مارقا 13:1—37
13 يسا عيباداتحانادان شىعىپ بارا جاتقاندا، شاكىرتتەرىنىڭ ٴبىرى: «ۇستاز، قاراڭىزشى، قانداي كەرەمەت تاستار! قانداي كەرەمەت عيماراتتار!»— دەدى+.
2 الايدا يسا: «مىنا ٴزاۋلىم عيماراتتاردى كورىپ تۇرسىڭ با؟ بۇلاردىڭ بىردە-ٴبىر تاسى قالماي كۇل-تالقان بولىپ قيرايدى!»— دەپ جاۋاپ بەردى+.
3 ول ٴزايتۇن تاۋىنىڭ عيباداتحانا كورىنىپ تۇراتىن بەتكەيىندە وتىرعاندا، پەتىر، جاقىپ، جوحان جانە ٵندىر وڭاشادا:
4 «ايتىڭىزشى، بۇل قاشان بولادى؟ مۇنىڭ ٴبارىنىڭ اياقتالىپ قالعانىن قانداي بەلگى بىلدىرمەك؟»— دەپ سۇرادى+.
5 سوندا يسا ٴسوزىن بىلاي دەپ باستادى: «ساق بولىڭدار! ەشكىم سەندەردى اداستىرىپ جۇرمەسىن+.
6 كوپ ادام «مەن سولمىن» دەپ، مەنىڭ اتىمنان كەلىپ، كوپشىلىكتى اداستىرادى.
7 ونىڭ ۇستىنە، جاقىن ماڭداعى جانە الىستاعى سوعىستار تۋرالى ەستيسىڭدەر، الايدا ۇرەيلەنبەڭدەر. ولار بولۋعا ٴتيىستى، ٴبىراق بۇل — ٵلى زاماننىڭ سوڭى ەمەس+.
8 سەبەبى ۇلت ۇلتقا قارسى، مەملەكەت مەملەكەتكە قارسى اتتانادى+، ٴتۇرلى جەرلەردە جەر سىلكىنىستەرى مەن اشارشىلىق بولادى+. بۇلار — تولعاق سياقتى ازاپتىڭ باستاماسى+.
9 ال سەندەر وزدەرىڭە ساق بولىڭدار! جۇرت سەندەردى مەنىڭ شاكىرتىم بولعاندارىڭ ٷشىن جەرگىلىكتى سوتتارعا ۇستاپ بەرەدى+، ٴماجىلىسحانالاردا دۇرە سوقتىرادى+ جانە بيلەۋشىلەر مەن پاتشالاردىڭ الدىنا اپارادى، سوندا ولارعا كۋالىك ەتە الاسىڭدار+.
10 سونداي-اق الدىمەن بارلىق حالىقتارعا ىزگى حابار ۋاعىزدالۋ كەرەك+.
11 ال سەندەردى سوت الدىنا اپارعاندا، نە ايتاتىندارىڭدى ويلاپ ۋايىمداماڭدار. سول ساتتە كيەلى رۋح* نە دەسە، سونى ايتىڭدار، ويتكەنى سەندەر ەمەس، كيەلى رۋح سويلەيدى+.
12 باۋىرى ٶز باۋىرىن، اكەسى بالاسىن ولىمگە دۋشار ەتەدى، ال بالالارى اتا-اناسىنا قارسى شىعىپ، ولاردى ولىمگە دۋشار ەتەدى+.
13 مەنىڭ اتىما بولا جۇرتتىڭ ٴبارى سەندەردى جەك كورەتىن بولادى+. ٴبىراق سوڭىنا دەيىن تاباندىلىق تانىتقان ادام+ قۇتقارىلادى+.
14 سەندەر قاڭىراتىپ بوس قالدىراتىن جەركەنىشتى نارسەنىڭ+ تۇرماۋى كەرەك جەردە تۇرعانىن كورگەندە (وقىعان ادامعا مۇنى ٴتۇسىنۋ ٷشىن قىراعىلىق قاجەت)، ياھۋدەياداعىلار تاۋلارعا قاشسىن+.
15 كىم ٷي توبەسىندە بولسا، قانداي دا ٴبىر زات الۋ ٷشىن ۇيىنە كىرمەسىن؛
16 ال كىم تاناپتا جۇرسە، كيىمىن الۋ ٷشىن كەرى قايتپاسىن.
17 سول كۇندەرى جۇكتى جانە بالا ەمىزىپ جۇرگەن ايەلدەر قاسىرەتكە قالادى+!
