لۇقا 1:1—80
-
تەوفيلگە ارنالعان سوزدەر (1—4)
-
جابىرەيىلدىڭ جاقيانىڭ تۋىلاتىنىن الدىن الا ايتۋى (5—25)
-
جابىرەيىلدىڭ يسانىڭ تۋىلاتىنىن الدىن الا ايتۋى (26—38)
-
ٴماريامنىڭ ەلىزابەتكە بارۋى (39—45)
-
ٴماريامنىڭ ەحوبانى ماداقتاۋى (46—56)
-
جاقيانىڭ تۋىلۋى جانە وعان ات قويىلۋى (57—66)
-
زاكاريانىڭ ايتقان پايعامبارلىعى (67—80)
1 كوپ ادام ٶزىمىز كامىل سەنەتىن جايتتار تۋرالى جازا باستادى+.
2 بۇل وقيعالاردى بىزگە باسىنان باستاپ ٶز كوزىمەن كورگەندەر+ ٵرى ىزگى حاباردى جاريالاپ جۇرگەندەر دە ايتىپ بەردى+.
3 سوندىقتان، اسا قادىرلى تەوفيل، مەن دە ٴبارىن باسىنان باستاپ مۇقيات زەرتتەپ، سىزگە رەت-رەتىمەن جازىپ جىبەرۋدى شەشتىم+.
4 وسىلايشا اۋىزشا العان ٴبىلىمىڭىزدىڭ راستىعىنا تولىعىمەن كوز جەتكىزە الاسىز+.
5 ياھۋدەيا پاتشاسى يرودتىڭ* زامانىندا+ ٴدىني قىزمەتكەرلەردىڭ ٵبياح+ توبىندا زاكاريا دەگەن كىسى بولاتىن. ونىڭ ايەلى ەلىزابەت حارون اۋلەتىنەن ەدى.
6 ەكەۋى دە ەحوبا* قۇدايدىڭ بارلىق وسيەتتەرى مەن زاڭدارىن قالتقىسىز ورىنداپ، قۇدايدىڭ الدىندا ٵدىل ٶمىر ٴسۇرىپ جاتتى.
7 ٴبىراق بالالارى جوق ەدى، ويتكەنى ەلىزابەت بەدەۋ بولاتىن. ال ولاردىڭ جاستارى ۇلعايىپ قالعان ەدى.
8 بىردە زاكاريا ٶز توبىنىڭ كەزەگى كەلىپ، قۇداي الدىندا ٴدىني قىزمەتكەرلىك مىندەتىن+ اتقارىپ جۇرگەندە،
9 ٴدىني قىزمەتكەرلەردىڭ ٴتارتىبى بويىنشا، وعان ەحوبانىڭ عيباداتحاناسىنا كىرىپ، حوش ٴيىستى زاتتار تۇتەتۋ كەزەگى كەلدى+.
10 حوش ٴيىستى زاتتار تۇتەتىلىپ جاتقاندا، بارلىق جۇرت سىرتتا دۇعا ەتىپ تۇردى.
11 كەنەت تۇتەتۋ ۇستەلىنىڭ وڭ جاعىندا ەحوبانىڭ پەرىشتەسى پايدا بولدى. زاكاريا ونى كورگەندە،
12 قاتتى ابىرجىپ، قورقىپ كەتتى.
13 ٴبىراق پەرىشتە بىلاي دەدى: «قورىقپا، زاكاريا، قۇداي تىلەگىڭدى ەستىدى. ايەلىڭ ەلىزابەت ۇل تاۋىپ، ونىڭ اتىن جاقيا دەپ قوياسىڭ+.
14 سەن قۋانا شاتتاناسىڭ، كوپشىلىك تە ونىڭ تۋىلعانىنا قۋانادى+.
15 ول ەحوبانىڭ كوز الدىندا ۇلى بولادى+. ٴبىراق شاراپ پەن ىشىمدىك اتاۋلىنى اۋزىنا الماۋى كەرەك+. انا قۇرساعىندا جاتقاندا-اق ول قۇدايدىڭ كيەلى رۋحىنا كەنەلەدى+.
16 كوپتەگەن يسرايل ۇلدارىن وزدەرىنىڭ قۇدايى ەحوباعا قايتارادى+.
17 سونداي-اق ول ٸلياسقا دارىعان رۋح پەن كۇشكە بولەنىپ+، قۇدايدىڭ الدىندا ٴجۇرىپ وتىرادى. وسىلاي ەحوباعا دايارلانعان حالىقتى الىپ كەلۋ ٷشىن+، اكەلەردىڭ جۇرەگىن بالالاردىكىندەي ەتەدى+، ال ٴتىلازارلارعا ادىلدەردىڭ دانالىعىن دارىتادى».
