Nge lenda kudiyula nde: ‘Kana Nzambi ke zabaka mambu yonso, bangindu mpi bampusa na mono, sambu na nki mono fwete samba?’ Ngiufula yai kele mbi ve. Yezu tubaka nde Nzambi “ke zabaka mambu yina beno kele na yo mfunu na ntwala nkutu nde beno lomba yandi yo.” (Matayo 6:8) Davidi, Ntotila ya Izraele ya ntama bakisaka diambu yai mpi sonikaka nde: “Ata mono me tuba ntete ve nge ke zabaka nki mono ke zola kutuba.” (Nkunga 139:4) Kansi, sambu na nki beto fwete samba Nzambi? Sambu na kubaka mvutu na ngiufula yai, bika beto tadila mambu yina Biblia ke tuba na yina me tala bisambu ya bansadi ya Nzambi. *

Ata Biblia ke tuba nde Yehowa * Nzambi ke zabaka mambu yonso, yo ke monisaka mpi nde yandi ke tulaka ve dikebi na mambu ya fioti-fioti ya bansadi na yandi. (Nkunga 139:6; Baroma 11:33) Mabanza ya Yehowa ya kukonda nsuka kele ve bonso ordinatere yina ke bumbaka bansangu ya bantu. Diaka, Nzambi ke tulaka dikebi mingi na mabanza na beto ya kati, sambu yandi ke zolaka nde beto kwenda pene-pene na yandi. (Nkunga 139:23, 24; Yakobo 4:8) Yo yina Yezu siamisaka balongoki na yandi na kusamba ata Tata ke zabaka mbote bampusa na beto ya mfunu. (Matayo 6:6-8) Kana beto ke zabisa Ngangi mabanza na beto, yo ta sadisa beto na kukwenda pene-pene na yandi.

Bantangu ya nkaka, yo lenda vanda mpasi na kuzaba mpenza mambu ya beto lenda lomba na kisambu. Na ntangu yina, Nzambi lenda bakisa mawi na beto na ntwala nde beto monisa yo mpi kusadila nzayilu na yandi ya kukuka na ntangu yina sambu na kulungisa bampusa na beto. (Baroma 8:26, 27; Baefezo 3:20) Kana beto me bakisa nde Nzambi me sadisa beto na diambu mosi buna, ata na mutindu yina kele mpenza pwelele ve, yo ke sadisaka beto na kukwenda pene-pene na yandi.

Biblia ke ndimisa beto nde Nzambi Nkwa-Ngolo Yonso ke waka bisambu ya bansadi na yandi ya kwikama, yo ke monisa mpi bikuma yina ya yandi ke waka ve bisambu ya nkaka. Mu mbandu, ntangu mubulu kumaka mingi na Izraele ya ntama, Nzambi tindaka profete na yandi Yezaya na kuzabisa bo nde: ‘Ata beno lutisa ka beno bisambu, mono ke wa ve; maboko na beno me fuluka na menga.’ (Yezaya 1:15) Yo kele pwelele nde, bantu yina ke zitisaka ve bansiku ya Nzambi to ke sambaka yandi ti bangindu ya mbi lenda vingila ve nde Nzambi kuwa bisambu na bo.—Bingana 28:9; Yakobo 4:3.

Kansi Biblia ke tuba nde: “Konso kima yina beto ke lomba na kuwakana ti luzolo na yandi, yandi ke wa beto.” (1 Yoane 5:14) Keti mambu yai ke tendula nde, Nzambi ta pesa mvutu na konso kima yina bansadi na yandi ke lomba? Ve. Beto tadila mbandu ya ntumwa Polo yina sambaka Nzambi mbala tatu sambu na kukatula yandi “nsende mosi na nsuni.” (2 Bakorinto 12:7, 8) Ziku, Polo belaka maladi ya meso yina lenda beluka ve. Yo fwete vanda nde yo pesaka yandi mpasi ya mingi! Polo vandaka na dikabu ya kubelula mpi ya kufutumuna bantu, kansi yo lombaka nde yandi kanga ntima na maladi na yandi. (Bisalu 19:11, 12; 20:9, 10) Ata yandi bakaka ve mvutu na mutindu yina yandi zolaka, Polo ndimaka lusadisu ya Nzambi na ntonda yonso.—2 Bakorinto 12:9, 10.

