Sooq Naalakkap unnukkorsiortitsinera eqqaaniarneqassava?

„Naalakkamit uannut kingornussassiissutigineqarpoq ilissinnuttaaq ingerlateqqitara manna.“ — 1 KORINTHIMIUT 11:23.

1, 2. Ukiumi 33-mi poorskisiummik nereqatigiinnerup kingorna Jiisusi qanoq iliorpa?

JEHOVAP ernitua najuuppoq. Tassaniipputtaaq angutit 11-t ’misilinneqarfigisaani taassumunnga najuuttuartut’. (Lukasi 22:28) Ukiumi 33-mi sisamanngorneruvoq, marsip ulluisa 31-at, qaammatillu imissisimasup Jerusalemip qulaani unnuakkut qilak qaammarsarsimagunarpaa. Jiisusi Kristusip apustiliisalu juutit poorskiat nalliuttorsiutigeqqammerpaat. Killuussisoq Judasi anisinneqarpoq, sinnerili uninngagallarput. Jiisusimi pingaaruteqarluinnartumik iliuuseqarniarpoq. Susoqalersoruna?

² Iivangkiiliumik allattoq Matthæusi najuuppoq, imalu oqaluttuarpoq: „Jiisusip timiusaq tiguaa pilluaqqusillunilu aggorpaa, ajoqersukkaminullu tunniuppaa oqarlunilu: ’Tigusiuk nerillugulu; tassa timiga.’ Ermuserlu tiguaa qujallunilu taakkununnga tunniuppaa oqarlunilu: ’Tamassi tassannga imeritsi, taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik.’“ (Matthæusi 26:26-28) Taamani pisimasoq ataasiaannarluni pisussaava? Pisimasoq qanoq pingaaruteqarpa? Ullumikkut uagutsinnut pingaaruteqarpa?

„Taamaaliortaritsi“

3. Sooq Jiisusip ukiumi 33-mi nisanip ulluisa 14-ianni unnukkut iliuusia taama pingaaruteqartigiva?

³ Jiisusip ukiumi 33-mi nisanip 14-iani iliuusia inuunerani nalaatsornerinnakkut pinngilaq. Apustili Paulusip pisimasoq tamanna sammivaa kristumiut tanitat Korinthimiittut, ukiut 20-t sinnerlugit tamatuma kingorna Jiisusip maleruaqqusaa malillugu nalliuttorsiortartut, allaffigigamigit. Paulusip ukiumi 33-mi Jiisusi apustilillu aqqanillit ilaginngilai, apustililli ilaasa taamani qanoq pisoqarsimaneranik oqaluttuussimassavaat. Aamma isumassarsisitaalluni Paulusi unnummi tassani qanoq pisoqarneranik paasitinneqaqqissimassagunarpoq. Ima allappoq: „Naalakkamimmi uannut kingornussassiissutigineqarpoq ilissinnuttaaq ingerlateqqitara manna: Naalakkap Jiisusip unnuaq taanna pisitaagami timiusaq tiguaa, qujallunilu aggorpaa oqarlunilu: ’Tassa timiga pillusi tunniunneqartoq; taamaaliortaritsi uanga eqqaaniarlunga.’  Taamatuttaaq nerereeramik ermuseq tiguaa oqarlunilu: ’Ermuseq manna tassa uanga aakkut angerusisaaq, taamaaliortaritsi imeraangassiuk uanga eqqaaniarlunga.’“ — 1 Korinthimiut 11:23-25.

4. Sooq kristumiut Naalakkap unnukkorsiortitsinera eqqaaniarlugu nalliuttorsiortariaqarpat?

⁴ Iivangkiiliumik allattup Lukasip uppernarsarpaa Jiisusi ima peqqusisimasoq: „Taamaaliortaritsi uanga eqqaaniarlunga!“ (Lukasi 22:19) Taamaattumik pisimasoq tamanna Kristusip toquneranik eqqaaniaalluni nalliuttorsiornermik imaluunniit eqqaaniaanermik taaneqarajuttarpoq. Paulusip nalliuttorsiorneq aamma „Naalakkap unnukkorsiortitsineranik“ taavaa, tamannalu naleqquppoq nalliuttorsiorneq unnukkut pilersinneqarsimammat. (1 Korinthimiut 11:20, NV) Kristumiut Naalakkap unnukkorsiortitsinera nalliuttorsiutigisaqqullugu peqquneqarsimapput. Kisianni sooq nalliuttorsiorneq taanna pilersinneqarpa?

