Ũhoro Mwega Ũrĩa Waandĩkirũo nĩ Luka 1:1-80

THAAKA

Ũhoro kũrĩ Theofilo (1-4)
Gaburieli kũratha gũciarũo kwa Johana Mũbatithania (5-25)
Gaburieli kũratha gũciarũo kwa Jesu (26-38)
Mariamu gũceerera Elizabethi (39-45)
Mariamu kũgooca Jehova (46-56)
Johana gũciarũo na kũheo rĩĩtwa (57-66)
Ũrathi wa Zekaria (67-80)

1 Kuona atĩ andũ aingĩ nĩ mageretie gũcokanĩrĩria ũhoro wĩgiĩ maũndũ marĩa mothe o na ithuĩ twĩtĩkĩtie biũ,+ ² o ta ũrĩa twerirũo maũndũ macio nĩ arĩa kuuma o kĩambĩrĩria meeyoneire+ na maarĩ ndungata cia kũhunjia ndũmĩrĩri ĩyo-rĩ,+ ³ o na niĩ, tondũ nĩ nduĩrĩtie maũndũ mothe na kinyi kuuma o kĩambĩrĩria, nĩ nduĩte itua ngwandĩkĩre maũndũ macio ndĩmathingatanĩtie wega, wee mũgaathe Theofilo,+ ⁴ nĩgetha ũmenye wega ũũma wa maũndũ marĩa ũrutĩtwo na kanua.+ ⁵ Matukũ-inĩ ma Herode*+ mũthamaki wa Judea, nĩ kwarĩ mũthĩnjĩri-Ngai wetagwo Zekaria wa gĩkundi kĩa Abija.+ Mũtumia wake ooimanĩte na aarĩ a Haruni, na eetagwo Elizabethi. ⁶ Eerĩ maarĩ athingu mbere ya Ngai, na mĩthiĩre yao ndĩarĩ na ũcuke harĩ kũhingia maathani na mawatho ma Jehova* mothe. ⁷ Ĩndĩ matiarĩ na mwana tondũ Elizabethi aarĩ thata, na eerĩ maarĩ akũrũ. ⁸ Na gũgĩkinya atĩrĩ, rĩrĩa aatungataga arĩ mũthĩnjĩri-Ngai hĩndĩ ya gĩkundi kĩao+ gũtungata mbere ya Ngai, ⁹ kũringana na ũrĩa gwekagwo ũhoro-inĩ* wa athĩnjĩri-Ngai-rĩ, ĩgĩkinya hĩndĩ yake ya gũcina ũbumba+ rĩrĩa aaingĩrire handũ harĩa hatheru ha Jehova.*+ ¹⁰ Na kĩrĩndĩ kĩa andũ gĩothe kĩarĩ nja gĩkĩhoya hĩndĩ ĩyo ya gũcina ũbumba. ¹¹ Mũraika wa Jehova* akĩmuumĩrĩra, akĩrũgama mwena wa ũrĩo wa kĩgongona gĩa gũcinĩra ũbumba. ¹² No Zekaria agĩtangĩka amuona, na agĩtoorio nĩ guoya. ¹³ No rĩrĩ, mũraika ũcio akĩmwĩra ũũ: “Zekaria, ndũgetigĩre, tondũ mathaithana maku nĩ maiguĩtwo na magetĩkĩrĩka, Elizabethi mũtumia waku nĩ akaagĩa mwana wa kahĩĩ, na ũkaamwĩta Johana.+ ¹⁴ Nĩ ũgaakena mũno na ũcanjamũke, na andũ aingĩ nĩ magaakenera gũciarũo gwake,+ ¹⁵ tondũ agaakorũo arĩ wa bata maitho-inĩ ma Jehova.*+ Na ndagĩrĩirũo kũnyua ndibei kana kĩndũ kĩngĩ o gĩothe kĩngĩtũma mũndũ arĩo,+ na nĩ akaaiyũrũo nĩ roho mũtheru o na mbere ya gũciarũo,*+ ¹⁶ na nĩ agaatũma ariũ aingĩ a Isiraeli macokerere Jehova* Ngai wao.