18 سوندا زاكاريا پەرىشتەگە: «بۇعان قالاي سەنە الامىن؟ ويتكەنى ٶزىم دە قارتايدىم، ايەلىمنىڭ دە جاسى كەلىپ قالعان»،— دەدى.
19 پەرىشتە بىلاي دەپ جاۋاپ قاتتى: «مەن قۇداي الدىندا قىزمەت ەتۋشى+ جابىرەيىلمىن+. مەن سەنىمەن سويلەسىپ، وسى ىزگى حاباردى جەتكىزۋگە جىبەرىلدىم.
20 ٴبىراق بەلگىلەنگەن ۋاقىتتا ورىندالاتىن مەنىڭ سوزدەرىمە سەنبەگەنىڭ ٷشىن، بۇلار جۇزەگە اساتىن كۇنگە دەيىن سويلەي الماي، مىلقاۋ بولىپ قالاسىڭ».
21 وسى ۋاقىتتا زاكاريانى كۇتىپ تۇرعان جۇرت ونىڭ عيباداتحانادا كىدىرىپ جاتقانىنا تاڭعالدى.
22 ول سىرتقا شىققاندا، ولارعا سويلەي المادى. سوندا جۇرت ونىڭ عيباداتحانادا ەرەكشە بىردەڭە* كورگەنىن ۇقتى. زاكاريا ولارمەن ىمداپ سويلەسىپ، ٴتىلسىز كۇيىندە قالا بەردى.
23 ال قىزمەت كۇندەرى اياقتالعان سوڭ، ۇيىنە قايتتى.
24 سول كۇندەردەن كەيىن ايەلى ەلىزابەت قۇرساق كوتەرىپ، بەس اي بويى ۇيىنەن شىقپاي ٴجۇردى.
25 ول: «بۇگىندە ەحوبا ماعان نازار اۋدارىپ، جۇرت الدىنداعى ماسقارا كۇيىمنەن* ارىلتۋ ٷشىن وسىلاي ەتتى»+،— دەدى.
26 ونىڭ بالا كوتەرگەنىنە التى اي بولعاندا، قۇداي جابىرەيىل پەرىشتەنى+ عاليلەياداعى نازارەت قالاسىنا،
27 ٴماريام ەسىمدى قىزعا+ جىبەردى. ول ٴداۋىتتىڭ اۋلەتىنەن شىققان ٴجۇسىپ دەگەن جىگىتكە ايتتىرىلعان ەدى+.
28 جابىرەيىل وعان كەلىپ: «امانسىڭ با، قۇداي جارىلقاعان قىز! ەحوبا ساعان جار!»— دەدى.
29 مۇنى ەستىگەن ول قاتتى ابىرجىپ، بۇل قانداي سالەمدەسۋ بولدى ەكەن دەپ، ويلانىپ قالدى.
30 سوندا پەرىشتە وعان بىلاي دەدى: «قورىقپا، ٴماريام، قۇداي ساعان راقىمىن ٴتۇسىردى.
31 سەنىڭ بويىڭا بالا ٴبىتىپ، ۇل تاباسىڭ+، ونىڭ اتىن يسا* دەپ قوياسىڭ+.
32 ول اسا ۇلى بولادى+، ٵرى قۇداي تاعالانىڭ ۇلى* دەپ اتالادى+. ەحوبا وعان ارعى اتاسى ٴداۋىتتىڭ تاعىن سيلايدى+.
33 ول جاقىپتىڭ اۋلەتىنە ماڭگىلىك بويى پاتشا رەتىندە بيلىك ەتەدى. ونىڭ پاتشالىعىنىڭ شەگى بولمايدى+».
34 ال ٴماريام پەرىشتەدەن: «مەن ەركەكپەن جاقىنداسقان ەمەسپىن عوي، بۇل قالاي بولادى؟»+— دەپ سۇرادى.
35 پەرىشتە وعان جاۋاپ قاتىپ: «سەنىڭ ۇستىڭە كيەلى رۋح قونىپ+، قۇداي تاعالا ساعان قۇدىرەتىنىڭ كولەڭكەسىن تۇسىرەدى. سوندىقتان سەن تاباتىن بالا كيەلى+ ٵرى قۇدايدىڭ ۇلى+ دەپ اتالاتىن بولادى.
36 انە، بۇرىن بەدەۋ دەپ اتالعان تۋىسىڭ ەلىزابەت تە جاسى كەلىپ قالعانىمەن، ۇلدى بولادى. التى ايدان بەرى ونىڭ اياعى اۋىر.