Sooq eqqaaniaalluni nalliuttorsiorneq pilersinneqartoq

5, 6. (a) Jiisusip eqqaaniaalluni nalliuttorsiornermik pilersitsineranut suna pissutaaqataava? (b) Naalakkap unnukkorsiortitsineranik pilersitsinermut pissutaaqataasoq alla sunaava?

⁵ Jiisusi Ataatami qilammiusup qilammi nunamilu kisimi oqartussaaneranik illersuiniarluni toquvoq, tamannalu eqqaaniaalluni nalliuttorsiornerup pilersinneqarneranut pissutaaqataavoq. Toqunermigut Jiisusip uppernarsarpaa Saatani Diaavulu sallutuujusoq, taannami sallulluni oqarsimammat inuit namminissarsiornerinnarmik pissuteqarlutik Guuti kiffartorfigigaat. (Jobi 2:1-5) Jiisusi aalajaalluni toqummat taamaannginnera uppernarsarneqarpoq, Jehovamut nuannaarutaangaartumik. — Ussatit 27:11.

⁶ Naalakkap unnukkorsiortitsineranik pilersitsinermut pissutaasoq alla tassaavoq Naalakkap unnukkorsiortitsinerata eqqaasissagaatigut, Jiisusip inuttut naammalluinnartutut ajorteqanngitsutullu toqunermigut ’inuunini akissatut tunniukkaa amerlasuut utertinneqaatissaattut’. (Matthæusi 20:28) Inuk siulleq Guutimut ajortuliorami, inuttut naammalluinnartutut inuunini, naammalluinnartutullu periarfissani tamaasa ilanngullugit, annaavaa. Jiisusili oqarpoq: „Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi 3:16) Taamaattumik ilumoortumik allassimavoq: „Ajortimmi akissarsiarititaa tassa toqu, Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.“ (Romamiut 6:23) Naalakkap unnukkorsiortitsinera najuuffigigaangatsigu, Jiisusip pilliutitut toquneranut atatillugu Jehovap erneratalu iliuutsimikkut asanningaarnerannik eqqaasinneqartarpugut. Asanninneq taama angitigisoq ilumut pingaartittariaqarparput.

Qaqugukkut nalliuttorsiutigineqartassava?

7. Kristumiut tanitat eqqaaniaalluni nalliuttorsiornermi ilangiigaangamik Naalakkap toqua nalunaajaatigisaraat qanoq paasisariaqarpa?

⁷ Paulusi Naalakkap unnukkorsiortitsineranut atatillugu allappoq: „Timiusamimmi tamatuminnga nerisaraangassi ermutsimillu tamatuminnga imeraangassi Naalakkap toqua nalunaajaatigisarparsi, tikiutserlugu.“ (1 Korinthimiut 11:26) Kristumiut tanitat toqunissartik tikillugu assersuutinik ilangiisartussaapput. Taamaalillutik Guutip Jiisusip toquneragut pilliummik utertitsissutissamik pilersitsineranut uppernertik Jehova Guutimut silarsuarmullu arlaleriaqalutik nalunaajaatigisarpaat.

8. Katersat kristumiut tanitat qaqugumut eqqaaniaallutik nalliuttorsiortartussaappat?

⁸ Kristumiut tanitat qaqugumut Jiisusip toqunera eqqaaniarlugu nalliuttorsiortartussaappat? Paulusi allappoq: „Tikiutserlugu“, tamannalu isumaqarunarpoq eqqaaniaalluni nalliuttorsiortoqartassasoq Jiisusip najuunnermini ajoqersukkani tanitat qilammi inuunissamut makitinniarlugit tikiunnissaata tungaanut. (1 Thessalonikamiut 4:14-17) Tamanna Jiisusip apustiliminut aalajaatsunut aqqanilinnut oqaasiinut naleqquppoq: „Inissassinnillu piareersaakkiartoreerussi tikiuteqqikkumaarpunga uannullu pisikkumaarlusi ilississaaq uanga najugarisanneeqqullusi.“ — Johannesi 14:3.

