“Kĩheo o gĩothe kĩega na gĩkinyanĩru kiumaga igũrũ, gĩgaikũrũka kiumĩte kũrĩ Ithe wa motheri ma igũrũ.” (Jakubu 1:17) Hatarĩ nganja, rĩandĩko rĩu rĩraarĩrĩria ũhoro wa ũtugi wa Ithe witũ wa igũrũ, Jehova Ngai. O na kũrĩ ũguo, harĩ iheo iria ciothe Ngai aheete andũ, nĩ harĩ kĩmwe kĩega makĩria. Nĩ kĩrĩkũ kĩu? Ciugo cia Jesu iria ciũĩkaine wega thĩinĩ wa Johana 3:16, itwĩraga ũũ: “Nĩ gũkorũo Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.”

Kĩheo kĩa Mũrũ wa Ngai wa mũmwe nĩkĩo kĩheo kĩrĩa kĩa goro mũno mũndũ o wothe angĩamũkĩra, tondũ no tũkũũrũo kuuma ũkombo-inĩ wa mehia, ũkũrũ, na gĩkuũ. (Thaburi 51:5; Johana 8:34) O na tũngĩgeria atĩa, tũtingĩhota gwĩkũũra kuuma ũkombo-inĩ ũcio. O na kũrĩ ũguo, nĩ ũndũ wa wendo mũnene wa Ngai gũtwerekera, nĩ aaheanire kĩrĩa kĩngĩtũkũũra. Hĩndĩ ĩrĩa aarutire Mũrũ wake wa mũmwe Jesu Kristo arĩ igongona kana ũkũũri, Jehova Ngai nĩ aaheire andũ arĩa aathĩki kĩĩrĩgĩrĩro kĩa muoyo wa tene na tene. No ũkũũri nĩ kĩĩ? Nĩ wa bata nĩkĩ? Na ũngĩtũguna atĩa?

Ũkũũri nĩ irĩhi rĩrĩa rĩrĩhagwo gũkũũra mũndũ ũnyitĩtwo mĩgwate kana kĩndũ gĩtahĩtwo. Bibilia ĩtaaragĩria atĩ aciari aitũ a mbere, Adamu na Hawa, moombĩtwo matarĩ na mehia, marĩ na kĩĩrĩgĩrĩro gĩa gũkenera ũtũũro tene na tene thĩinĩ wa paradiso gũkũ thĩ hamwe na njiarũa ciao. (Kĩambĩrĩria 1:26-28) Ũndũ wa kĩeha nĩ atĩ, nĩ morirũo nĩ maũndũ macio mothe rĩrĩa maathurire kũremera Ngai na magĩtuĩka ehia. Moimĩrĩro maarĩ marĩkũ? Bibilia ĩcokagia ũũ: “Kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe tondũ nĩ meehĩtie othe.” (Aroma 5:12) Handũ ha Adamu gũtũma ciana ciake ikorũo na muoyo mũkinyanĩru, aacireheire mehia na gĩkuũ.

Ũhoro-inĩ wĩgiĩ ũkũũri, no mũhaka kĩrĩa gĩkũrĩhwo gĩkorũo kĩringaine biũ na kĩrĩa kĩũrĩte. Rĩrĩa Adamu aaremeire Ngai akĩendaga, nĩ aagĩire na mehia na akĩũrũo nĩ muoyo wake mũkinyanĩru. Bibilia yugaga atĩ ũndũ ũcio watũmire njiarũa ciake cingĩre ũkombo-inĩ wa mehia na gĩkuũ. Nĩ kwabataranirie mũndũ ũngĩ mũkinyanĩru, Jesu, arute muoyo wake ũrĩ igongona nĩguo tũhote gũkũũrũo kuuma ũkombo-inĩ ũcio. (Aroma 5:19; Aefeso 1:7) Tondũ Ngai nĩ aarutire igongona rĩa ũkũũri eyendeire, andũ marĩ na kĩĩrĩgĩrĩro gĩa gũgaatũũra thĩinĩ wa paradiso ĩrĩa Adamu na Hawa maateire.—Kũguũrĩrio 21:3-5.

Tũtirĩ na nganja atĩ kĩheo kĩrĩa Ngai aaheanire kĩa ũkũũri kĩrĩa gĩtũmaga tũkoona muoyo wa tene na tene, nĩkĩo kĩheo kĩrĩa kĩega makĩria. Nĩguo tuonanie ngatho citũ nĩ ũndũ wa ‘kĩheo kĩu kĩega,’ rekei tuone ũrĩa kĩhotaga kũhingia na njĩra nene maũndũ marĩa matũteithagia kuona iheo irĩ cia bata.