+ ¹⁷ Ningĩ nĩ agaathiĩ mbere yake arĩ na roho na hinya wa Elija,+ nĩguo agarũre ngoro cia maithe icokerere cia ciana+ na arĩa matathĩkaga magĩe ũũgĩ* wa arĩa athingu, nĩgetha athagathagĩre Jehova* andũ mahaarĩirio.”+ ¹⁸ Zekaria akĩũria mũraika ũcio atĩrĩ: “Ingĩkorũo na ma atĩa na ũndũ ũcio? Niĩ ndĩ mũkũrũ na mũtumia wakwa o nake no mũkũrũ.” ¹⁹ Nake mũraika akĩmwĩra ũũ: “Nĩ niĩ Gaburieli,+ ũrĩa ũrũgamaga mbere ya Ngai hakuhĩ nake,+ na ndũmĩtwo njarie nawe na ngũmenyithie ũhoro ũyũ mwega. ²⁰ No rĩrĩ, ũgũtuĩka bubu ũremwo nĩ kwaria nginya mũthenya ũrĩa maũndũ macio makaahinga, tondũ ndũnetĩkia ciugo ciakwa, iria ikaahinga hĩndĩ ĩrĩa ĩtuĩtwo.” ²¹ Nao andũ magĩthiĩ na mbere gweterera Zekaria, na makĩmaka tondũ nĩ aaikarĩte mũno handũ harĩa hatheru. ²² Rĩrĩa ooimire, ndaahotire kũmaarĩria, nao makĩmenya atĩ nĩ oonete kĩoneki arĩ handũ harĩa hatheru. Agĩikara akĩmonagia na ciĩko na ndaahotaga kwaria. ²³ Na hĩndĩ ĩrĩa matukũ ma ũtungata wake mũtheru* maathirire, akĩinũka gwake mũciĩ. ²⁴ Matukũ manini thutha ũcio, Elizabethi mũtumia wake akĩgĩa nda, na agĩikara mĩeri ĩtano atekuuma mũciĩ, na ooigaga atĩrĩ: ²⁵ “Ũũ nĩguo Jehova* anjĩkĩire matukũ-inĩ maya. Nĩ andirikanĩte nĩguo anjehererie kĩnyũrũri kuuma kũrĩ andũ.”+ ²⁶ Na rĩrĩa Elizabethi aarĩ na nda ya mĩeri ĩtandatũ, mũraika Gaburieli+ agĩtũmwo nĩ Ngai itũũra rĩtagwo Nazarethi thĩinĩ wa Galili, ²⁷ kũrĩ mũirĩtu gathirange+ wetagwo Mariamu, ũrĩa warĩ na kĩrĩko gĩa kũhikania na mũndũ wetagwo Jusufu wa nyũmba ya Daudi.+ ²⁸ Na mũraika agĩtonya, akĩmũgeithia: “Ũrĩ mwega, wee mũrathime mũno, Jehova* arĩ hamwe nawe.” ²⁹ No nĩ aatangĩkire mũno nĩ ciugo icio cia mũraika ũcio na akĩgeria gwĩcũrania ngeithi icio nĩ cia mũthemba ũrĩkũ. ³⁰ Nĩ ũndũ ũcio mũraika akĩmwĩra ũũ: “Mariamu, ndũgetigĩre, tondũ nĩ wĩtĩkĩrĩkĩte nĩ Ngai. ³¹ Atĩrĩrĩ, nĩ ũkũgĩa nda* na ũciare mwana wa kahĩĩ,+ na ũkaamwĩta Jesu.+ ³² Ũcio agaakorũo arĩ mũnene+ na ageetwo Mũrũ wa Ũrĩa ũrĩ Igũrũ Mũno,+ na Jehova* Ngai nĩ akaamũhe gĩtĩ kĩa ũnene gĩa ithe Daudi,+ ³³ na nĩ agaatha nyũmba ya Jakubu arĩ Mũthamaki tene na tene, na Ũthamaki wake ndũgaakorũo na mũthia.”+ ³⁴ Nake Mariamu akĩũria mũraika atĩrĩ: “Ũndũ ũcio ũngĩhoteka atĩa, na ndirĩ ndakoma na mũndũrũme?”