Ya kieleka, bantu ya nkaka yina Biblia ke tubila bakaka mvutu na mutindu ya kuyituka na bisambu na bo. (2 Bantotila 20:1-7) Ata na ntangu ya ntama, Nzambi vandaka ve kupesa bamvutu ya mutindu yai mbala na mbala. Bansadi ya Nzambi ya nkaka lembaka nitu ntangu bo monaka nde Nzambi pesaka ve mvutu na bisambu na bo. Ntotila Davidi yulaka nde: “Tii nki ntangu nge ta vilaka mono? Keti nge ta vilaka mono tii kuna?” (Nkunga 13:2) Kansi ntangu muntu yai ya kwikama bakisaka mutindu Yehowa vandaka kugulusa yandi mbala na mbala, Davidi yedisaka kivuvu na yandi na Nzambi. Kaka na kisambu yina mosi, Davidi yikaka nde: “Kansi mono, mono ke tulaka ntima na kuzola ya nge ke zolaka mono.” (Nkunga 13:6) Bonso Davidi, bansadi ya Nzambi ya bilumbu na beto lenda kwamina na bisambu tii kuna Nzambi ta pesa mvutu na bisambu na bo.—Baroma 12:12.

Nzambi ke lungisaka bampusa na beto ya mfunu.

Yo ke kieleka nde tata ya zola ke pesaka ve ntangu yonso bana na yandi bima yina bo ke lombaka kaka na ntangu ya bo me lomba. Mutindu mosi mpi, Nzambi ke pesaka ve mvutu na bisambu na beto na mutindu beto ke yindula to ke zola. Kansi, beto lenda tula kivuvu nde bonso tata ya zola, Ngangi na beto ta lungisa bampusa na beto ya mfunu na ntangu ya mbote mpi na mutindu ya mbote.—Luka 11:11-13.

Nzambi lenda pesa mvutu na mitindu yina beto lenda bakisa mpenza ve.

Kansi, nki beto lenda tuba kana beto ke samba sambu na kuzwa lusadisu na diambu mosi ya ke yangisa beto mingi? Keti beto fwete tuba nde sambu Yehowa me pesa ve mvutu na mutindu ya kuyituka, yandi ke waka ve bisambu na beto? Nkutu, yo ta vanda mbote nde beto tadila mitindu ya nkaka yina Nzambi me sadisaka beto. Ziku, nduku mosi ya zola me sadisaka beto dezia na ntangu yina beto vandaka na mfunu ya lusadisu. (Bingana 17:17) Yo lenda vanda nde Yehowa muntu simbaka ntima ya nduku yango sambu na kusadisa beto. Diaka, Nzambi lenda pesa mvutu na bisambu na beto na nzila ya Biblia. Na Biblia, beto lenda baka mayele ya kununga diambu mosi ya mpasi.—2 Timoteo 3:16, 17.

Na kisika ya kukatula beto na mpasi, mbala mingi Nzambi ke pesaka bansadi na yandi ngolo sambu na kununga yo. (2 Bakorinto 4:7) Mu mbandu, ntangu Yezu bondilaka Tata na yandi na kukatula yandi na mpasi sambu yandi waka boma ya kupesa zina ya Nzambi nsoni, Yehowa tindaka wanzio mosi sambu na kupesa Mwana na yandi kikesa. (Luka 22:42, 43) Mutindu mosi mpi Nzambi lenda sadila nduku mosi ya ngolo sambu na kupesa beto kikesa na ntangu yina beto kele na mfunu na yo. (Bingana 12:25) Sambu beto lenda bakisa mpenza ve mvutu ya mutindu yai, yo ta lomba nde beto tula kibeni dikebi na mutindu Nzambi ke pesaka mvutu na bisambu na beto.