9. Jiisusip Markusi 14:25-mi oqaasii qanoq paasisariaqarpat?

⁹ Jiisusip eqqaaniaalluni nalliuttorsiortarnissaq pilersikkamiuk, ermuseq viinnimik imalik uparuarlugu apustilini aalajaatsut oqarfigai: „Viinnequtip inerititaanit imeqqinngisaannassaanga ulloq  Guutip naalagaaffiani nutaamik imerfissara nalliutserlugu.“ (Markusi 14:25) Qilammi eqqortumik oqaatigalugu viinnisorsinnaassannginnami, Jiisusip taama oqarluni nuannaarneq viinnimut assersuutigineqarajuttoq eqqarsaatigigunarpaa. (Tussiaat 104:15; Oqaluussisartup oqaasii 10:19) Jiisusip ajoqersugaasalu Naalagaaffimmi ataatsimoorsinnaanissartik qilanaarutigalugulu nuannaarutigingaassavaat. — Romamiut 8:23; 2 Korinthimiut 5:2.

10. Eqqaaniaalluni nalliuttorsiortarneq qanoq akulikitsigisariaqarpa?

¹⁰ Jiisusip toqunera qaammatit tamaasa, sapaatip-akunneri tamaasa imaluunniit ullut tamaasa eqqaaniarneqartariaqarpa? Naamik. Jiisusip Naalakkap unnukkorsiortitsinera pilersippaa toqutaallunilu ullormi juutit poorskisiorneranni, ullormi Israelikkut ukiumi 1513-imi u.n.s. Egyptenimi inussiaataanerannit aniguisitaasimanerannik ’eqqaaniaaffiusumi’. (2 Mosesi 12:14) Juutit poorskiat ukiut tamaasa ataasiaannarluni nalliuttorsiutigineqartarpoq, tassa qaammatip nisanip ulluisa 14-ianni. (2 Mosesi 12:1-6; 3 Mosesi 23:5) Tamatuma takutippaa Jiisusip toqunera poorskisiortarnertut — tassa ukiumut ataasiaannarluni — taamaallaat nalliuttorsiutigineqartartussaasoq, qaammatit, sapaatip akunneri ullulluunniit tamaasa pinnani.

11, 12. Itsaq eqqaaniaalluni nalliuttorsiortarnerup qanoq akulikitsigisarsimanera pillugu oqaluttuarisaanermit qanoq paasitinneqarpugut?

¹¹ Taamaattumik ukiumut ataasiaannarluni, nisanip 14-iani, eqqaaniaalluni nalliuttorsiortarneq naleqquppoq. Qinerlerfissiami allassimavoq: „Kristumiut Asiaaqqamiittut quartodecimanerinik [14-ianik pingaartitsisunik] taaneqartarput nisanip 14-iani pascha [Naalakkap unnukkorsiortitsinera] nalliuttorsiutigiuartaramikku. . . . Ulloq taanna tallimanngornerusinnaavoq imaluunniit sapaatip-akunnerisa ulluini allami sorlermiluunniit pisinnaalluni.“ — The New Schaff-Herzog Encyclopedia of Religious Knowledge, atuagaq IV, qupperneq 44.

¹² Quartodecimanerit ukiuni 100-kkunni ukiunik naatsorsuisarnitta kingorna Naalakkap unnukkorsiortitsineranik nalliuttorsiutiginneriaasiat pillugu oqaluttuarisaanermik ilisimatooq J. L. von Mosheim oqarpoq, nisanip 14-iani eqqaaniaallutik nalliuttorsiortartut „Kristusip maligassiuinera inatsisitulli pingaaruteqartigisutut isigigamikku“. Oqaluttuarisaanermik ilisimatooq alla oqarpoq: „Asiaaqqami quartodecimanerit ilagiivisa Jerusalemimi ilagiit isumaqatigilluinnarpaat. Ilagiit taakkua ukiuni 100-kkunni nisanip 14-iani pascha nalliuttorsiutigigaangamikku, taamaaliortarput utertitsissut Jiisusip toquneratigut pilersinneqartoq eqqaaniarumallugu.“ — Studia Patristica, atuagaq V, 1962, qupperneq 8.

