Beto Ke Longukaka Mambu ya Nzambi na Nzila ya Baprofete na Yandi
Nzambi sadilaka baprofete sambu na kuzabisa bantu bansangu ya mfunu. Keti bansangu yai lenda sadisa beto na kuzaba mutindu beto lenda baka balusakumunu ya Nzambi? Ee, yo lenda sadisa beto. Beto tadila malongi yina beto lenda baka na mbandu ya baprofete tatu ya kwikama.
ABRAHAMI
Nzambi ke pona-ponaka ve mpi yandi ke zolaka kusakumuna bantu yonso.
Nzambi silaka profete Abrahami nde ‘mabuta yonso ya ntoto ta baka lusakumunu na nzila ya Abrahami.’—Kuyantika 12:3.
Inki dilongi beto ke baka? Nzambi ke zolaka beto mingi mpi yandi ke zola kusakumuna mabuta yonso; babakala, bankento mpi bana yina ke lemfukilaka yandi.
MOIZE
Nzambi ke wilaka bantu mawa mpi yandi ke sakumunaka bantu yina ke zolaka yandi.
Nkwa-Ngolo Yonso pesaka profete Moize ngolo ya kusala mambu ya kuyituka. Kansi Moize tubaka nde: “Songa mono banzila na nge, sambu mono zaba nge mpi nge landa na kundima mono.” (Kubasika 33:13) Nzambi sepelaka ti mambu yina Moize tubaka, yandi pesaka yandi mayele mingi ya kubakisa banzila mpi bikalulu na yandi. Mu mbandu, Moize bakisaka nde Ngangi ke “wilaka bantu mawa mpi ke fwilaka bo nkenda.”—Kubasika 34:6, 7.
Inki dilongi beto ke baka? Nzambi ke zolaka kusakumuna konso muntu na kati na beto: Babakala, bankento mpi bana kana beto ke sosa kuzaba yandi mbote. Na nzila ya Masonuku na yandi ya Santu, yandi ke songaka beto mutindu ya kusambila yandi mpi yandi ke songaka beto nde yandi ke vandaka ti nzala ya ngolo ya kusakumuna beto mpi ya kundima beto.
YEZU
Mawa vandaka kupusa Yezu na kubelula bamaladi ya mitindu yonso
Beto lenda baka balusakumunu ya kukonda nsuka ya Nzambi kana beto ke longuka mambu ya me tala Yezu; mambu yina Yezu salaka mpi yina yandi longaka.
Ndinga ya Nzambi ke tubilaka mambu mingi ya me tala luzingu ya Yezu mpi mambu yina yandi longaka. Nzambi pesaka Yezu ngolo ya kusala mambu mingi ya kuyituka, mu mbandu kubelula bifwa-meso, bifwa-makutu mpi bantu ya makulu-kifu. Nkutu yandi futumunaka bafwa. Yezu monisaka kibeni nde Nzambi ta sakumuna bantu yonso na bilumbu ke kwisa. Yandi tubilaka bantu mambu yina bo fwete sala sambu na kubaka balusakumunu yai, yandi tubaka nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.”—Yoane 17:3.
Yezu vandaka kuwila bantu mawa, yandi vandaka mawete mpi ntima-mbote. Babakala, bankento, baleke mpi bambuta landaka Yezu sambu yandi tubilaka bo nde: “Beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi.” (Matayo 11:29) Na ntangu ya Yezu, bantu vandaka kusadila bankento mambu na mutindu ya mbi, kansi Yezu sadilaka bankento mambu na mawete yonso, na mutindu ya mbote mpi ya luzitu.
Inki dilongi beto ke baka? Yezu vandaka kuzola bantu mingi mpi yandi me bikilaka beto mbandu na mutindu ya kusadila bantu ya nkaka mambu.
YEZU KELE VE NZAMBI
Masonuku ya Santu ke tubaka nde “Nzambi kele kaka mosi” mpi Yezu Kristu kele muntu ya kudikulumusa yina Nzambi tindaka sambu na kuzabisa nsangu na yandi. (1 Bakorinto 8:6) Yezu tubaka na masonga yonso nde Nzambi me luta yandi mpi nde Nzambi muntu tindaka yandi na ntoto.—Yoane 11:41, 42; 14:28. *
