Onda li ndi na omido 10 mo 1985 eshi ounona vokoCambodia va li ve uya pofikola yetu moColumbus, muOhio, mo-U.S.A. Okamati kamwe komounona ovo oka li ke shii oitya inini yOshiingilisha. Oka li ka longifa omafano opo ka lombwele nge omahokololo matilifa okumona oixuna, omadipao nokuya onhapo. Onda li handi kala handi lili oufiku shimha nda diladila kombinga younona ovo. Onda li nda hala oku va lombwela shi na sha neteelelo lOparadisa nosho yo lenyumuko, ashike kava li ve udite ko elaka lange. Nonande onda li ashike okamatyona, onda li nda tokola okulihonga Oshicambodia opo ndi dule okulombwela ovanafikola vakwetu kombinga yaJehova. Ashike kanda li ndi shii kutya ehoololo olo otali ka kuma ngahelipi onakwiiwa yange.

Osha li shidjuu okulihonga Oshicambodia. Hanga onda sholola lwoikando aishe ivali, ashike Jehova okwa li a twa nge omukumo okupitila movadali vange. Mokweendela ko kwefimbo, ovahongi novanafikola vakwetu ova li va hovela okuladipika nge ndi lalakanene eifano olo la talika ko la denga mbada. Ashike onda li nda hala okuninga omukokolindjila, naashi nda li kofikola yopombada onda li nda hoolola oihongwa oyo tai ka kwafela nge ndi mone oilonga yetatafiku yokulikongela omboloto opo ndi dule okuhanga elalakano lange. Eshi nda mana ofikola, otwa li hatu shakene novakokolindjila vamwe noku ka longa moukalele pamwe navo. Onda li yo nde liyamba ndi kale handi hongo ovahongwa ovo va li tave lihongo Oshiingilisha shi li elaka etivali, nehoololo olo lwanima ola ka kwafela nge neenghono.

Eshi nda li ndi na omido 16, onda li nda uda kutya moLong Beach, muCalifornia, mo-U.S.A omu na ongudu yOshicambodia. Onda li nda talela po ongudu oyo nonda li nde lihonga okulesha Oshicambodia. Diva eshi nda mana ofikola, onda li nda ninga omukokolindjila nonda twikila okuudifila Ovacambodia vopomudingonoko wetu. Eshi nda ka wanifa omido 18, onda li nda diladila okutembukila koCambodia. Koshilongo osho okwa li kwa nyika oshiponga, ashike onda li ndi shii kutya ovanhu ashike vanini vomomamiliyona 10 ovo ve li moCambodia va uda onghundana iwa yOuhamba. Pefimbo opo, moshilongo ashishe omwa li ashike eongalo limwe mu na ovaudifi 13. Oshikando shotete nda ya koCambodia onda li ndi na omido 19. Konima yomido 2, onda li nda tokola okuya ko oko ndi ka kale. Onda li nda mona oilonga yetatafiku yokutoloka nokuhonga Oshiingilisha opo ndi liyambidide painiwe moukalele. Mokweendela ko kwefimbo, onda ka hombola omukulukadi oo naye e na omalalakano a fa ange. Tu li ovalihomboli, otwa li hatu hafele okukwafela Ovacambodia vahapu ve liyapulile Kalunga.

Jehova okwa li a pa nge osho ‘sha wapalela omutima wange.’ (Eps. 37:4) Kape na oshinima tashi ku kwafele u kale u udite wa wanenwa shi dulife okuninga ovanhu ovahongwa. Momido 16 odo nda kala moCambodia, eongalo linini lovapiya vaJehova 13 ola li la tamunuka mo nola ka ninga omaongalo 12 nosho yo eengudu 4 odo di li keenhele de likalela. — Ehokololo laJason Blackwell.