OMISHANGWA DA YELIFWA

Ovaroma 10:13 — “Ou ta ifana edina lOmwene”

DANA

“Keshe ou ta ifana edina Jehova ota ka xupifwa.” — Ovaroma 10:13, Ombiibeli — Etoloko lOunyuni Mupe lOmishangwa dopaKriste dOshigreka.

“Keshe tuu ou ta ifana edina lOmwene, oye ota xupifwa.” — Ovaroma 10:13, Ombiibeli yOshikwanyama yomo 2013.

Osho omushangwa wOvaroma 10:13 wa hala okutya

Kalunga ke na onhondo nokwa hala ovanhu vomaludi aeshe va xupifwe noku ka mona omwenyo waalushe, kashi na nee mbudi kutya ova dja moshiwana shilipi, omuhoko ile ove na eifano la tya ngahelipi. Opo tu mone ouwa, otwa pumbwa okukala hatu longifa edina Jehova, olo li li edina lolela laKalunga Omunaenghono adishe. * — Epsalme 83:18, NW.

Outumbulilo oo wa longifwa mOmbiibeli “ou ta ifana edina Jehova” owa kwatela mo shihapu shihe fi ashike okukala tu shii edina laKalunga noku li longifa ngeenge hatu mu longele. (Epsalme 116:12-14) Osha kwatela mo okulineekela muKalunga nokukonga ekwafo kuye. — Epsalme 20:7; 99:6.

Jesus Kristus okwa li a lenga neenghono edina laKalunga. Oitya yotete yeilikano laye olo la shiivika nawa, okwa ti: “Tate yetu ou u li meulu, edina loye nali yapulwe,” ile oku li ninga liyapuki. (Mateus 6:9) Jesus okwa ulika kutya opo tu ka mone omwenyo waalushe otwa pumbwa okukala tu shii Jehova, hatu dulika kuye nokukala tu mu hole. — Johannes 17:3, 6, 26.

Omolwashike twa fika pexulifodiladilo kutya Jehova oye ‘Omwene’ ngaashi sha tumbulwa mOvaroma 10:13 mOmbiibeli yOshikwanyama yomo 2013? Omolwaashi ovelishe oyo oya tofwa muJoel 2:32, omo mwa longifwa edina laKalunga, ndele hadinafimaneko “Omwene,” ngaashi la li la holoka mOmishangwa dOshiheberi donale. *

Oshikalimo shomushangwa wOvaroma 10:13

Ombiibeli oya ulika mOvaroma etukulwa 10 kutya opo omunhu a kale e na ekwatafano naKalunga oku na okuulika kutya oku na eitavelo muJesus Kristus. (Ovaroma 10:9) Ediladilo olo otali yambididwa keevelishe odo da tofwa kEtestamenti Likulu. Omunhu oha ulike eitavelo ‘mokuhepaulula moipafi,’ osho sha kwatela mo okuudifila ovanhu onghundana iwa yexupifo. Osho otashi ka kwafela vamwe va kulike eitavelo nova ka mone omwenyo waalushe. — Ovaroma 10:10, 14, 15, 17.

Lesha Ovaroma etukulwa 10 pamwe nomashangelo opedu oo a yelifa nosho yo omaulikokwatakanifo.

^ okat. 6 Edina laKalunga ola holoka lwoikando 7 000 lwaapo momashangelo onale Ombiibeli. MOshiheberi, edina olo ola shangwa neendada nhee. Edina olo mOshikwanyama “oJehova”; ofimbo ovahongwanhu vamwe hava ti “Yahweh.”

^ okat. 9 Osha fa shi li ngaha kutya Ovakriste ovo va shanga Ombiibeli ngeenge va li tava tofa “mEtestamenti Likulu” omishangwa odo di na edina laKalunga, navo ova li have li longifa. O-The Anchor Bible Dictionary oya popya ya ti: “Ope na oumbangi oo tau ulike kutya edina laKalunga, Yahweh, olo la holoka meevelishe dimwe ile adishe mEtestamenti Likulu, odo da li da ka longifwa kEtestamenti Lipe, eshi la shangwa pehovelo.” (embo eti-6, epandja 392) Opo u mone ouyelele muhapu, tala oshitukulwa 2, “Edina laKalunga mOmishangwa dopaKriste dOshigreka,” mokambo Okalongifwambo kokukonakona Eendjovo daKalunga. Tala yo omusholondodo wEembiibeli odo da longifa edina laKalunga mOvaroma 10:13 mOshiwedelwako C2 mOmbiibeli yokukonakonwa yo-New World Translation of the Holy Scriptures.