37 ويتكەنى قۇداي ٷشىن مۇمكىن ەمەس نارسە جوق*+»،— دەدى.
38 سوندا ٴماريام: «مەن ەحوبا قۇدايدىڭ قۇلىمىن! بارلىعى ٴسىز ايتقانداي بولسىن!»— دەدى. وسىدان كەيىن پەرىشتە عايىپ بولدى.
39 سول كۇندەرى ٴماريام جولعا جينالىپ، ياھۋدا رۋىنىڭ تاۋلى وڭىرىندەگى ٴبىر قالاعا اسىعىس ٴجۇرىپ كەتتى.
40 ول زاكاريانىڭ ۇيىنە كەلىپ، ەلىزابەتپەن سالەمدەستى.
41 ٴماريامنىڭ سالەمىن ەستىگەندە، ەلىزابەتتىڭ ىشىندەگى بالا تىپىرلاپ كەتتى. سوندا ەلىزابەت كيەلى رۋحقا كەنەلىپ،
42 بىلاي دەپ داۋىستادى: «ايەلدەردىڭ اراسىندا سەن جارىلقانعانسىڭ، قۇرساعىڭداعى بالا دا جارىلقانعان!
43 يەمنىڭ اناسى ماعان كەلەتىندەي مەن كىممىن سونشا؟!
44 سالەمىڭ قۇلاعىما جەتكەندە، ىشىمدەگى بالانىڭ قاتتى قۋانىپ، تىپىرلاپ كەتكەنىن قاراشى.
45 ايتىلعانعا سەنگەن سەن باقىتتىسىڭ، ويتكەنى ەحوبانىڭ ساعان ايتقان سوزدەرى تولىق ورىندالادى!»
46 سوندا ٴماريام بىلاي دەدى: «جانىم ەحوبانى ماداقتايدى+،
47 قۇتقارۋشى قۇدايىم دەپ جۇرەگىم شاتتىققا تولادى+.
48 ويتكەنى ول ٶز قۇلىنىڭ قاراپايىم كۇيىنە نازار اۋداردى+. بۇدان بىلاي كۇللى ۇرپاق مەنى باقىتتى دەپ ايتاتىن بولادى+.
49 سەبەبى قۇدىرەتتى قۇداي مەن ٷشىن ۇلى ىستەر جاسادى. ونىڭ ەسىمى كيەلى+.
50 ول وزىنەن قورقاتىندارعا ۇرپاقتان ۇرپاققا مەيىرىمدىلىك كورسەتىپ كەلەدى+.
51 ٶز قولىمەن قۇدىرەتتى ىستەر جاساپ، جۇرەگى تاكاپپارلاردى بىتىراتىپ جىبەردى+؛
52 بيلىك يەلەرىن تاعىنان قۇلاتىپ+، قاراپايىمداردى جوعارىلاتتى+؛
53 اشىققانداردى يگىلىككە مولىنان كەنەلتىپ+، ال بايلاردى قۇرالاقان قايتارىپ جىبەردى؛
54 ماڭگى باقي مەيىرىمدىلىك تانىتامىن دەگەن ۋادەسىن ۇمىتپاعانىن كورسەتىپ، قىزمەتشىسى يسرايلگە كومەككە كەلدى+.
55 بۇل ۋادەنى ول اتا-بابالارىمىزعا، ىبىرايىم مەن ونىڭ ۇرپاقتارىنا، بەرگەن ەدى+».
56 ٴماريام ەلىزابەتپەن ٷش ايداي بىرگە بولىپ، سودان كەيىن ۇيىنە قايتتى.
57 ەلىزابەتتىڭ بوساناتىن ۋاقىتى جەتىپ، ۇل تاپتى.
58 كورشىلەرى مەن تۋىستارى ەحوبانىڭ وعان زور مەيىرىمدىلىك تانىتقانىن ەستىپ، قۋانىشىنا ورتاقتاستى+.
59 سەگىزىنشى كۇنى ولار بالانى سۇندەتتەۋگە كەلىپ+، وعان زاكاريا دەپ اكەسىنىڭ اتىن قويماق بولدى.
60 ٴبىراق اناسى بۇعان: «جوق، ونىڭ اتىن جاقيا قويامىز»،— دەدى.
61 ال ولار: «تۋىستارىڭنىڭ اراسىندا مۇنداي ەسىم ەشكىمدە جوق قوي»،— دەسىپ،
62 بالاعا قانداي ات قويعىسى كەلەتىنىن اكەسىنەن ىمداپ سۇرادى.
