ICA IKUHĨ ANDŨ NĨ MAKORETWO MAGĨKA ŨTHUTHURIA MŨNO IGŨRŨ RĨGIĨ RUO RŨRĨA ANDŨ MAIGUAGA RĨRĨA MAKUĨRŨO NĨ MŨNDŨ MENDETE. Ĩndĩ o ta ũrĩa icunjĩ icio ingĩ cionanĩtie, ũtaaro ũrĩa mwega biũ ataaramu maheanaga, kaingĩ nĩ ũtwaranaga na maũndũ marĩa maandĩkirũo tene thĩinĩ wa Bibilia. Ũndũ ũcio nĩ wonanagia wega atĩ ũtaaro wa Bibilia ndũhĩtũkagwo nĩ mahinda. O na kũrĩ ũguo, Bibilia to ũtaaro tu ĩheanaga. Nĩ ĩkoragwo na ũhoro ũtangĩoneka handũ hangĩ o hothe, ũrĩa ũmagĩrĩria na njĩra nene arĩa makuĩrĩirũo.

• Bibilia nĩ ĩtũheaga ũũma atĩ endwa aitũ arĩa makuĩte matiranyamarĩka

  Bibilia yugaga ũũ thĩinĩ wa Kohelethu 9:5: “Arĩa makuĩte gũtirĩ ũndũ moĩ.” ‘Meciria mao nĩ gũthira’ mathiraga. (Thaburi 146:4) Nĩkĩo Bibilia ĩringithanagia gĩkuũ na toro mũnene.—Johana 11:11.

• Gũkorũo na wĩtĩkio mũrũmu atĩ Ngai nĩ atwendete no gũtũũmĩrĩrie

  Bibilia yugaga ũũ thĩinĩ wa Thaburi 34:15: “Maitho ma Jehova * nĩ maroraga andũ arĩa athingu, na matũ make nĩ mathikagĩrĩria kĩrĩro kĩao gĩa kũhoya ũteithio.” Kwĩra Ngai ũrĩa tũraigua kũgerera mahoya, to njĩra tu ya gũtũma tũigue wega kana ya gũtũteithia gũcokanĩrĩria meciria maitũ. Nĩ gũtũteithagia gũkorũo na ũrata wa hakuhĩ hamwe na Mũũmbi witũ, ũrĩa ũkoragwo na ũhoti wa kũhũthĩra hinya wake gũtũũmĩrĩria.

• Bibilia nĩ ĩtũheaga kĩĩrĩgĩrĩro kĩega kĩa ihinda rĩũkĩte

  Ta hũũra mbica ihinda rĩrĩa andũ arĩa marĩ thĩinĩ wa mbĩrĩra magaacokio muoyo gũkũ thĩ! Bibilia nĩ ĩkoragwo na maandĩko maingĩ monanagia atĩ nĩ gũgaakorũo na ihinda ta rĩu. Nĩ ĩtaaragĩria maũndũ marĩa Ngai ageekĩra andũ thĩinĩ wa thĩ hĩndĩ ĩyo ĩkauga atĩ “nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.”—Kũguũrĩrio 21:3, 4.

Andũ aingĩ arĩa metĩkĩtie Jehova, Ngai ũrĩa waandĩkithirie Bibilia, nĩ mahotaga kũhiũrania na kĩeha nĩ ũndũ wa kwĩhoka kĩĩrĩgĩrĩro gĩa gũkoona endwa ao arĩa makuĩte. Kwa ngerekano, Ann, ũrĩa wakuĩrĩirũo nĩ mũthuri wake ũrĩa maahikanĩtie mĩaka 65 aaugire ũũ: “Bibilia nĩ ĩheaga ũũma atĩ endwa aitũ arĩa makuĩte matiranyamarĩka na atĩ Ngai nĩ akaariũkia arĩa othe marĩ kĩririkano-inĩ gĩake. Nĩ ndĩririkanagia maũndũ macio rĩrĩa ndeciria ũhoro wa gĩkuũ kĩa mũthuri wakwa, na kwoguo ngahota kũhiũrania na ũndũ ũcio mũritũ mũno wanekĩka ũtũũro-inĩ wakwa.”

Nake Tiina, ũrĩa ũgwetetwo gĩcunjĩ-inĩ kĩngĩ ngathĩti-inĩ ĩno, aaugire ũũ: “Kuuma mũthenya ũrĩa Timo aakuire, nĩ ndĩyoneire ũteithio wa Ngai. Nĩ njiguaga Jehova akĩndeithia rĩrĩa ndĩ na mĩtangĩko. Na nĩ ngoragwo njĩtĩkĩtie biũ kĩĩranĩro gĩa kũriũka. Nĩ kĩheaga hinya wa gũthiĩ na mbere nginya mũthenya ũrĩa ngona Timo rĩngĩ.”

Ciugo icio ironania ũrĩa andũ milioni nyingĩ maiguaga, arĩa makoragwo mehokete Bibilia biũ. Angĩkorũo wonaga ta maũndũ marĩa magwetetwo Bibilia-inĩ marĩ iroto, nĩ wagĩrĩirũo gũthuthuria ũira ũrĩa wonanagia atĩ ũtaaro wayo na ciĩranĩro ciayo nĩ cia kwĩhokeka. Wahota kuona atĩ Bibilia nĩyo ũteithio ũrĩa mwega biũ harĩ arĩa makuĩrĩirũo.

Wĩrorere video iria ihutanĩtie na ũndũ ũcio thĩinĩ wa website itũ ya jw.org

 AKUŨ MATARIĨ ATĨA?

HIHI NO WENDE KŨIGUA ŨHORO MWEGA?