JUSUFU WA ARIMATHEA ndaamenyire ũrĩa aagĩire na ũmĩrĩru wa gũthiĩ kũrĩ ngavana ũmwe wa Roma. Pontio Pilato nĩ oĩkaine gũkorũo arĩ mũndũ ũtaaiguithĩkaga na ihenya. No nĩguo Jesu athikwo na njĩra ya gĩtĩo, nĩ hangĩabataranirie mũndũ wa gũthiĩ kũũria Pilato arekererie mwĩrĩ ũcio. Ta ũrĩa gwacokire gũthiĩ, kuonana na Pilato gũtiarĩ ũndũ mũritũ ũrĩa Jusufu hihi angĩkorũo eeciragia. Thutha wa Pilato gũtuĩria kuuma kũrĩ mũthigari kana Jesu nĩ aakuĩte, nĩ eetĩkĩririe Jusufu oe mwĩrĩ wa Jesu. Nĩ ũndũ ũcio, o na gũtuĩka Jusufu aarĩ o na kĩeha, oimire hau ahiũhĩte agĩthiĩ harĩa Jesu oragĩirũo.—Mar. 15:42-45.

• Jusufu wa Arimathea aarĩ ũũ?

• Aarĩ na ũkuruhanu ũrĩkũ na Jesu?

• Na nĩkĩ nĩ ũndũ mwega ũthuthurie rũgano rwake?

Injiri ya Mariko ĩtaga Jusufu mũndũ “waheetwo gĩtĩo mũno thĩinĩ wa Sanhedrini,” ĩrĩa yarĩ igooti inene rĩa Ayahudi. (Mar. 15:1, 43) Kwoguo, Jusufu aarĩ ũmwe wa atongoria, na ũndũ ũcio nĩ wonanagia kĩrĩa kĩamũhotithirie kwaria na ngavana wa Roma. Ningĩ ũndũ ũcio nĩ ũronania gĩtũmi kĩa Jusufu gũkorũo arĩ mũtongu.—Mat. 27:57.

Kĩama gĩa Sanhedrini nĩ gĩathũire Jesu. Arĩa maarĩ kĩama-inĩ kĩu maabangire njama ya ũrĩa ekũragwo. No Jusufu etĩtwo mũndũ “warĩ mwega na mũthingu.” (Luk. 23:50) Ngũrani na andũ angĩ arĩa maarĩ nao kĩama-inĩ kĩu gĩa Sanhedrini, Jusufu aaikaraga ũtũũro ũtaarĩ wa ũhinga, aarĩ na mĩthiĩre mĩega, na nĩ eekaga ũrĩa wothe angĩahotire nĩguo athĩkĩre Ngai. Ningĩ no “eetereire Ũthamaki wa Ngai” na ũndũ ũcio no ũtaarĩrie kĩrĩa gĩatũmire atuĩke mũrutwo wa Jesu. (Mar. 15:43; Mat. 27:57) No kũhoteke aagucĩrĩirio nĩ ndũmĩrĩri ya Jesu nĩ ũndũ nĩ eendete ma na kĩhooto.

Rĩandĩko rĩa Johana 19:38 riugaga atĩ Jusufu aarĩ “mũrutwo wa Jesu na hitho nĩ ũndũ wa gwĩtigĩra Ayahudi.” Nĩ kĩĩ eetigagĩra? Nĩ aamenyaga ũrĩa Ayahudi maanyararĩte Jesu na ũrĩa maatuĩte itua rĩa kũingata mũndũ o wothe ũngĩoimbũrire atĩ nĩ aamwĩtĩkĩtie, kuuma thunagogi-inĩ. (Joh. 7:45-49; 9:22) Mũndũ waingatagwo kuuma thunagogi-inĩ eethemagwo, akanyũrũrio, na akonwo ta atarĩ Mũyahudi nĩ Ayahudi arĩa angĩ. Nĩ ũndũ ũcio Jusufu nĩ eetigagĩra kuumbũra mbere ya andũ atĩ nĩ eetĩkĩtie Jesu. Gwĩka ũguo kũngĩatũmire orũo nĩ gaturũa karĩa aarĩ nako na gĩtĩo kĩrĩa aaheagwo.

