https://www-draft.bethel.mr1310.com/af/biblioteek/reeks/hoe-jou-donasies-gebruik-word/Hoe-slagoffers-van-rampe-gehelp-word/Ahowe. Mokuyelekanifa nomashangelo onale ota ulike kutya Ombiibeli inai lundululwa nandenande nonande oya enda tai shangululwa momukokomoko womafelemido a pita.

 Omashangelo onale Ombiibeli omayovi a monika. Omashangelo ina faafana filufilu naasho sha shangwa mOmbiibeli, nosha yela kutya mOmbiibeli omu na omapuko onhumba. Omapuko oo a monika mo hao naanaa a ngulutila noina lundulula eityo. Ashike nande ongaho, omapuko amwe okwa ningilwa owina opo etumwalaka lOmbiibeli li lunduluke. Apa otapa landula oihopaenenwa yopavali:

1.   MEembiibeli dimwe, 1 Johannes 5:7 okwa tolokwa ngaha:“Meulu omu na Tate, Ondjovo nomhepo iyapuki: naaveshe ava vatatu ove li umwe.” Ashike ngeenge owa tale momashangelo, eendjovo odo hasho da tolokwa ngaho. Osha yela kutya eendjovo odo oda wedwa mo mOmbiibeli a. Ashike ngeenge owa tale momatoloko opaife, eendjovo odo ito di hange mo.

2.   Edina laKalunga ola holoka mo lwoikando omayovi momashangelo onale Ombiibeli. Ashike omatoloko Eembiibeli okwa pingena po Edina laKalunga nomadinafimaneko ngaashi “Omwene” ile “Kalunga.”

 Pomhito ei, okwa konakonwa kutya oshipu okudidilika omapuko momashangelo mahapu shi dulife nale. b Mbela ouyelele ou owa yelifa oushili wOmbiibeli shi fike peni kunena?

•   Shi na sha nomishangwa dOshiheberi (odo hadi ifanwa “Etestamenti likulu”), omuhongwanhu William H. Green okwa ti: “Otashi dulika shi kale shipu okutya ina ku tolokwa nale ouyelele we lixwa po filufilu ngaashi ou wOmbiibeli.”

•   Shi na sha nomishangwa dopaKriste dOshigreka ile “Etestamenti lipe,” Omuhongwanhu wOmbiibeli F. F. Bruce okwa shanga a ti: “Oumbangi womashangelo etestamenti lipe owa yela nawa u dulife omatoloko mahapu ovashangi ovanekeka, ashike nande ongaho kape na nande omunhu a dula oku va pataneka.”

•   Omufimanekwa Frederic Kenyon, omuwiliki womashangelo Ombiibeli okwa ti: “Kape na oo ta dulu okushanga Ombiibeli nomake aye ndele te i popi nopehe na oumbada ile a hetekele kutya okwe likolelela mEendjovo daKalunga doshili, ndele te i shange nopehe na okukanifa mo nande okanima kanini okudja kepupi fiyo okepupi momikokomoko domafelemido.”

•   Ovo va tapa Ombiibeli kutya nee Ovajuda ile Ovakriste, aveshe ova shanga oiningwanima oyo ya nyaneka pomutenya omapuko oo a ningwa koshiwana shaKalunga. c (Numeri 20:12; 2 Samuel 11:2-4; Ovagalati 2:11-14) Sha faafana, ova shanga oitukulwa oyo ya tokola okuhadulika kwoshiwana shOvajuda nokunyaneka pomutenya omahongo oo a totwa po kovanhu. (Hosea 4:2; Malakia 2:8, 9; Mateus 23:8, 9; 1 Johannes 5:21) Ovo va tapa Ombiibeli ova ulika kutya ove shii okulineekelwa nova fimaneka Eendjovo daKalunga neenghono eshi ve di tapa ngaashi naanaa di li.

•   Kashi fi tuu shikumwifi eshi Kalunga a nwefa mo Ombiibeli noku i kaleka paushili! d (Jesaja 40:8; 1 Petrus 1:24, 25) Otu wete kutya osho ine shi ninga ashike omolwovanhu vopefimbo lonale ndele novokunena yo. (1 Ovakorinto 10:11) Molwaashi “keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” — Ovaroma 15:4.

•   Jesus novashikuli vaye ova tofa momishangwa dOshiheberi pehe na okulipula shi na sha nomapuko oo tashi dulika a ningwa momashangelo onale. — Lukas 4:16-21; Oilonga 17:1-3