Ha ka seng jong ngi, ngim don ki nongtrei kiba ngi donkam ban siew. Pynban, kumba long ha ka por ba la sdang ïa ka balang, la jied ïa ki nongsharai ba tbit “ban bsa ia ka balang U Blei.” (Kam 20:28) Kine ki rangbah balang ki long kiba la ih bha ha ka jinglong mynsiem; ki ïalam ïa ka balang bad sharai “ym da kaba leh jubor, hynrei da la ka mon sngewbha hi; ym da kaba khwan myntoi hynrei da ka jingsngew la kloi.” (1 Petros 5:1-3) Ki leh aïu na ka bynta jong ngi?

Ki peit bad ki sumar ïa ngi. Ki rangbah balang ki pyni ïa ngi na ka Baibl bad ki ïarap ïa ka balang ban kham jan sha U Blei. Ki sngewthuh ba U Blei u la aiti ha ki ïa kane ka kam bakongsan bad kim leh donbor ïa ki briew jong u, hynrei ki leh na ka bynta ka jingbha bad ka jingkmen jong ngi. (2 Korinth 1:24) Kumba u nongap langbrot u shim khia ban sumar ïa la ki langbrot, ki rangbah balang ruh ki pyrshang ban tip ïa iwei pa iwei i dkhot ka balang.​—Proberb 27:23.

Ki hikai ïa ngi kumno ban leh ïa ka mon U Blei. Man la ka taïew, ki rangbah balang ki pynïaid ïa ki jingïalang hapoh ka balang khnang ban pynskhem ïa ka jingngeit jong ngi. (Kam 15:32) Kine ki rangbah ki lamkhmat ha ka kam ïalap, ki trei bad ngi, bad ki ai jinghikai ïa ngi ha baroh ki liang jong ka kam ïalap.

Ki ai jingshlur ïa ngi. Khnang ban ïarap ïa ngi ha ka liang bakynja mynsiem, ki rangbah balang ki lah ban wan ban kren bad ngi ha ïing jong ngi ne ha Ïing Hima. Kine ki wan ban ai jingïarap bad jingtngen ïa ngi na ka Baibl.​—Jakob 5:14, 15.

Nalor ka kam balang, bun na ki rangbah balang ki don la ka kam bad la ka ïing ka sem ïa kaba ki dei ban ai por bad kit khia ïa ki. Kine ki rangbah ba trei shitom ki dei hok ban ïoh ïa ka jingburom na ngi.​—1 Thessaloni 5:12, 13.

• Kaei ka kamram jong ki rangbah balang?

• Ha kano ka rukom ki rangbah balang ki pyni ba ki phikir ïa ngi?