KUUMA NGOTHI-INĨ | NGAI ONAGA MBAARA ATĨA?
Mawoni ma Ngai Megiĩ Mbaara Hĩndĩ ya Karine ya Mbere
Andũ nĩ maahinyagĩrĩrio. O ta maguka mao, Ayahudi a karine ya mbere nĩ maahoyaga Ngai kaingĩ nĩguo mahonokio kuumana na Ũthamaki wa Roma tondũ nĩ wamahinyagĩrĩria. Nĩ maacokire makĩigua ũhoro wa Jesu. Hihi nĩ angĩonanirie atĩ nĩwe Mesia ũrĩa weranĩirũo? Kwoguo, andũ aingĩ nĩ ‘meerĩgĩrĩire atĩ nĩwe ũgakũũra Aisiraeli’ kuumana na ũhinyanĩrĩria wa Roma. (Luka 24:21) No matiahonokirio. Ithenya rĩa ũguo, mwaka-inĩ wa 70, thigari cia Roma nĩ cianangire Jerusalemu na hekarũ ĩrĩa yarĩ kuo.
Gwathire ũguo nĩkĩ? Ngai aagire kũrũĩrĩra Ayahudi o ta ũrĩa eekĩte mahinda mahĩtũku nĩkĩ? Kana aagire kũmeera marũe nĩkĩ nĩguo mehonokie? Hihi mawoni ma Ngai megiĩ mbaara nĩ maacenjetie? Aca. No harĩ ũndũ wagarũrũkĩte harĩ Ayahudi. Nĩ maaregete Mũrũ wa Ngai, Jesu, arĩ Mesia. (Atũmwo 2:36) Nĩ ũndũ ũcio, marĩ rũrĩrĩ, nĩ maateire ũkuruhanu wa mwanya ũrĩa maarĩ naguo na Ngai.—Mathayo 23:37, 38.
Ngai ndaagitagĩra rũrĩrĩ rwa Ayahudi o hamwe na Bũrũri wa Kĩĩranĩro ta ũrĩa eekaga hau kabere, na ndametĩkagĩria kana akamanyita mbaru mbaara-inĩ. O ta ũrĩa Jesu aarathĩte, Ayahudi nĩ meehereirio irathimo iria cioimanaga na gwĩtĩkĩrĩka nĩ Ngai, na ikĩheo rũrĩrĩ rwerũ, rũrĩrĩ rwa kĩĩroho, rũrĩa Bibilia ĩtaga “Aisiraeli arĩa a Ngai.” (Agalatia 6:16; Mathayo 21:43) Kĩũngano kĩa Akristiano aitĩrĩrie maguta nĩ kĩoonanirie wega atĩ nĩkĩo Aisiraeli a kĩĩroho a Ngai. Hĩndĩ ya karine ya mbere, meerirũo ũũ: ‘Rĩu mwĩ rũrĩrĩ rwa Ngai.’—1 Petero 2:9, 10.
Tondũ Akristiano a karine ya mbere nĩ maatuĩkĩte ‘rũrĩrĩ rwa Ngai-rĩ,’ hihi Ngai nĩ aamarũĩrĩire nĩguo amahonokie kuumana na ũhinyanĩrĩria wa Roma? Kana hihi nĩ aamerire marũe na andũ acio maamahinyagĩrĩria? Aca, tiguo aameerire. Nĩkĩ hihi? Mbaara iria Ngai athaga andũ marũe, nĩwe ugaga rĩrĩa ikũrũo, o ta ũrĩa gĩcunjĩ kĩu kĩngĩ kĩonania. Ngai ndaarũaga mbaara nĩ ũndũ wa Akristiano a karine ya mbere, o na ndaamathaga meingĩrie mbaara-inĩ. Hatarĩ nganja, hĩndĩ ya karine ya mbere, rĩtiarĩ ihinda rĩa Ngai rĩa kũrũa nĩ ũndũ wa waganu na ũhinyanĩrĩria.
Kwoguo, o ta ndungata cia Ngai cia mahinda ma tene, Akristiano a karine ya mbere maagĩrĩirũo nĩ gweterera nginya ihinda rĩa Ngai rĩkinye rĩa kũniina waganu na ũhinyanĩrĩria. Hĩndĩ ĩyo, Ngai ndaametĩkĩrĩtie kũrũa na thũ ciao. Jesu Kristo nĩ onanirie ũndũ ũcio wega kũgerera morutani make. Kwa ngerekano, ndeerire arũmĩrĩri ake marũage mbaara, ithenya rĩa ũguo aameerire ũũ: “Endagai andũ arĩa marĩ muku na inyuĩ, na mũhoyagĩre arĩa mamũnyariraga.” (Mathayo 5:44) Akĩratha ũhoro wa ihinda rĩrĩa Jerusalemu ya hĩndĩ ya karine ya mbere ingĩatharĩkĩirũo nĩ thigari cia Roma, Jesu aataarire arutwo ake matikarũe no more—na ũguo nĩguo meekire.—Luka 21:20, 21.
Makĩria ma ũguo, agĩtongorio nĩ roho mũtheru, Paulo aandĩkire ũũ: “Mũtikanerĩhĩrie, . . . nĩ gũkorũo nĩ haandĩke atĩrĩ, Kũrĩhanĩria nĩ ũhoro wakwa, niĩ nĩ niĩ ngarĩhania; ũguo nĩguo Mwathani ekuuga.” (Aroma 12:19) Paulo aacokagĩra ũndũ Ngai oigĩte mĩaka magana maigana ũna mbere ĩyo thĩinĩ wa Maũndũ ma Alawii 19:18 na Gũcokerithia Maathani 32:35. Ta ũrĩa tuonire thĩinĩ wa gĩcunjĩ kĩu kĩngĩ, njĩra ĩmwe Ngai aarĩhagĩria andũ ake nayo mahinda-inĩ ma tene nĩ kũmateithia makĩrũa na thũ ciao. Kwoguo ciugo cia Paulo ironania atĩ mawoni ma Ngai megiĩ mbaara matiacenjetie. Hĩndĩ ya karine ya mbere, Ngai no onaga mbaara ĩrĩ njĩra ĩtĩkĩrĩkĩte ya kũniina maũndũ ma kũhinyanĩrĩria o na waganu. O na kũrĩ ũguo, o ta mahinda ma tene, no Ngai wiki warĩ na kĩhooto gĩa kuuga rĩrĩa mbaara ta icio ikũrũo na nũ ũkũrũa.
Ma nĩ atĩ, Ngai ndaathĩte Akristiano a karine ya mbere marũe mbaara. Ĩ ũmũthĩ? Hihi ũmũthĩ nĩ harĩ gĩkundi kĩa andũ Ngai aathĩte kĩrũe mbaara? Kana hihi rĩrĩ nĩrĩo ihinda rĩa Ngai rĩa kuoya ikinya nĩguo arũĩrĩre ndungata ciake? Ngai onaga mbaara atĩa ũmũthĩ? Gĩcunjĩ gĩkĩ kĩrũmĩrĩire nĩ gĩgũcokia ciũria icio.