+ ³⁵ Mũraika akĩmũcokeria ũũ: “Roho mũtheru nĩ ũgũka igũrũ rĩaku,+ na hinya wa Ũrĩa ũrĩ Igũrũ Mũno nĩ ũgũkũhumbĩra. Na nĩ ũndũ ũcio ũrĩa ũgaaciarũo ageetwo mũtheru,+ Mũrũ wa Ngai.+ ³⁶ Atĩrĩrĩ, Elizabethi ũrĩa wa mbarĩ cianyu o nake nĩ ohete nda ya mwana wa kahĩĩ ũkũrũ-inĩ wake, na ũyũ nĩguo mweri wake wa gatandatũ, o we ũcio andũ metaga thata; ³⁷ tondũ gũtirĩ uuge* ũngĩrema Ngai.”+ ³⁸ Mariamu agĩcoka akiuga: “Niĩ-rĩ, ndĩ ngombo ya Jehova!* Reke gwĩkĩke harĩ niĩ kũringana na uuge waku.” Hĩndĩ ĩyo mũraika akĩmũtiga. ³⁹ Nĩ ũndũ ũcio matukũ-inĩ macio Mariamu akĩambĩrĩria rũgendo agĩthiĩ ahiũhĩte nginya itũũra-inĩ rĩmwe rĩa Juda, rĩrĩa rĩarĩ bũrũri-inĩ ũrĩ irĩma, ⁴⁰ akĩingĩra mũciĩ gwa Zekaria na akĩgeithia Elizabethi. ⁴¹ Na rĩrĩa Elizabethi aaiguire ngeithi cia Mariamu, kaana karĩa kaarĩ nda yake gakĩambarara, nake Elizabethi akĩiyũrũo nĩ roho mũtheru ⁴² na akĩanĩrĩra akiuga ũũ: “Kũrathimwo nĩwe gatagatĩ-inĩ ga atumia, na kũrathimwo nĩ kaana kau karĩ nda yaku! ⁴³ Gũthiĩte atĩa ngaheo gĩtĩo gĩkĩ kĩnene gĩa gũceererũo nĩ nyina wa Mwathani wakwa? ⁴⁴ Tondũ rĩrĩ, o hĩndĩ ĩyo ndaigua mũgambo wa ngeithi ciaku, kaana karĩa karĩ nda yakwa nĩ kaambarara nĩ gĩkeno. ⁴⁵ Na gũkena nĩ ũcio wetĩkirie, nĩ gũkorũo ũhoro ũrĩa eerirũo kuuma harĩ Jehova* nĩ ũkaahinga wothe.” ⁴⁶ Nake Mariamu akiuga: “Nĩ ndĩragooca Jehova,*+ ⁴⁷ na ngoro yakwa ĩgũikara ĩkenete mũno nĩ ũndũ wa Ngai Mũhonokia wakwa,+ ⁴⁸ tondũ nĩ aririkanĩte ũthĩni wa ngombo yake ya mũirĩtu.+ Na rĩrĩ, kuuma rĩu, njiarũa ciothe irĩnjĩtaga mũndũ mũkenu,+ ⁴⁹ nĩ gũkorũo Ũrĩa ũrĩ hinya nĩ anjĩkĩire maũndũ manene, na rĩĩtwa rĩake nĩ itheru,+ ⁵⁰ na nginya njiarũa na njiarũa tha ciake onagia arĩa mamwĩtigĩrĩte.+ ⁵¹ Nĩ ekĩte maũndũ manene na guoko gwake; nĩ ahurunjĩte arĩa mathugundaga ngoro-inĩ ciao maũndũ ma gwĩtũũgĩria.+ ⁵² Nĩ eheretie andũ arĩa marĩ hinya itĩ-inĩ cia ũnene+ na agatũũgĩria arĩa enyihia;+ ⁵³ arĩa ahũtu nĩ amahũnĩtie biũ na indo njega,+ nao arĩa atongu akamaingata marĩ moko matheri. ⁵⁴ Nĩ ateithĩtie Isiraeli ndungata yake, akaririkana tha ciake,+ ⁵⁵ o ta ũrĩa eerire maithe maitũ ma tene, Iburahimu na mbeũ yake*+ tene na tene.” ⁵⁶ Mariamu magĩikara na Elizabethi mĩeri ta ĩtatũ agĩcoka akĩinũka gwake mũciĩ. ⁵⁷ Na rĩrĩ, kahinda gagĩgĩkinya ka Elizabethi kũgĩa mwana, na agĩciara kahĩĩ. ⁵⁸ Nao andũ a itũũra rĩa kwao o na a mbarĩ ciao makĩigua atĩ Jehova* nĩ aamũingĩhĩirie tha ciake, nao magĩkena hamwe nake.