Timiusap isumaa

13. Jiisusip Naalakkap unnukkorsiortitsinera pilersikkamiuk, timiusaq qanoq ittoq atorpaa?

¹³ Jiisusip eqqaaniaalluni nalliuttorsiortarnissaq pilersikkamiuk, „timiusaq tiguaa, pilluaqqusillunilu aggorpaa“ apustilinullu tunniullugu. (Markusi 14:22) Timiusaq taamani atorneqarsinnaasoq, tassaasimassaaq timiusaq poorskisiummik unnukkorsiornermi aatsaat atorneqartartoq. (2 Mosesi 13:6-10) Seernarsaateqanngitsumik iffiugaagami, saappoq sikallunilu, taamaattumillu allanut tunniutsinnagu aggorneqartariaqarpoq. Jiisusip tupinnartuliorluni inuit tusindilikkuutaat timiusanik nerisimmagit, timiusat aamma sikapput, tassami agguaassinnaajumallugit aggortariaqarpai. (Matthæusi 14:19; 15:36) Taamaattumik eqqaaniaalluni nalliuttorsiornermi timiusap aggorneqarnera assersuutaasumik isumaqartinneqarunanngilaq.

14. (a) Sooq timiusap eqqaaniaalluni nalliuttorsiornermi atorneqartartup seernarsaateqannginnera naleqquttuua? (b) Eqqaaniaalluni nalliuttorsiornissamut timiusaq qanoq ittoq pisiarineqarsinnaava, imaluunniit qanoq timiusaliortoqarsinnaava?

 ¹⁴ Timiusaq eqqaaniaalluni nalliuttorsiortarnerup pilersinneqarnerani atorneqartoq pillugu Jiisusi ima oqarpoq: „Tassa timiga pillusi tunniunneqartoq.“ (1 Korinthimiut 11:24; Markusi 14:22) Timiusap seernarsaateqannginnera naleqquttuuvoq, seernarsaat ajussutsimut ajortimulluunniit assersuutaasinnaammat. (1 Korinthimiut 5:6-8) Timiusaq Jiisusip timaanut naammalluinnartumut ajorteqanngitsumut, pilliutitut utertitsissutitut tunniunneqartumut, assersuutaavoq. (Hebræerit 7:26; 10:5-10) Jehovap Nalunaajaasuisa Jiisusip maligassiaa malittarpaat eqqaaniaalluni nalliuttorsiornermi timiusaq seernarsaateqanngitsoq atorlugu. Juutit matzosiliaat akuutissartaqanngitsut, allanik saniatigut, soorlu manninnik uanitsunilluunniit, akuugaanngitsut, atorneqarsinnaapput. Aamma nammineq timiusaliortoqarsinnaavoq seernarsaateqanngitsumik, karrinit ilivitsunit qajuusaliamerngit imililaarlugit. Naqittagaq saattunnguanngorlugu tasitsarneqartariaqarpoq kaagiliorfimmilu taninneqarsimasumi uunneqarsinnaalluni panernissami sikattunngornissamilu tungaanut.

Viinnip isumaa

15. Jiisusip toqunini pillugu eqqaaniaalluni nalliuttorsiortarnissaq pilersimmagu, ermutsip suna imeraa?

¹⁵ Timiusaq seernarsaateqanngitsoq agguaatereerlugu, Jiisusip ermuseq tiguaa, „qujallunilu [apustilinut] tunniuppaa; tamarmillu tassannga imerput“. Ima nassuiaappai: „Tassa aaga, angerutsip aava, amerlasuut pillugit kuineqartussaq.“ (Markusi 14:23, 24) Ermutsip suna imaraa? Viinni, viinnissat tunguat qappiorsimasoq. Biibilimi viinni eqqaaneqaraangami, viinnissat tunguat qappiorsimaqanngitsoq pineqartanngilaq. Assersuutigalugu, Jiisusip assersuusiaani taamaallaat viinnip, viinnissap tunguataanngitsoq, ’puut amiusut pisoqqat’ qartorartissinnaavai. Aamma Jiisusi akeraasa ’imerajuttuunerarpaat’. Pasilliineq isumaqarsimassanngikkaluarpoq viinni viinnissat tunguinnaasimasuuppat. (Matthæusi 9:17; 11:19) Juutit poorskisioraangamik, viinnisortarput, Jiisusillu viinni taanna atorpaa toqunini pillugu eqqaaniaalluni nalliuttorsiortarnissaq pilersikkamiuk.

16, 17. Viinni qanoq ittoq eqqaaniaalluni nalliuttorsiornermi atorneqarsinnaava, aamma sooq?

