Keti Nzambi Lenda Wa Mawa?
Kwenda Penepene na Nzambi
Keti Nzambi Lenda Wa Mawa?
SAMBU beto kele bantu ya kukonda kukuka, beto yonso kewaka mawa bantangu yankaka. Mu mbandu, beto lenda wa mawa na nima ya kubakisa nde beto mesala kifu. Kima ya ngituka kele nde Biblia ketuba nde Yehowa lenda wa mawa. Nge lenda tuba nde, ‘Si Nzambi ke muntu ya kukuka. Yandi kesalaka ve bifu!’ Ebuna, na nki mutindu Nzambi lenda wa mawa? Mvutu lenda sadisa beto na kubakisa kima mosi ya kuyituka: Yehowa kele ti mawi, mpi mambu ya beto kesalaka lenda vanda ti bupusi na mawi na yandi. Beto tadila bangogo yina kele na Bazuzi 2:11-18.
Mukanda ya Bazuzi ketubila nsungi mosi ya mavwanga na luzingu ya bana ya Izraele. Dikanda kuvandaka ntangu yai na insi ya Kanana, insi yina Nzambi kusilaka na Abrahami. Na bamvula nkama mingi yina kulandaka, mambu iya yai kusalamaka mbala mingi na luzingu ya bantu ya Izraele: kuyambula Nzambi, kumona mpasi, kubondila, mpi lugulusu. *
Kuyambula Nzambi. Na bupusi ya bantu ya Kanana, Izraele “bikisaka kusamba Mfumu Nzambi” mpi yantikaka kusamba banzambi yankaka; bo kwendaka mingimingi “kusamba banzambi yai Baale ti Astate.” * Kuyambula Nzambi mutindu yai kuvandaka apostazi. Yo keyitukisa ve na kumona nde bantu ya Izraele “pesaka Mfumu Nzambi makasi,” Nzambi yina kugulusaka Izraele na nsi ya Ezipte!—Baverse 11-13; Bazuzi 2:1.
Kumona mpasi. Sambu yo vandaka kunata yandi na kuwa makasi ya lunungu, Yehowa vandaka kukatula lutaninu na yandi na bantu yina kupesaka yandi mukongo. Na nima, bantu ya Izraele vandaka kubwa na “maboko ya bambeni” na bo, yina vandaka kukwisa mpi kuyiba bima na bo.—Verse 14.
Kubondila. Na ntangu ya mpasi, bantu ya Izraele vandaka kuwa mawa sambu na mambu ya mbi ya bo salaka mpi bo vandaka kudidila Nzambi sambu yandi sadisa bo. Kubondila na bo lenda monana na bangogo “kudila-dila sambu na bampasi ya bambeni vandaka kumonisa bo.” (Verse 18) Kubondila Nzambi kuvandaka na kati ya mambu yina vandaka kusalama mbala mingi. (Bazuzi 3:9, 15; 4:3; 6:6, 7; 10:10) Nzambi vandaka kusala inki?
Lugulusu. Yehowa vandaka kuwa kudila-dila ya Izraele mpi vandaka “kuwila bo mawa.” Ngogo ya Kiebreo ya bo mebalula nde ‘kuwa mawa’ lenda tendula “kusoba mabanza to lukanu.” Mukanda mosi ketuba nde: “Kudila-dila na bo kupusaka Yehowa na kusoba lukanu na yandi, na kisika ya kupesa bo ndola yandi vandaka kugulusa bo.” Na mawa na yandi, Yehowa “vandaka kupesa bantu ya Israele zuzi,” yina vandaka kugulusa bantu na yandi na bambeni na bo.—Verse 18.
Keti nge mesimba mambu yina kupusaka Nzambi na kuwa mawa, to kusoba mabanza na yandi? Yandi vandaka kusala yo kana bantu na yandi kusoba mabanza na bo. Yindula yo mutindu yai: Tata ya zola lenda pesa mwana yina mesala kifu ndola, mbala yankaka na kupimisaka yandi mabaku yankaka. Kansi kana yandi mona nde mwana kewa mpenza mawa, tata lenda baka lukanu ya kukatula ndola yina.
Disolo yai kelonga beto inki na yina metala Yehowa? Ata disumu ya luzolo kepesaka yandi makasi, kubalula ntima kepusaka yandi na kumonisa mawa. Yo yina, yo mefwana mpenza na kuyindula nde mambu ya beto kesalaka lenda vanda ti bupusi na mawi ya Nzambi. Sambu na nki ve kulonguka mutindu nge lenda pesa ntima ya Yehowa “kiese”? (Bingana 27:11) Yo tabika kupesa nge ve mawa ata fyoti.
[Banoti na nsi ya lutiti]
^ par. 5 Bazuzi 2:11-18 kele kitini ya bangogo ya luyantiku ya nkufi yina kemonisa mbandu ya bikalulu ya bantu ya Izraele, yina bo ketubila na bunda na bakapu ya kelanda.
^ par. 6 Baale kuvandaka nzambi ya kuluta lukumu ya bantu ya Kanana, mpi Astate kuvandaka nzambi-nkento yina bo vandaka kubaka bonso nkento ya Baale.