63 ول جازۋ تاقتايشاسىن سۇراپ، «ونىڭ ەسىمى جاقيا بولادى» دەپ جازدى+. بۇعان جۇرتتىڭ ٴبارى تاڭعالدى.
64 سول ساتتە وعان قايتا ٴتىل ٴبىتىپ+، قۇدايدى ماداقتاي باستادى.
65 سوندا توڭىرەكتە تۇراتىنداردىڭ ٴبارىن ۇرەي بيلەدى. سونداي-اق بۇل وقيعا ياھۋدەيانىڭ بۇكىل تاۋلى وڭىرىنە تاراي باستادى.
66 ەستىگەندەردىڭ ٴبارى مۇنى كوڭىلدەرىنە ٴتۇيىپ: «بۇل بالا كىم بولار ەكەن؟»— دەستى. ويتكەنى ەحوبا وعان جار بولىپ ٴجۇردى.
67 بالانىڭ اكەسى زاكاريا كيەلى رۋحقا كەنەلىپ، بىلاي دەپ پايعامبارلىق ەتتى:
68 «يسرايلدىڭ قۇدايى ەحوبا ماداقتالسىن+! ول حالقىنا نازار اۋدارىپ، ونى قۇتقاردى+.
69 قىزمەتشىسى ٴداۋىتتىڭ اۋلەتىنەن+ بىزگە مىقتى قۇتقارۋشى* شىعاردى+.
70 مۇنى ول ەجەلدەگى قاسيەتتى پايعامبارلارى ارقىلى ايتىپ+،
71 جاۋلارىمىزدان جانە ٴبىزدى جەك كورەتىندەردىڭ قولىنان قۇتقاراتىنىن ٴبىلدىردى+.
72 وسىلايشا ول اتا-بابامىزعا ۋادە ەتكەن مەيىرىمدىلىگىن كورسەتتى جانە قاسيەتتى كەلىسىمىن+،
73 ياعني ارعى اتامىز ىبىرايىمعا بەرگەن انتىن، ەسىنە الدى+.
74 وسى انتقا ساي، جاۋلارىمىزدىڭ قولىنان قۇتقارعان سوڭ، وزىنە باتىلدىقپەن قاسيەتتى قىزمەت ەتۋ مارتەبەسىن سيلاپ،
75 ونى بار عۇمىرىمىزدا ادال دا ٵدىل اتقارۋعا مۇمكىندىك بەردى.
76 ال سەن، بالام، قۇداي تاعالانىڭ پايعامبارى دەپ اتالاسىڭ، ويتكەنى ەحوبانىڭ الدىندا ٴجۇرىپ، وعان جول دايىندايسىڭ+
77 جانە ونىڭ حالقىنا قۇدايىمىز زور جاناشىرلىعىمەن كۇنالارىن كەشىرۋ ارقىلى ولاردى قۇتقاراتىنىن جاريالايسىڭ+.
78 وسى جاناشىرلىقتىڭ ارقاسىندا ٴبىز كوكتەن كەلگەن تاڭ شاپاعىنداي نۇردى كورەمىز.
79 ول قارا تۇنەكتە جانە ٶلىم كولەڭكەسىندە وتىرعاندارعا ساۋلەسىن توگەدى+ جانە قادامىمىزدى تىنىشتىق جولىنا باعىتتاپ، سول جولدا باتاسىن بەرەدى».
80 بالا ەسەيىپ، رۋحى دا نىعايا ٴتۇستى. يسرايل حالقىنا كورىنەتىن كۇنى جەتكەنشە، ول ٴشول دالادا* تۇرىپ جاتتى.
سىلتەمەلەر
^ ياعني ۇلى يرود. تۇسىندىرمەنى قاراڭىز.
^ بۇل — قۇدايدىڭ ەسىمى. تۇسىندىرمەنى قاراڭىز.
^ نەمەسە «ايان».
^ ياعني بالاسىز جۇرگەن كۇيىنەن.
^ ەۆرەيشە ەشۋا. ماعىناسى «ەحوبا — قۇتقارۋشى».
^ تۇسىندىرمەدەگى «قۇداي ۇلى» سوزىنە قاراڭىز.
^ نەمەسە «قۇدايدىڭ ەشبىر ٴسوزى ورىندالماي قويمايدى».
^ سوزبە-ٴسوز «قۇتقارۋشى ٴمۇيىز». تۇسىندىرمەدەگى «ٴمۇيىز» ٴسوزىن قاراڭىز.
^ تۇسىندىرمەنى قاراڭىز.
