Kikkut qilaliassappat?
Akissut Biibilimeersoq
Guuti kristumiunik aalajaatsunik toqunermik kingorna qilammut makititaasussanik toqqaasimavoq, toqqakkallu taakku amerlassutsimikkut killeqarput. (Petrusimit 1. 1:3, 4) Toqqarneqartullu qilammi akissarsiassartik annaassanngikkunikku upperluartuujuartariaqarlutillu minguitsumik inooriaaseqartariaqarput. – Efesossimiut 5:5; Filippimiut 3:12-14.
Qilammut makititaasut sulerissappat?
Jiisusi ukiuni 1.000-ni kunngioqatigalugulu palasioqatigissavaat. (Saqqummersitat 5:9, 10; 20:6) Tassaalissapput “qilak nutaaq” – tassa qilammi naalakkersuisut. Taakkulu ‘nunarsuaq nutaaq’ – tassa nunarsuarmi inuusut – naalakkersussavaat. Qilammilu naalakkersuisut taakku Guutip aallaqqaammut inunnut siunertaa naapertorlugu inuit naapertuilluartumik atugaqarteqqilissavaat. – Esaja 65:17; Petrusimit 2. 3:13.
Qilammut makititaasut qassiussappat?
Biibilimi ersersinneqarpoq qilammut makititaasussat 144.000-ussasut. (Saqqummersitat 7:4) Apustilip Johannesip takorluuisitaalluni takuaa “Savaaraq qaqqami Ziionnimi nikorfasoq, ilagaalu 144.000-t”. (Saqqummersitat 14:1-3) Takorluukkami tamatumani “savaaraq” tassaavoq Jiisusi makititaasimasoq. (Johannesi 1:29; Petrusimit 1. 1:19) ‘Qaqqaq Ziionni’ tassaavoq Jiisusip naalakkersueqataasalu 144.000-usut qilammi sumiiffiat. – Tussiaat 2:6; Hebræerit 12:22.
Guutip kunngeqarfiani Kristusip naalakkersueqatissaatut ‘qaaqqusat toqqakkallu’ taakku ‘savarpannguanik’ taaneqarput. (Saqqummersitat 17:14; Lukkarsi 12:32) Tamatumannga erserpoq Jiisusip savaataanut tamarmiusunut sanilliullugit amerlavallaanngitsut. – Johannesi 10:16.
Qilaliartussat pillugit kukkusumik isummernerit
Kukkusoq: Inuit ajunngitsut tamarmik qilaliassapput.
Eqqortoq: Guutip neriorsuutigaa inuit ajunngitsut amerlanerpaartaat nunarsuarmi naassaanngitsumik inuussasut. – Tussiaat 37:11, 29, 34.
Jiisusi ima oqarpoq: “Kinaluunniit qilaliarsimanngilaq.” (Johannesi 3:13) Taama oqarnermigut ersersippaa inuit ajunngitsut nammineq toqunini sioqqulluni toqusimasut, soorlu Aaperaat, Moorsisi, Juubi Daavilu, qilaliarsimanngitsut. (Apustilit Suliaat 2:29, 34) Nunarsuarmili inuusussatut makititaanissamik neriuuteqarput. – Esaja 26:19.
Qilammut makititaaneq ‘makititsinermik siullermik’ taaneqarpoq. (Saqqummersitat 20:6) Tamatumannga erserpoq allamik makititsineqassasoq. Makititsinerlu tamanna nunarsuarmut makititsinerussaaq.
Biibilimi ilinniartitsissutigineqarpoq Guutip Kunngeqarfiata naalakkersuinerani ‘toqu atuukkunnaassasoq’. (Saqqummersitat 21:3, 4) Toqu qilammi atuutinngisaannarsimammat neriorsuut tamanna nunarsuarmi inuunermut tunngasimassaaq.
Kukkusoq: Inuit tamarmik nammineq aalajangissavaat qilammi nunarsuarmiluunniit inuussanerlutik.
Eqqortoq: Guutip aalajangertarpaa kristumiut aalajaatsut kikkut “qilaliaqquneqartut akissarsiassaat” pissaneraat, tassa kikkut qilaliarnissamik neriuuteqassanersut. (Filippimiut 3:14) Inuup nammineq kissaataa piumassusialluunniit qilaliartussatut toqqarneqarnissamut aalajangiisuunngilaq. – Matiusi 20:20-23.
Kukkusoq: Nunarsuarmi naassaanngitsumik inuunissamik neriuut pilerinannginneruvoq, qilaliarnissamullu naleqqutinngitsut kisimik neriuutigaat.
Eqqortoq: Guutip inuit nunarsuarmi inuusussatut toqqakkani ‘innuttaminik, qinikkaminik Jehovallu pilluaqqusaanik’ taavai. (Esaja 65:21-23) Taakku eqquutitissavaat Guutip aallaqqaammut inunnut siunertaa, tassa naammalluinnartuulluni naassaanngitsumik nunarsuarmi paratiisiusumi inuuneq. – Mosesimik 1. 1:28; Tussiaat 115:16; Esaja 45:18.
Kukkusoq: Kisitsit 144.000 Saqqummersitani allassimasoq assersuutaannaavoq.
Eqqortoq: Kisitsisit Saqqummersitani allassimasut ilaat assersuutaannaapput, allalli assersuutaanngillat. Assersuutigalugu allassimavoq “Savaaqqap apustiliisa aqqaneq-marluk aqqi”. (Saqqummersitat 21:14) Kisitsisip 144.000-p allassimaneratut paasisassaaneranut tunngavilersuutit sammeriartigit.
Saqqummersitat 7:4-mi allassimavoq “144.000-t naqissuserneqartut”, tassa qilaliarnissaminnik uppernarsaavigineqartut. Inuit eqimattat allat amerlassutsimikkut taakkunannga allaanerulluinnarnerat pillugu kapitalimi tassani versit tulliuttut ilaanni ima allassimavoq: “Inupparpassuit … kimilluunniit kisinneqarsinnaanngitsut.” Guutip “inupparpassuit” taakku aamma annaatissavai. (Saqqummersitat 7:9, 10) Kisitsit 144.000 assersuutaannaappat inuppassuarnut kisinneqarsinnaanngitsunut innersuussutaaginnarluni taava eqimattat marluunerarneqarnerat isumaarutissaaq. a
Aammattaaq 144.000-t ‘inerittutut siullertut inuit akorngannit pisiarineqartutut’ allaatigineqarput. (Saqqummersitat 14:4) “Inerittutut siullertut” allaatigineqarnerannit erserpoq tassaasut toqqakkat ilaat amerlanngitsut. Kristusip qilammi naalakkersueqatissai “inerittutut siullertut” taaneqarnerat naleqquppoq. Qilammiit naalakkersuisussat taakku inunnut qassiunerannik eqqaaneqanngitsunut nunarsuarmiittunut naalakkersuissapput. – Saqqummersitat 5:10.
a Tamatumunnga assingusumik kisitsisip 144.000-p Saqqummersitat 7:4-mi eqqaaneqarneranut tunngatillugu professori Robert L. Thomas ima allappoq: “Kisitsisitaqartumik amerlassusiliineq 7:9-mi kisitsisitaqanngitsumik amerlassusiliinermit allaanerulluinnarpoq. Assersuutaannaappat atuakkami kisitsisit tamarmik assersuutaannaasimassapput.” – Revelation 1-7: An Exegetical Commentary, qupp. 474.