Qinnutitit tusarneqassappata qanoq qinusinnaavit?
Jehova Guuti ‘qinnutitsinnik tusartartuuvoq’. (Tussiaat 65:3) Sumiikkaluaruttaluunniit qaqugukkulluunniillu nipilimmik nipaqanngitsumilluunniit oqaluussinnaavarput. Jehovap kissaatigaa Ataatatut taasassagitsinni, taannami tassaavoq ataataalluarnerpaaq. (Matthæusi 6:9) Asannilluni ilinniartippaatigut qinnutigut tusarneqassappata qanoq qinusinnaasugut.
JIISUSIP AQQANI JEHOVAMUT QINUSARIT
“Ataataq uanga atikkut sumik qinnuigigussiuk qinnutigisassinnik tunissavaasi.” – Johannesi 16:23.
Jiisusip oqaasiinit erseqqippoq Jehovap kissaatigigaa Jiisusip Kristusip aqqani qinusassasugut. Kissaatiginngilaa assilissat, iluartuutitat, inngilit siuaasagulluunniit toqusimasut aqqutigalugit qinusassasugut. Jiisusip aqqani Guutimut qinugaangatta ersersittarparput Jiisusip uagut pilluta iliuuserisimasai paasisimallutigit. Jiisusi ima oqarpoq: “Uakkuinnaq Ataatamut pisoqarsinnaavoq.” – Johannesi 14:6.
QAMANNGA PISUMIK QINUSARIT
“Uummammiugisasi tamaasa taassumunnga saqqummiussigit.” – Tussiaat 62:9.
Jehovamut qinugaangatta ataatamut asannittumut oqaluttarnitsitut oqaluttassaagut. Qinnuterput alanngaaginnartassanngilarput atuaannarnaguluunniit, ataqqinnittumilli qamanngalu pisumik qinusassaagut.
GUUTIP PIUMASAANUT NAAPERTUUTTUMIK QINUSARIT
‘Piumasaminut naapertuuttumik qinnuigigutsinni tusarumaarpaatigut.’ – 1 Johannesi 5:14.
Jehovap Guutip uagutsinnut iliuuserisassai qanorlu piumasaqarfigineraatigut Biibilimi allassimapput. Qinnutigut Guutip iluarissappagit ‘piumasaanut naapertuuttumik’ qinusariaqarpugut. Piumasai suunersut paasiumallugit Jehovalu ilisarisimallualerumallugu Biibili atuaqqissaartariaqarparput. Taamaaliorutta Guutip qinnutigut iluarissavai.
QINNUTITSINNUT ILANNGUSSINNAASAGUT
Pisariaqartitagut. Ullormut pisariaqartitagut – soorlu nerisassat, atisat ineqarnerlu – qinnutigisarsinnaavagut. Eqqortumik aalajangiinissamut ilisimassuseqaqqulluta misilinneqarnitsinnilu pinertusaarsinnaaqqulluta qinusinnaavugut. Aamma uppersuseqarnissarput, isumakkeerfigineqarnissarput Guutimillu ikiorneqarnissarput qinnutigisinnaavagut. – Lukasi 11:3, 4, 13; Jaaku 1:5, 17.
Qinnussineq. Angajoqqaat asannittut qitornamik asaqatigiinnerat nuannaarutigisarpaat. Taamatuttaaq Jehovap kissaatigaa qitornani nunarsuarmiittut soqutigeqatigiillutillu isumassoqatigiissasut. Aappatta, qitornatta, ilaquttatta ikinngutittalu qinnuttarnissaat naleqquppoq. Ajoqersugaq Jaaku allappoq ‘immitsinnut qinnuteqatigiittassasugut’. – Jaaku 5:16.
Qujaniarneq. Pinngortitsiserput pillugu Biibilimi ima allassimasoqarpoq: ‘Ajunngitsuliornermigut tunisarpaasi qilammit sialummik ullunillu naalluarfiusunik, qaarsillartittarlusi uummatisilu nuannaartittarlugit.’ (Apustilit Suliaat 14:17) Uagut pilluta Guutip iliuuserisimasarpassui eqqarsaatigigutsigit qinunikkut qujaffiginissaanut killinneqassaagut. Soorunami aamma inooriaatsitsigut qujamasunnerput ersersittariaqarparput. – Kolossemiut 3:15.
QINUJUARIT ERINITSAJUILLUTILLU
Qamannga pisumik qinnutitta ilaasa ingerlaannaq akineqartannginnerat pissutigalugu ilaannikkut nikallortarsinnaavugut. Taava isummissaagut Guutip soqutiginngikkaatigut? Naamik, qinujuartariaqarpugut! Tamanna misigisanit tulliuttunit erserpoq.
Steve, allaaserisami siullermi eqqaaneqartoq, ima nassuerpoq: “Qinusarsimanngitsuugaluaruma pillualeqqinnissannut qangarsuarli neriuutaarutivissimassagaluarpunga.” Biibilimilli atuaqqissaartalerami ilikkarpaa qinujuartariaqarluni. Ima nangippoq: “Ikinngutima asannillutik tapersersuisarnerat pillugu Guuti qinunikkut qutsavigisarpara. Inuutillunga aatsaat taama pilluartigaanga.”
Jenny, eqqaaneqareersoq, Guutimit tusarneqarnissaminut naleqqutinngitsutut misigivoq. Ima oqarpoq: “Ajornerpaaffinni Guuti kimigiiserfigaara paasiteqqullunga sooq taama naleqanngitsigisutut misigisarnersunga.” Qinuneq qanoq iluaqutigaa? “Guutip uannik isiginnittaasiatut imminut isiginnittaaseqarnissannut iluaqutigaara. Paasivara imminut ajorigaluartunga Guutip ajorinngikkaanga. Tamanna qinujuarnissannut iluaqutigaara. Qinusarnikkut paasilerpara Jehova tassaasoq Guuti ilumoortoq asannittorlu, Ataataq Ikinngullu, taassumalu piumasaatut iliorniartuaruma uannik ikiuerusuttuartoq.”
Aamma Isabelip nalaataa maluginiaruk. Naartulerami nakorsanit oqarfigineqarpoq meerassaa innarluuteqangaarluni inunngussasoq. Aliasungaarpoq. Allaallumi naartuerseqqullugu inuit ilaannit siunnersorneqarpoq. “Naalliungaarama isumaqaleraluarpunga toqulerlunga.” Qanoq iliorpa? “Guutimut ikioqqullunga qinusaqattaarsuataarpunga.” Ernertaavalu Gerard innarluuteqarluni inunngorpoq. Isabel misigiva qinnutini Guutimit akineqartut? Aap. Qanoq? Ima oqaluttuarpoq: “Ernera, maannakkut 14-inik ukiulik, innarluuteqaraluarluni nuannaartoq takugaangakku paasisarpara taanna tassaasoq qinnutima akissutaat nuannernerpaaq Jehovamillu Guutimit pilluaqqussutisiama annerpaartaat.”
Misigisat taamaattut tussiaasiortup oqaasiinik eqqaasinneqaatigaagut: “Tusarpat ikiortariallit kissaatigisaat, Naalagaq, nakussatsippatit tusaaniarlugillu.” (Tussiaat 10:17) Ilumullumi, Guutimut qinujuarnissamut pissutissaqarluarpugut!
Jiisusip qinnutaasa ilarpassui Biibilimi allanneqarsimapput. Taakkunanngalu ilisimaneqarnerpaajugunarpoq ajoqersukkaminut ilinniartitsissutigisaa. Qinnut taanna qanoq ilinniarfigisinnaavarput?