نەگە ەحوبا كۋاگەرلەرى كەيبىر ٴدىني ىلىمدەرىن وزگەرتەدى؟
ٴبىزدىڭ ٴدىني ىلىمدەرىمىز تەك كيەلى كىتاپقا نەگىزدەلەدى. سوندىقتان جازبالاردى تەرەڭىرەك بىلگەن سايىن، ىلىمدەرىمىز دە وزگەرىپ جاتادى a.
مۇنداي وزگەرىستەر كيەلى كىتاپتا جازىلعان كەلەسىدەي سوزدەرگە ساي كەلەدى: «ادىلدىڭ جولى تاڭ شاپاعى ىسپەتتى، تال ٴتۇس بولعانشا جارقىراي تۇسەدى» (ناقىل سوزدەر 4:18). كۇن ۇياسىنان شىققاندا، اينالا بىرتە-بىرتە ايقىن كورىنە باستايدى. سول سياقتى قۇداي دا ٶز ٴسوزىنىڭ ٴمانىن بىرتە-بىرتە، ٶز ۋاقىتىسىندا اشادى (پەتىردىڭ 1-حاتى 1:10—12). كيەلى كىتاپتا الدىن الا ايتىلعانداي، قۇداي مۇنى «اقىرعى ۋاقىتتا» تەزدەتتى (دانيال 12:4).
ىلىمدەرىمىز وزگەرگەندە تاڭعالماۋىمىز جانە مازالانباۋىمىز كەرەك. قۇدايدىڭ ەجەلدەگى قىزمەتشىلەرى دە بۇرىس وي تۇزگەن، جاڭساق ۇمىتتەرى دە بولعان. ولارعا كوزقاراستارىن تۇزەتۋ قاجەت بولعان. سولاردىڭ كەيبىر مىسالى:
مۇسا قۇداي بەلگىلەگەن ۋاقىتتان 40 جىل بۇرىن ٶزىن يسرايل حالقىنىڭ قۇتقارۋشىسى بولۋعا دايىن دەپ ساناعان (ەلشىلەردىڭ ىستەرى 7:23—25، 30، 35)
يسا پايعامباردىڭ ەلشىلەرى ونىڭ ٶلىمى مەن قايتا تىرىلۋىنە قاتىستى پايعامبارلىقتى تۇسىنبەي ٴجۇردى (يشايا 53:8—12؛ ماتاي 16:21—23)
ەرتەدەگى ماسىحشىلەردىڭ كەيبىرى «ەحوبانىڭ كۇنى» قاي كەزدە كەلەتىنىنە قاتىستى جاڭىلىستى (سالونيكالىقتارعا 2-حات 2:1، 2)
كەيىن قۇداي ولاردىڭ قاتە كوزقاراستارىن تۇزەتتى، ٴبىزدى دە قاجەت بولعاندا، تۇزەتسىن دەپ دۇعا ەتەمىز (جاقىپ 1:5).
a ٴبىز كيەلى كىتاپقا قاتىستى تۇسىنىگىمىزدىڭ وزگەرگەنىن جاسىرۋعا تىرىسپايمىز. قايتا، بۇل تۋرالى حابارلاپ، جۋرنال بەتتەرىندە جاريالايمىز. مىسالى، ونلاين كىتاپحانامىزدا «جاڭا تۇسىنىكتەر» دەپ تەرىپ كورىڭىز.