Adamu na Hawa nĩo maarĩ andũ a mbere kwĩhia. Rĩrĩa maaregire gwathĩkĩra Ngai, makĩrĩa maciaro ma “mũtĩ wa kũmenyithania wega na ũũru,” meekire mehia marĩa andũ aingĩ metaga mehia ma kĩambĩrĩria. a (Kĩambĩrĩria 2:16, 17; 3:6; Aroma 5:19) Adamu na Hawa matietĩkĩrĩtio kũrĩa maciaro ma mũtĩ ũcio tondũ warũgamagĩrĩra ũnene wa Ngai, kana kĩhooto gĩake gĩa kwĩra andũ ũndũ ũrĩa wagĩrĩire na ũrĩa ũtagĩrĩire. Rĩrĩa Adamu na Hawa maarĩire maciaro ma mũtĩ ũcio meethuurĩire itua rĩa gwĩtuagĩra o ene ũndũ ũrĩa wagĩrĩire na ũrĩa ũtagĩrĩire. Rĩrĩa meekire ũguo, nĩ maareganire na kĩhooto kĩa Ngai gĩa gũtuaga wega na ũũru.

•  Hihi “mehia ma kĩambĩrĩria” maahutirie Adamu na Hawa atĩa?

•  “Mehia ma kĩambĩrĩria” matũhutagia atĩa?

•  Hihi no tũkũũrũo ũkombo-inĩ wa moimĩrĩro ma “mehia ma kĩambĩrĩria”?

•  Ũrĩa andũ amwe metĩkĩtie igũrũ rĩgiĩ “mehia ma kĩambĩrĩria”

 Tondũ nĩ meehirie, Adamu na Hawa nĩ maakũrire na mũthia-inĩ magĩkua. Maathũkirie ũrata wao hamwe na Ngai na magĩte kĩĩrĩgĩrĩro gĩa gũgaatũũra tene na tene marĩ na ũgima mũkinyanĩru wa mwĩrĩ.—Kĩambĩrĩria 3:19.

 Njiarũa ciothe cia Adamu na Hawa nĩ ciagaire kwaga gũkinyanĩra kuuma harĩ o. No ta ũrĩa ciana igayaga mawathe matiganĩte kuuma kũrĩ aciari a cio. (Aroma 5:12) Nĩ ũndũ ũcio, andũ othe maciaragwo “na mehia” b na ũguo nĩ kuuga atĩ tũciaragwo tũtarĩ akinyanĩru na tũrĩ na mwerekera wa kwĩhia.—Thaburi 51:5; Aefeso 2:3.

 Nĩ ũndũ wa mehia marĩa twagaire kana kwaga gũkinyanĩra, nĩ tũrũaraga, tũgakũra, na tũgakua. (Aroma 6:23) Ningĩ nĩ tũcemanagia na mathĩna nĩ ũndũ wa mahĩtia maitũ kana ma andũ arĩa angĩ.—Kohelethu 8:9; Jakubu 3:2.

 Ĩĩ. Bibilia yugaga atĩ Jesu aakuire “arĩ igongona rĩa kũhumbĩra mehia.” (1 Johana 4:10, kohoro ka magũrũ-inĩ) Igongona rĩa Jesu no rĩtũkũũre kuumana na moimĩrĩro moru ma mehia marĩa twagaire na rĩtũhotithie kũgĩa na kĩrĩa Adamu na Hawa maateire, kĩĩrĩgĩrĩro gĩa gũtũũra tene na tene marĩ na ũgima mwega wa mwĩrĩ.—Johana 3:16. c

 Ũrĩa andũ amwe metĩkĩtie: Gũtirĩ hĩndĩ tũngĩgĩa ũrata na Ngai nĩ ũndũ wa mehia ma kĩambĩrĩria.

 Ũrĩa kũrĩ: Ngai ndatũmenagĩrĩria nĩ ũndũ wa mehia marĩa Adamu na Hawa meekire. Nĩ ataũkagĩrũo atĩ tũtikoragwo tũrĩ akinyanĩru, na nderĩgagĩrĩra twĩke makĩria ma ũrĩa tũngĩhota gwĩka. (Thaburi 103:14) O na gũtuĩka nĩ tũthĩnĩkaga nĩ ũndũ wa mehia marĩa twagaire nĩ tũkoragwo na mweke na gĩtĩo gĩa kũgĩa na ũrata wa hakuhĩ hamwe na Ngai.—Thimo 3:32.

