Bakala ti nkento ya me kwelana ke sala dibuta ya mpa. Ata nge ta landa na kuzola mpi kuzitisa bibuti na nge, nkwelani na nge kele muntu ya kuluta mfunu na ntoto sambu na nge. Yo lenda vanda mpasi nde bampangi ya nkaka ya dibuta kundima dibanza yai. Kansi, minsiku ya Biblia lenda sadisa nge na kuvanda ti bukati-kati sambu nge tanina ngemba ti bampangi na nge ntangu nge ke sala bikesa na kuvanda ti bangwisana ya ngolo na dibuta na nge ya mpa.

MAMBU YINA BIBLIA KE TUBAKA: “Kumisa tata na nge ti mama na nge.” (Baefezo 6:2) Ata nge kele ti bamvula ikwa, nge fwete landa kukumisa mpi kuzitisa bibuti na nge. Kuvila ve nde nkwelani na nge fwete tudila mpi bibuti na yandi dikebi. Biblia ke tuba nde: “Zola kele na kimpala ve.” Yo yina, kumona ve nde bangwisana ya nkwelani na nge ti bibuti na yandi ke tula makwela na beno na kigonsa.—1 Bakorinto 13:4; Bagalatia 5:26.

MAMBU YA NGE LENDA SALA:

• Buya bangogo yina lenda pesa nkwelani na nge mpasi, mu mbandu “ntangu yonso fami na beno ke monaka mono mpamba” to “mama na beno ke zolaka ve ata fioti mambu ya mono ke salaka”

• Meka kutadila mambu mutindu nkwelani na nge ke tadila yo

MAMBU YINA BIBLIA KE TUBAKA: “Bakala ta bikisa tata na yandi ti mama na yandi, yandi ta kwenda kuvukana na nkento na yandi, ebuna bo zole bo ta kuma muntu mosi.” (Kuyantika 2:24) Ata nge me kwela, bibuti na nge lenda landa na kubaka nge bonso mwana, mpi bo lenda kudikotisa mingi na makwela na nge.

Yo kele mukumba na beno ya kuwakana sambu na bandilu yina beno ta tudila bo mpi na nima beno songa bo yo na zola yonso. Beno lenda zabisa bo mambu yango pwelele mpi na luzitu. (Bingana 15:1) Kudikulumusa, mawete mpi ntima-nda ta sadisa beno na kusala bangwisana ya ngolo ti bampangi na beno ya dibuta, mpi beno landa na “kukanga ntima na mambu ya bankaka na zola.”—Baefezo 4:2.

MAMBU YA NGE LENDA SALA:

• Kana nge ke kudiyangisa mutindu bampangi ya dibuta na nge ke kudikotisa mingi na luzingu na beno, solula ti nkwelani ntangu mambu ke kwenda mbote

• Beno wakana na mutindu beno ta sadila mambu yango