulaka yandi diaka ve. Na 2015, mono kumaka nkuluntu. Mukumba yai ke pesaka mono kiese ya kupesa maboko sambu bampangi ya dibundu na beto kuvanda ti kimpeve ya mbote. Diaka, na kati ya bana na beto tanu, tatu me bakaka mbotika.

 Ntangu mono vandaka kulonguka Biblia ti Bambangi ya Yehowa, mono vandaka kundima ve kaka mpidina mambu yina bo vandaka kulonga mono. Kansi kima yina vandaka kubenda dikebi na mono vandaka mutindu bo vandaka kupesa bamvutu na bangiufula na mono na nsadisa ya Biblia. Mono ti Skolastique beto bakisaka nde, bantu yina ke tubaka nde bo ke sambilaka Nzambi ya kieleka, bo fwete zitisa bansiku na yandi, kansi bo fwete baka yo ve na nsaka. Mono ke pesa Yehowa mersi mutindu yandi me bendaka mono na yandi mpi me ndimaka mono na dibuta na yandi ya kimpeve. Kana mono yindula luzingu na mono, mono ke ndimaka nde Yehowa lenda sadisa konso muntu yina kele ntima ya masonga na kusala bansoba ya nene na luzingu na yandi sambu na kusepedisa yandi.