¹⁶ Taamaallaat viinni aappalaartoq ermutsip imaanut assersuutigineqartumut, tassa Jiisusip aavanut kuisamut, naleqquttumik assersuutaavoq. Nammineq oqarpoq: „Tassa aaga, angerutsip aava, amerlasuut pillugit kuineqartussaq.“ (Markusi 14:23, 24) Apustili Petrusip kristumiut tanitat ilaat allaffigai: „Ilisimavarsi ileqqussinnit piunngitsunit siuaasassinnit kingornussassinnit utertinneqarsimannginnassi sølvi kuultiluunniit nungujasut akigalugit, akiliunneqarsimallusili Kristusip aavanik erlinnartumik, soorlu savaaqqap assuarnaatsup innarluuteqanngitsuusullu aavanik.“ — 1 Petrusi 1:18, 19.

¹⁷ Jiisusip qularnanngitsumik viinni aappalaartoq viinnissat tunguannit sanaaq atorpaa eqqaaniaalluni nalliuttorsiortarnissaq pilersikkamiuk. Ullumikkulli viinnit aappalaartut ilaat atorneqarsinnaanngillat imigassamik sakkortunerulersinneqartaramik, imaluunniit akuutissanik naasunilluunniit akusaagamik. Jiisusip aava immini naammappoq. Allamik ilaneqartariaqanngilaq. Taamaattumik viinni kimittooq, soorlu portvini, sherry vermouthiluunniit, atorneqarsinnaanngilaq. Viinni aappalaartoq, sukkulerneqanngitsoq, imigassamik akoqanngitsoq, atorneqartariaqarpoq. Viinnissanit nammineq viinniliaq aappalaartoq, sukkulerneqanngitsoq, aamma viinni soorlu bourgogne bordeauxiluunniit aappalaartoq, atorneqarsinnaavoq. Kalaallit Nunaanni nammineq viinniliorneq inerteqqutaavoq.

18. Sooq Jiisusi Naalakkap unnukkorsiortitsinerani timiusamut viinnimullu atatillugu tupinnartuliunngila?

¹⁸ Jiisusip nereqatigiinneq tamanna pilersikkamiuk, assersuutaasut piviusumik neqinngortillugit aanngortillugillu tupinnartuliunngilaq. Inuup neqaanik nerineq aavanillu imerneq inuttuumanerussagaluarpoq Guutillu inatsisaanik unioqqutitsinerulluni. (1 Mosesi 9:3, 4; 3 Mosesi 17:10) Jiisusi suli inuttut tamakkiisumik timeqarlunilu aaqarpoq. Aqaguani ualikkut (juutit ullorsiutaat naapertorlugu suli nisanip 14-iaavoq) timaa naammalluinnartutut pilliutigineqarpoq aavalu kuineqarluni. Taamaattumik timiusaq viinnilu eqqaaniaalluni  nalliuttorsiornermi atorneqartut, Jiisusip timaanut aavanullu assersuutaannaapput. *

Eqqaaniaalluni nalliuttorsiorneq — nereqatigiinneq

19. Sooq immiartorfiit puuguttallu eqqaaniaalluni nalliuttorsiornermi atorneqartut amerlanerusinnaappat?

¹⁹ Jiisusip eqqaaniaalluni nalliuttorsiortarnissaq pilersikkamiuk, apustilini aalajaatsut ermutsimit ataasiinnarmit imeqquai. Matthæusip iivangkiiliuani atuarpugut: „Ermuserlu [Jiisusip] tiguaa qujallunilu taakkununnga tunniuppaa oqarlunilu: ’Tamassi tassannga imeritsi.’“ (Matthæusi 26:27) Ermuseq ataaseq naammappoq taamani aqqaniliinnaat ilangeeqataammata, qularnanngitsumillu nerriveqatigiimmata ermuserlu allanut isaateriaannaallugu. Ukioq manna millionilikkuutaat Jehovap Nalunaajaasuisa ilagiivini nunarsuaq tamakkerlugu 94.000-init amerlanerusuni Naalakkap unnukkorsiortitsineranut najuutissapput. Unnummi tassani nalliuttorsioqataasussat taama amerlatigissammata, ermuseq immiartorfilluunniit ataaseq soorunami naammassanngilaq. Taamaattumik immiartorfiit arlallit atorneqarsinnaapput piffissami sivisuallaanngitsumi najuuttunut ingerlaartinneqarsinnaaqqullugit. Aamma timiusamut puuguttat arlallit atorneqarsinnaapput. Biibilimi allaatigineqanngilaq ermuseq immiartorfilluunniit aalajangersimasumik iluseqartariaqartoq. Immiartorfilli puugutarlu nalliuttorsiornerup ataqqinassusianut naapertuuttariaqarput. Silatusaarnerussaaq immiartorfiup viinnimik immerpallaannginnissaa ingerlaartinneqaleruni userartuannginniassammat.