Nzambi ke pesaka bamvutu ya nkaka na ntangu ya me fwana.

Biblia ke tuba nde Nzambi Nkwa-Ngolo Yonso ke monisaka zola na bantu ya kudikulumusa na “ntangu ya me fwana.” (1 Piere 5:6) Kana yandi ke sukinina na kupesa mvutu na kisambu na beto ya masonga, yo ke tendula ve nde Yehowa ke kudibanzaka ve sambu na beto. Sambu mabanza ya Nzambi me luta ya beto, ntembe kele ve nde Ngangi na beto ya zola ke tadilaka bisambu na beto sambu na kusadila beto mambu yina yandi me zaba nde yo kele mbote sambu na beto.

Mu mbandu: Yindula nde mwana na nge ya bakala ke lomba nge velo. Keti nge ta pesa yandi yo na mbala mosi? Kana nge me zaba nde yandi me lunga ntete ve na kupusa velo, nge lenda baka lukanu ya kusumbila yandi yo na bilumbu ya ke kwisa. Nge ta sumbila yandi yo ntangu nge me mona nde yo ta lungisa kibeni mpusa na yandi. Mutindu mosi, Nzambi lenda pesa “nge kima ya nge [me] zola” na ntangu ya me fwana kana nge ke landa kusamba yandi.—Nkunga 37:4.

Biblia ke siamisa Bakristu ya kieleka na kubaka kisambu na mbalu. Bantu ya nkaka lenda tuba nde ‘kutuba mambu yai ke pete kansi kusadila yo kele mpasi.’ Ya kieleka, kana beto ke kutana ti diambu mosi ya ke yangisa beto to mambu ya nkaka ya kukonda lunungu, yo lenda vanda mpasi na kuvingila mvutu ya Nzambi. Kansi, yo ta vanda mbote na kuyibuka mambu yina Yezu longaka na yina me tala kukwamina na kisambu.

 Yezu pesaka mbandu ya nkento mosi ya mufwidi ya nsukami yina landaka na kulomba zuzi ya mbi sambu na kuzengila yandi mambu na lunungu. (Luka 18:1-3) Ata zuzi yango buyaka ntete na kusadisa yandi, nsuka-nsuka yandi kuditubilaka nde: “Mono ta sala na mpila nde yandi nunga sambu yandi landa ve kukwisa mpi kulembisa mono ti mambu ya yandi ke lomba mbala na mbala.” (Luka 18:4, 5) Na kutadila masonama ya kisina, zuzi tulaka dikebi na mufwidi sambu mufwidi yango “kubula [yandi] ve na disu”, to na mutindu ya kifwani, “yandi kubebisa ve lukumu na [yandi].” * Kana zuzi yina ya kukonda lunungu sadisaka mufwidi ya nsukami sambu na kutanina lukumu na yandi, Nzambi ya zola mpi ta sala mambu ya lunungu na “bayina ke bokaka na yandi mpimpa ti mwini”! Mutindu Yezu tubaka, Nzambi “ta zenga mambu na lunungu sambu na bo nswalu-nswalu.”—Luka 18:6-8.

Ata na bantangu ya nkaka beto ke lembaka sambu na kulomba lusadisu, beto fwete yambula ve. Ntangu beto ke kwaminaka na bisambu, beto ke monisaka mpusa na beto ya masonga sambu na kubaka lusadisu ya Nzambi na luzingu na beto. Beto ke longukaka mpi na kuzaba mutindu Nzambi ke pesaka bamvutu na bisambu na beto, ebuna yo ke sadisaka beto na kukwenda pene-pene na yandi. Ya kieleka, beto lenda tula ntima nde Yehowa ta pesa mvutu na bisambu na beto ya masonga kana beto ke landa na kulomba na lukwikilu yonso.—Luka 11:9.