Lynnong 9
Kumno Phi Lah ban Pynlong ïa la ka Ïing ka Sem Kaba Kmen?
1. Balei ka jingkyntiewkurim ka long kaba kongsan ban pynlong ïa ka ïing ka sem kaba kmen?
Ka khubor babha ka wan na U Blei uba kmen U Jehobah, bad u kwah ba ki ïing ki sem kin long kiba kmen. (1 Timothi 1:11) U la seng ïa ka jingïashongkurim. Ka jingïathoh katkum ka aiñ ka long kaba kongsan. Kane kan ai jingshngaiñ ïa ka kmie, u kpa bad ïa ki khun. Ki khristan ki dei ban burom ïa ka aiñ da kaba pynrung kyrteng ne register ïa la ka jingïathohkurim.—Pule Loukas 2:1, 4, 5.
Kumno U Blei u sngew shaphang ka jingïathohkurim? U kwah ba ka jingïalong kawei hapdeng u shynrang bad ka kynthei kan ïaineh. U Jehobah u kwah ba ki shikurim kin bat ïa la ki jingkular. (Hebru 13:4) U isih ïa ka jingïaphet tnga. (Malakhi 2:16) Dei tang ka jingklim kaba shah ïa ki khristan ban ïaphet tnga bad ban ïashongkurim biang.—Pule Mathaios 19:3-6, 9.
2. Ki shi lok ki dei ban leh kumno iwei ïa iwei?
Ha ka jingïashongkurim, U Jehobah u la thaw ïa u shynrang bad ka kynthei ban long ki nongsumar iwei ïa iwei. (Jenesis 2:18) Kum u khlieh jong ka ïing u lok u dei ban pynbiang ïa ki jingdonkam ba man la ka sngi ïa la ka ïing ka sem, u dei ruh ban kitkhia ban hikai ïa ki shaphang U Blei. U dei ban kham ieit ïa la ka lok ban ïalade. Ki shi lok ki dei ban ieit bad burom iwei ïa iwei. Namarba ki long ki bym janai, ki dei ban nang ban ïamap iwei ïa iwei, kane ka long kaba donkam khnang ba kin ïoh jingkmen.—Pule Ephesos 4:31, 32; 5:22-25, 33; 1 Petros 3:7.
3. Lada ki shikurim ki shem jingeh hato ki dei mo ban iehnoh ïa la u/ka lok?
Lada phi shem jingeh hapdeng shikurim, baroh arngut phi dei ban ïaleh tyngeh ban pyni jingieit iwei ïa iwei. (1 Korinth 13:4, 5) Ka ktien U Blei kam pdiang ïa ka jingïashong khlad kum ka lad ban weng ïa ki jingeh kiba rit ba ria.—Pule 1 Korinth 7:10-13.
4. U Blei u kwah aïu na phi ki khun?
U Jehobah u kwah ïa phi ban long kiba kmen. U ai ka jinghikai kaba paka tam ba kumno phin long kiba kmen ha ka por samla. U kwah ba phin ïoh jingmyntoi na ka jingstad bad jingshemphang jong ki kmie ki kpa jong phi. (Kolossai 3:20) U Nongthaw jong phi, U Jehobah, u kwah ruh ïa phi ba phin ïoh mad ïa ka jingkmen haba phi leh ïa ka mon jong u bad ka jong u khun jong u.—Pule Eklesiastis 11:9–12:1; Mathaios 19:13-15; 21:15, 16.
5. Phi ki kmie ki kpa, kumno phin leh khnang ba ki khun jong phi kin ïoh jingsuk jingkmen?
Phi dei ban trei shitom ban pynbiang ïa ka bam ka dih, ka jain ka nep bad ka ïingshong ïingsah na ka bynta ki khun. (1 Timothi 5:8) Khnang ba ki khun kin long kiba kmen, phi donkam ban hikai ïa ki ban ieit ïa U Blei bad ban pdiang ïa ka jinghikai jong u. (Ephesos 6:4) Ka jingieit jong phi ïa U Blei ka pyni nuksa ha la ki khun bad kan ktah jur ïa ka dohnud jong ki. Haba ka jinghikai ka wan na ka ktien U Blei, ka lah ban pynwandur ïa ka rukom pyrkhat pyrdaiñ ki khun jong phi ha ka lynti kaba dei.—Pule Deuteronomi 6:4-7; Proberb 22:6.
Ki khun ki ïoh jingmyntoi haba phi pynshlur bad ïaroh ïa ki. Ki donkam ruh ïa ka jingsneng bad jingpynbeit. Kum kita ki jinghikai ki ïada ïa ki na ki jinglong kiba lah ban pynduh noh ïa ka jingkmen jong ki. (Proberb 22:15) Tangba, ki jingsneng kim dei ban long kiba khor ne kiba da ka jingbitar.—Pule Kolossai 3:21.
Ki Nongsakhi U Jehobah ki pynmih shibun ki kot kiba la thoh kyrpang na ka bynta ban ïarap ïa ki kmie ki kpa bad ïa ki khun. Ka nongrim jong kine ki kot ka dei ka Baibl.—Pule Salm 19:7, 11.