20, 21. Sooq oqartoqarsinnaava eqqaaniaalluni nalliuttorsiorneq nereqatigiinnerusoq?

²⁰ Naak timiusamut puuguttat amerlanerusut viinnimullu immiartorfiit amerlanerusut atorneqaraluartut, eqqaaniaalluni nalliuttorsiorneq nereqatigiinneruvoq. Israelitoqqami angutip nereqatigiissutissaq sassaassinnaavaa uumasoq Guutip naalaffiutaanukaallugu, tassanilu toqunneqartillugu. Uumasup ilaa pilliivimmi ikuallanneqartarpoq. Palasi kiffartortoq ilaanik tunineqartarpoq, Aronillu erneri, palasit, aamma ilaanik tunineqartarput. Pilliisup inoqutini pilliummik nereqatigiinnermi immikkut ittumi sinneruttumik nereqatigisinnaavai. (3 Mosesi 3:1-16; 7:28-36) Eqqaaniaalluni nalliuttorsiorneq aamma nereqatigiinneruvoq peqatigiinneq pineqarmat.

²¹ Jehova peqatigaat taassuma aaqqissuussineq tamanna pilersimmagu. Jiisusi pilliutaavoq, kristumiullu tanitat peqatigiinnut ilannguttarput assersuutinik ilangiigaangamik. Jehovap nerriviani nerinerat ima paasisariaqarpoq taanna eqqisseqatigigaat. Taamaattumik Paulusi ima allappoq: „Pilluaqqussutip ermusia pilluaqqusartagarput Kristusip aavanut peqatigiissutaannginnerpa? Timiusaq aggortagarput Kristusip timaanut peqatigiissutaannginnerpa? Timiusaq ataasiummat tamatta timiuvugut ataaseq, tamatta timiusaq ataaseq ilangiiffigigatsigu.“ — 1 Korinthimiut 10:16, 17.

22. Eqqaaniaalluni nalliuttorsiornermut atatillugu apeqqutit suut suli akineqanngillat?

²² Naalakkap unnukkorsiortitsinera Jehovap Nalunaajaasuisa ukiumoortumik nalliuttorsiutigisartagatuaraat. Tamanna naleqquppoq Jiisusip ajoqersukkani ima peqqummagit: „Taamaaliortaritsi uanga eqqaaniarlunga!“ (Lukasi 22:19) Eqqaaniaalluni nalliuttorsiornermi Jiisusip toqunera, Jehovap kisimi oqartussaaneranut illersuutaalluartoq, eqqaaniartarparput. Soorlu paasereeripput, nereqatigiinnermi tamatumani timiusaq timimut Jiisusip pilliutigisaanut assersuutaavoq, viinnilu aavanut kuisamut assersuutaalluni. Ikittuararsuilli timiusamik nereqataapput viinnimillu imeqataallutik. Sooq taamaappa? Eqqaaniaalluni nalliuttorsiorneq ilumut millionilikkuutaanut nereqatigiinnermi ilangiisussaanngitsunut pingaaruteqarpa? Naalakkap unnukkorsiortitsinera ilinnut qanoq pingaaruteqartariaqarpa?

[Quppernerup ataani ilanngussaq]

Uteqqiinermi apeqqutit

• Sooq Jiisusip Naalakkap unnukkorsiortitsinera pilersippaa?

• Eqqaaniaalluni nalliuttorsiortarneq qanoq akulikitsigisariaqarpa?

• Eqqaaniaalluni nalliuttorsiornermi timiusaq seernarsaateqanngitsoq sumut assersuutaava?

• Viinni sumut assersuutaava?

[Atuaqqissaarnermi apeqqutit]

[Qupp. 23-mi assiliartaq]

Jiisusip Naalakkap unnukkorsiortitsinera pilersippaa