Jusufu towe tu wacemanagia na ũndũ ta ũcio. Johana 12:42 yonanagia atĩ, “nginya atongoria aingĩ nĩ [meetĩkirie Jesu] no nĩ ũndũ wa Afarisai, matiamumbũraga nĩguo matikaingatwo thunagogi-inĩ.” Mũndũ ũngĩ warĩ thĩna-inĩ ta ũcio nĩ Nikodemo, ũrĩa o nake warĩ ũmwe wa Sanhedrini.—Joh. 3:1-10; 7:50-52.

No Jusufu aarĩ mũrutwo, ĩndĩ ndangĩahotire kwĩyumbũra mbere ya andũ. Ũndũ ũcio warĩ thĩna mũnene, makĩria nĩ ũndũ wa ciugo ici Jesu oigire: “Mũndũ ũrĩa wothe ũnyumbũraga mbere ya andũ, o na niĩ nĩ ngamumbũra mbere ya Awa ũrĩa ũrĩ igũrũ. No mũndũ wothe ũkangaana mbere ya andũ, o na niĩ nĩ ngamũkaana mbere ya Awa ũrĩa ũrĩ igũrũ.” (Mat. 10:32, 33) Jusufu ti gũkaana aakaanaga Jesu, no nĩ ũmĩrĩru wa kũmumbũra aagaga. Hihi wee nĩ ũkoragwo na ũmĩrĩru ũcio?

No nĩ harĩ ũndũ mwega Jusufu eekire tondũ Bibilia nĩ yugaga atĩ ndaanyitire mbaru njama ĩrĩa Sanhedrini maabangagĩra Jesu. (Luk. 23:51) Kwahoteka, ta ũrĩa andũ amwe moigaga, Jusufu ndaarĩ ho  Jesu agĩcirithio. O ũrĩa kũngĩkorũo kwarĩ, Jusufu nĩ aaiguire ũũru mũno nĩ ũndũ wa wagi ũcio wa kĩhooto, no ndangĩahotire kũũgirĩrĩria!

Gũkinyĩria rĩrĩa Jesu aakuire, Jusufu nĩ aatoretie guoya wake, na agatua itua rĩa kũnyita mbaru arũmĩrĩri a Jesu. Itua rĩu rĩonanĩtio nĩ ciugo ici irĩ thĩinĩ wa Mariko 15:43: “Akĩingĩra kũrĩ Pilato ategwĩtigĩra na akĩhoya anengerũo mwĩrĩ wa Jesu.”

Kuonekaga Jusufu aarĩ ho rĩrĩa Jesu aakuire. O na aamenyire mbere ya Pilato atĩ Jesu nĩ aakuĩte. Nĩkĩo rĩrĩa Jusufu oririe anengerũo mwĩrĩ, ngavana ũcio “ndaamenyaga kana Jesu nĩ akuĩte.” (Mar. 15:44) Angĩkorũo nĩ eeyoneire ruo rũrĩa Jesu aarĩ naruo mũtĩ-inĩ-rĩ, hihi ũndũ ũcio nĩguo watũmire athuthurie thamiri yake na akinyĩre gũtua itua atĩ agĩrĩire kũrũgama na ũhoro wa ma? No kũhoteke. Gũtingĩaga gũkorũo atĩ ũndũ ũcio nĩ wahutirie Jusufu na akĩoya ikinya. Ndangĩathiire na mbere gũkorũo arĩ mũrutwo wa hitho rĩngĩ.

Watho wa Ayahudi woigĩte atĩ, arĩa maatuagĩrũo kũũragwo maagĩrĩirũo gũthikwo mbere ya riũa rĩthũĩte. (Gũcok. 21:22, 23) No harĩ Aroma, mĩĩrĩ ya arĩa maatuagĩrũo kũũragwo yatigagwo mĩtĩ-inĩ ĩbuthĩre ho kana ĩgathikwo hamwe. No ũguo tiguo Jusufu eendaga hathiĩ harĩ Jesu. Jusufu aarĩ na mbĩrĩra yakoretwo yenjwo ihiga-inĩ hakuhĩ na harĩa Jesu oragĩirũo. Mbĩrĩra ĩyo ndĩakoretwo ĩhũthĩrĩtwo mbere ĩyo, ũndũ ũrĩa wonanagia atĩ Jusufu aakoretwo  athama kuuma Arimathea * agathiĩ Jerusalemu na eerĩgagĩrĩra kũmĩhũthagĩra ĩthikagwo andũ a famĩlĩ yake. (Luk. 23:53; Joh. 19:41) Jusufu onanirie ũtana nĩ ũndũ wa gũthika Jesu harĩa we mwene angĩathikirũo na akĩhingia ũrathi ũrĩa wonanĩtie atĩ Mesia angĩathikirũo hamwe na “andũ itonga.”—Isa. 53:5, 8, 9.