 Ũrĩa andũ amwe metĩkĩtie: Kũbatithio nĩ gũtheragia mũndũ kuumana na mehia ma kĩambĩrĩria, kwoguo ciana nĩ ciagĩrĩire kũbatithio.

 Ũrĩa kũrĩ: O na gũtuĩka kũbatithio nĩ kwa bata nĩguo mũndũ akaahonokio, gũkorũo na wĩtĩkio harĩ igongona rĩa Jesu nokuo tu kũngĩtheria mũndũ kuumana na mehia. (1 Petero 3:21; 1 Johana 1:7) Tondũ wĩtĩkio wa ma uumanaga na ũmenyo, gũtingĩhoteka ciana nyinyi ikorũo na wĩtĩkio. Nĩ ũndũ ũcio, Bibilia ndĩonanĩtie ũhoro wĩgiĩ kũbatithio gwa ciana. Ũguo nĩguo kwarĩ harĩ Akristiano a tene. Matiabatithagia ciana, no maabatithagia “arũme o hamwe na atumia” arĩa maakoragwo na wĩtĩkio harĩ Kiugo kĩa Ngai.—Atũmwo 2:41; 8:12.

 Ũrĩa andũ amwe metĩkĩtie: Atumia nĩ arume nĩ Ngai tondũ Hawa nĩwe wambire kũrĩa itunda rĩa mũtĩ ũrĩa maagirĩtio.

 Ũrĩa kũrĩ: Handũ ha kũruma atumia, Ngai aarumire nyoka ĩrĩa ya tene, o we wĩtagwo Mũcukani na Shaitani,” tondũ nĩwe watũmire Hawa ehie. (Kũguũrĩrio 12:9; Kĩambĩrĩria 3:14) Makĩria ma ũguo, Ngai oonanirie mahĩtia manene maarĩ harĩ Adamu, no ti harĩ mũtumia wake.—Aroma 5:12.

 Nĩ kĩĩ gĩatũmire Ngai oige atĩ Adamu nĩ arĩathaga mũtumia wake? (Kĩambĩrĩria 3:16) Rĩrĩa Ngai aagwetire ciugo icio, ti gwĩtĩkĩria etĩkagĩria ũndũ ũcio wĩkagwo. Eendaga kuonania moimĩrĩro moru ma mehia mao. Ngai erĩgagĩrĩra mũthuri ende na atĩe mũtumia wake, na akorũo na gĩtĩo kĩnene harĩ atumia othe.—Aefeso 5:25; 1 Petero 3:7.

 Ũrĩa andũ amwe metĩkĩtie: Mehia marĩa ma kĩambĩrĩria maarĩ ngomanio.

 Ũrĩa kũrĩ: Mehia marĩa ma kĩambĩrĩria matingĩkorũo maarĩ ngomanio nĩ ũndũ wa itũmi ici:

•   Ngai eerĩte Adamu ndakarĩe maciaro ma mũtĩ wa kũmenyithania wega na ũũru rĩrĩa aarĩ wiki, atanagĩa mũtumia.—Kĩambĩrĩria 2:17, 18.

•   Ngai eerĩte Adamu na Hawa ũũ: “Ciaranai na mũingĩhe,” ũguo nĩ kuuga magĩe ciana. (Kĩambĩrĩria 1:28) Ũngĩarĩ ũndũ mũũru harĩ Ngai kũherithia Adamu na Hawa nĩ ũndũ wa gwĩka ũndũ ũrĩa aamathĩte meke.

•   Adamu na Hawa meehirie mahinda ngũrani, Hawa nĩwe wambire kwĩhia, thutha ũcio Adamu nake akĩhia.—Kĩambĩrĩria 3:6.

•   Bibilia nĩ ĩtĩkĩrĩtie ngomanio gatagatĩ ka mũthuri na mũtumia wake.—Thimo 5:18, 19; 1 Akorintho 7:3.