+ ⁵⁹ Mũthenya wa kanana, magĩũka nĩguo maruithie kaana kau,+ na meendaga gũkahe rĩĩtwa rĩa ithe Zekaria. ⁶⁰ No nyina akĩmeera atĩrĩ: “Aca! gegwĩtwo Johana.” ⁶¹ Maigua ũguo makĩmwĩra: “Gũtakĩrĩ mũndũ o na ũmwe wa mbarĩ cianyu wĩtagwo ũguo.” ⁶² Magĩcoka makĩũria ithe wa kaana kau na ciĩko ũrĩa ekwenda getwo. ⁶³ Nake agĩtia kĩhengere akĩandĩka ũũ: “Johana nĩrĩo rĩĩtwa rĩako.”+ Mona ũguo othe makĩmaka. ⁶⁴ O hĩndĩ ĩyo, kanua gake gakĩhingũka na rũrĩmĩ rwake rũkĩregera, akĩambĩrĩria kwaria,+ akĩgoocaga Ngai. ⁶⁵ Nao arĩa othe maarĩ itũũra-inĩ rĩu makĩnyitwo nĩ guoya, na maũndũ macio mothe makĩambĩrĩria kwario bũrũri-inĩ ũcio wothe ũrĩ irĩma wa Judea. ⁶⁶ Na arĩa othe maaiguire ũhoro ũcio makĩũiga ngoro-inĩ ciao, makiuga: “Kaĩ kaana gaka gagatuĩka ũ?” Nĩ gũkorũo guoko kwa Jehova* kwarĩ hamwe nako. ⁶⁷ Nake ithe Zekaria, akĩiyũrũo nĩ roho mũtheru akĩratha ũhoro akiuga ũũ: ⁶⁸ “Jehova* Ngai wa Isiraeli arogoocwo,+ tondũ nĩ aririkanĩte andũ ake na akamarehera ũhonokio.+ ⁶⁹ Na nĩ atwarahũrĩire rũhĩa rwa ũhonokio*+ thĩinĩ wa nyũmba ya Daudi ndungata yake,+ ⁷⁰ o ta ũrĩa arĩtie kũgerera anabii ake aamũre a kuuma tene+ ⁷¹ ũhoro wĩgiĩ gũtũhonokia kuuma kũrĩ thũ citũ na kuuma guoko-inĩ kwa arĩa othe matũmenete;+ ⁷² gũtuonia tha nĩ ũndũ wa maithe maitũ ma tene na kũririkana kĩrĩkanĩro gĩake gĩtheru,+ ⁷³ kĩrĩa eerĩire Iburahimu ithe witũ wa tene na mwĩhĩtwa,+ ⁷⁴ atĩ thutha wa gũtũhonokia kuuma moko-inĩ ma thũ, nĩ agaatũhe gĩtĩo gĩa kũmũrutĩra ũtungata mũtheru tũtarĩ na guoya ⁷⁵ tũrĩ na wĩhokeku na ũthingu mbere yake matukũ maitũ mothe. ⁷⁶ No wee kaana gaka, nĩ ũgeetwo mũnabii wa Ũrĩa ũrĩ Igũrũ Mũno, tondũ nĩ ũgaathiĩ mbere ya Jehova* nĩguo ũhaarĩrie njĩra ciake,+ ⁷⁷ ũmenyithie andũ ake ũhoro wĩgiĩ kũhonokio na njĩra ya kuoherũo mehia mao,+ ⁷⁸ nĩ ũndũ wa ũcayanĩri mũingĩ wa Ngai witũ. Tondũ wa ũcayanĩri ũcio, ũtheri nĩ ũgooka kũrĩ ithuĩ uumĩte igũrũ, ⁷⁹ warĩre arĩa maikaraga nduma-inĩ na kĩĩruru-inĩ gĩa gĩkuũ+ na ũtongorie makinya maitũ njĩra-inĩ ya thayũ.” ⁸⁰ Nake mwana ũcio agĩkũra na akĩgĩa na hinya wa kĩĩroho, na agĩikara werũ-inĩ o nginya mũthenya ũrĩa eeyonithanirie kũrĩ andũ a Isiraeli.