Andĩki othe ana a Injiri nĩ moigĩte atĩ thutha wa mwĩrĩ wa Jesu kũrutwo mũtĩ-inĩ, Jusufu aawoire akĩũthaya na gĩtambaya kĩega gĩa gatani na akĩũkomia mbĩrĩra-inĩ yake. (Mat. 27:59-61; Mar. 15:46, 47; Luk. 23:53, 55; Joh. 19:38-40) Mũndũ ũrĩa tu ũgwetetwo atĩ nĩ aateithirie Jusufu nĩ Nikodemo, ũrĩa warehire mũtukanio wa manemane na mĩtĩ mĩnungi wega, indo iria ciahũthagĩrũo mũndũ agĩthikwo. Tondũ arũme acio erĩ maarĩ andũ marĩ igweta, kwahoteka ti o maakuuire mwĩrĩ ũcio. Kũrĩ na ũhotekeku mũnene atĩ nĩ mangĩahũthĩrire ndungata ciao gũkuua mwĩrĩ ũcio na kũũthika. O na angĩkorũo nĩguo meekire, wĩra ũrĩa athuri acio erĩ maarutire ndwarĩ mũnini. Mũndũ o wothe wahutanagia na kĩimba aakoragwo atarĩ mũtheru ihinda rĩa thikũ mũgwanja na kĩrĩa gĩothe angĩahutirie o nakĩo gĩgakorũo gĩtarĩ gĩtheru. (Ndar. 19:11; Hag. 2:13) Mũndũ ta ũcio ndangĩanyitanĩire na arĩa angĩ magĩkũngũĩra pasaka na maũndũ marĩa mangĩ mothe maahutanĩtie nayo. (Ndar. 9:6) Ningĩ Jusufu nĩ angĩanyũrũririo nĩ arĩa angĩ a kĩama gĩa Sanhedrini nĩ ũndũ wa kũbanga Jesu athikwo. No gũkinyĩria ihinda-inĩ rĩrĩ, nĩ eehaarĩirie gwĩtĩkĩra o ũrĩa wothe kũngĩathire nĩ ũndũ wa gũthika Jesu na njĩra ya gĩtĩo na kwĩmenyithania atĩ aarĩ ũmwe wa arutwo a Kristo.

Thutha wa Jesu gũthikwo, Jusufu wa Arimathea ndagwetetwo handũ hangĩ thĩinĩ wa Bibilia na ũndũ ũcio ũkoimĩria kĩũria gĩkĩ: Gwathire atĩa harĩ we? Ũrĩa kũrĩ nĩ atĩ tũtiũĩ. No kũringana na maũndũ marĩa twarĩrĩria, kũrĩ na ũhotekeku mũnene atĩ nĩ eemenyithanirie atĩ aarĩ Mũkristiano. Makĩria ma ũguo, rĩrĩa aacemanirie na magerio na moritũ, wĩtĩkio na ũmĩrĩru wake wathiaga na mbere kuongerereka handũ ha kũnyiha. Ũndũ ũcio wonanagia kaũndũ kega kegiĩ Jusufu.

Rũgano rũrũ rumĩragia kĩũria gĩkĩ ithuothe twagĩrĩirũo nĩ gwĩciria: Hihi nĩ kũrĩ kĩndũ o na kĩĩ—mweke tũrĩ naguo, wĩra, indo citũ, wendo witũ harĩ andũ a famĩlĩ, o na kana wĩyathi witũ—twagĩrĩirũo kũiga mbere ya ũkuruhanu witũ na Jehova?