18 قاشاتىن كەزدەرىڭ قىس مەزگىلىنە تۋرا كەلمەسىن دەپ دۇعا ەتىپ جۇرىڭدەر،
19 ويتكەنى سول كۇندەرى قۇداي دۇنيەنى جاراتقاننان بەرى وسى ۋاقىتقا دەيىن بولماعان جانە قايتا قايتالانبايتىن الاپات* بولادى+.
20 ەگەر ەحوبا سول كۇندەردى قىسقارتپاعاندا، ەشكىم امان قالماس ەدى. ٴبىراق ول ٶزى تاڭداپ العاندار ٷشىن سول كۇندەردى قىسقارتادى+.
21 سول كەزدە بىرەۋ سەندەرگە «مىنە، ٴماسىح مۇندا!» نەمەسە «انە، ول اندا!» دەسە، بۇعان سەنبەڭدەر+.
22 سەبەبى جالعان ماسىحتەر مەن جالعان پايعامبارلار شىعىپ+، مۇمكىن بولسا، قۇداي تاڭداپ العانداردى اداستىرۋ ٷشىن بەلگىلەر مەن كەرەمەتتەر كورسەتەدى.
23 ال سەندەر ساق بولىڭدار+! مەن مۇنىڭ ٴبارىن كۇنى بۇرىن ايتىپ تۇرمىن.
24 ٴبىراق سول كۇندەرى، ياعني سول الاپاتتان كەيىن، كۇندى قاراڭعىلىق باسادى، اي دا جارقىرامايدى+؛
25 جۇلدىزدار اسپاننان قۇلاپ، اسپانداعى كۇشتەر شايقالادى.
26 سوندا ولار ادام ۇلىنىڭ+ عالامات قۇدىرەتپەن جانە سالتاناتتى ۇلىلىقپەن بۇلتتاردا كەلە جاتقانىن كورەدى+.
27 ول پەرىشتەلەرىن جىبەرىپ، دۇنيەنىڭ ٴتورت بۇرىشىنان* — اسپان مەن جەردىڭ و شەتى مەن بۇ شەتىنەن — ٶزىنىڭ تاڭداپ الىنعاندارىن جيناپ الادى+.
28 مىسال رەتىندە ٸنجىر اعاشىنا نازار اۋدارىڭدار: ونىڭ جاس بۇتاقتارى جۇمسارىپ، جاپىراقتارى شىعا باستاعاندا، جازدىڭ جاقىنداپ قالعانىن بىلەسىڭدەر+.
29 سول سياقتى، سەندەر دە وسىلاردىڭ بولىپ جاتقانىن كورگەندە، ادام ۇلىنىڭ جاقىن، ەسىك الدىندا، ەكەنىن بىلىڭدەر+.
30 سەندەرگە شىندىعىن ايتامىن، وسى ۇرپاق ولمەي تۇرىپ-اق، بۇلاردىڭ ٴبارى ورىندالادى+.
31 كوك پەن جەر قۇرىپ جوق بولىپ كەتسە دە+، مەنىڭ سوزدەرىم ەش قۇرىمايدى+.
32 سول كۇندى نە ساعاتتى ەشكىم — كوكتەگى پەرىشتەلەر دە، ۇل دا — بىلمەيدى، اكەم عانا بىلەدى+.
33 ساق بولىڭدار! سەرگەك بولىڭدار+! ويتكەنى بەلگىلەنگەن ۋاقىتتى بىلمەيسىڭدەر+.
34 بۇل باسقا ەلگە ساپار شەككەلى جاتقان كىسىنىڭ ارەكەتىنە ۇقسايدى: ول ٷيىن باسقارۋدى قۇلدارىنا تاپسىرىپ+، ٴارقايسىسىنا ٶز جۇمىسىن بەرەدى دە، قاقپا كۇزەتشىسىنە سەرگەك بولۋدى بۇيىرادى+.
35 سوندىقتان سەرگەك بولىڭدار! سەبەبى ٷي يەسى كەشكە، ٴتۇن ورتاسىندا، اتەش شاقىرعاندا، الدە تاڭ سارىدە* كەلە مە — بىلمەيسىڭدەر+.
36 ول كەنەتتەن كەلىپ، ۇيىقتاپ جاتقاندارىڭدا ۇستەرىڭنەن تۇسپەسىن+.
37 سەندەرگە ايتقانىمدى بارىنە دە ايتامىن: سەرگەك بولىڭدار+!»
سىلتەمەلەر
^ تۇسىندىرمەنى قاراڭىز.
^ تۇسىندىرمەدەگى «زور الاپاتتى» قاراڭىز.
^ سوزبە-ٴسوز «ٴتورت جەلدەن».
^ تۇسىندىرمەدەگى «كۇزەت» ٴسوزىن قاراڭىز.