Kũhingia merirĩria maitũ. Ithuothe tũmbĩtwo tũrĩ na merirĩria ma gũtũũra tene na tene. O na gũtuĩka tũtingĩhota kwĩhingĩria merirĩria macio, igongona rĩa Jesu nĩ rĩtũmaga tũhote kũmahingia.  Bibilia yugaga ũũ: “Nĩ gũkorũo mũcara wa mehia nĩ gĩkuũ, no kĩheo kĩrĩa Ngai aheanaga nĩ muoyo wa tene na tene kũgerera Kristo Jesu Mwathani witũ.”—Aroma 6:23.

Gũtũhingĩria mabataro. Andũ matingĩahotire kũruta ũkũũri. Bibilia yugaga: “Nĩ gũkorwo irĩhi rĩa muoyo wa mũndũ nĩ rĩnene mũno. Kĩrĩa mũndũ angĩheana gĩtingĩigana o na atĩa.” (Thaburi 49:8, The Holy Bible in Gĩkũyũ) Kwoguo, nĩguo tũkũũrũo kuuma ũkombo-inĩ wa mehia na gĩkuũ, nĩ twabataraga ũteithio kuuma kũrĩ Ngai. No “nĩ ũndũ wa thogora ũrĩa Kristo Jesu aarĩhire,” Ngai nĩ aaheanire kĩrĩa kĩabataranagia.—Aroma 3:23, 24.

Ihinda rĩrĩa rĩagĩrĩire. Bibilia ĩtwĩraga: “Hĩndĩ ĩrĩa twarĩ ehia, Kristo nĩ aakuire nĩ ũndũ witũ.” (Aroma 5:8) Tondũ igongona rĩu rĩarutirũo “hĩndĩ ĩrĩa twarĩ ehia,” nĩ rĩtũmaga tuone ũrĩa Ngai atwendete o na tũrĩ ehia. Ningĩ nĩ rĩtũmaga twĩrĩgĩrĩre maũndũ mangĩ maingĩ, o na gũtuĩka no mũhaka tũhiũranie na moimĩrĩro ma mehia.

Kuonania mwerekera mwega na ũtarĩ wa mwĩyendo. Bibilia nĩ ĩtwĩraga kĩrĩa gĩatũmire Ngai arute Mũrũ wake arĩ igongona: “Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe gũkũ thĩ nĩguo tũgĩe na muoyo kũgerera harĩ we. Wendo ũcio ũtariĩ ũũ, ti atĩ nĩ ithuĩ tweendire Ngai, no nĩwe watwendire.”—1 Johana 4:9, 10.

Ũngĩonania ngatho atĩa nĩ ũndũ wa kĩheo kĩu kĩega makĩria? Ririkana ciugo cia Jesu thĩinĩ wa Johana 3:16 harĩa oigire atĩ no arĩa ‘marĩonanagia wĩtĩkio’ harĩ we makaahonokio. Kũringana na Bibilia wĩtĩkio nĩ “gũkorũo na kĩĩrĩgĩrĩro kĩa ma kĩa maũndũ marĩa matanyĩtwo.” (Ahibirania 11:1) Nĩguo tũgĩe na ũũma na kĩĩrĩgĩrĩro kĩu, ũũgĩ ũrĩa wa ma nĩ ũbataranagia. Nĩ ũndũ ũcio, tũragwĩkĩra ngoro ũthome igũrũ rĩgiĩ Jehova Ngai mũheani wa ‘kĩheo kĩu kĩega,’ na wone ũrĩa wagĩrĩire gwĩka nĩguo ũgaakenera muoyo wa tene na tene ũrĩa igongona rĩu rĩa Jesu rĩhotithĩtie nĩ ũndũ waku.

No ũthome maũndũ macio mothe ũngĩthuthuria ũhoro uumĩte Maandĩko-inĩ ũrĩa ũrĩ thĩinĩ wa www.mr1310.com/ki. Aira a Jehova nĩ megũkena gũgũteithia. Tũrĩ na ma atĩ o ũrĩa ũkwĩruta maũndũ macio nĩguo ũgunĩke nĩ ũndũ wa kĩheo kĩu kĩnene, nĩ ũkũhota kuuga ũũ: “Ndĩracokeria Ngai ngatho kũgerera harĩ Jesu Kristo Mwathani witũ!”—Aroma 7:25.