Kala Kyasoneka Luka 22:1-71
-
Akunji a makota afunya ndunge yakujibha Jezú (1-6)
-
Kuyudika o Phasu yasukina (7-13)
-
O Seyalu yadyanga ya Ngana (14-20)
-
“O muthu wanda ngi sumbisa, wala kumoxi n’eme ku meza” (21-23)
-
O maxibulu azoka se nanyi wexile o dikota mudyâ (24-27)
-
Jezú ubhanga kikutu kyalungu ni utuminu (28-30)
-
Jezú ukanena kwila Phetele wanda mudituna (31-34)
-
Kubhinga kudisokejeka; jixibhata jiyadi (35-38)
-
Musambu wa Jezú mu Mulundu wa Midiva (39-46)
-
Jezú amukuta (47-53)
-
Phetele udituna Jezú (54-62)
-
Jezú a mu sebhulula (63-65)
-
A mu fundisa mu inzo ya kufundisa (66-71)
22 O kithangana kya Fesa ya Jimbolo ja Kambe Felemendu,* a ixana Phasu, kya zukamene.
2 O akunji a makota ni jimesene ja kulonga o Kijila, akexile musota ndunge yambote phala kujibha Jezú, mukonda akexile ni wôma wa mundu.
3 Satanaji wabokona ku muxima wa Juda dya Kadyota, watokalele we ku kwinyi ni kiyadi kya jipoxolo.
4 Mwene wayi ku akunji a makota ni ku jikabhitangu ja tembulu phala kuzwela nawu yalungu ni kyebhi kyeji sumbisa Jezú.
5 Ene asanguluka ni njimbu yiyi, anga axikina ku mubhana kitadi kya phalata.
6 Kyenyiki mwene waxikina, yu wamateka kusota ndunge phala ku mu sumbisa kwa ene sé muthu ku k’ijiya.
7 O kizuwa kya Fesa ya Jimbolo ja Kambe Felemendu kyabhixila. O athu akexile mu satela o yama ya Phasu.
8 Jezú watumikisa Phetele ni Nzwá, yu wa atangela: “Ndenu, mu yudike o Phasu ni tu idye.”
9 Ene a mwibhwidisa: “Wamesena tu i yudikila kwebhi?”
10 Mwene wa ambela, wixi: “Ivwenu! Kyoso ki mwanda bokona mu mbanza, mwanda takana ni diyala dya mu kwambata disanga dya menya. Mu kayelyenu katé mu inzo mwanda bokona mwene.
11 Tangelenu o ngana mukwa inzo kwila, ‘o Mesene watumu ku kutangela, wixi: “O dixilu dya ajitu dyala kwebhi, ni ngi dye-mu o Phasu kumoxi ni maxibulu mami?”’
12 O diyala didi dyanda mi londekesa dixilu dya dikota mu inzo ya thandu, dyo sokejeke kyá. Mwéne mu mu yudikila o Phasu.”
13 Ene ayi, a sange o ima yoso kala kya atangelele Jezú, anga ayudika o Phasu.
14 Kyoso kyabhixila o kithangana, mwene waxikama ku meza kumoxi ni jipoxolo.
15 Mwene anga wa ambela, wixi: “Nga mesenene kyavulu kudya o Phasu yiyi ni enu, ande dya kutala o hadi,
16 kuma ngi myambela kwila: Ki nganda dya dingi o Phasu, katé kyanda dikumbidila mu Utuminu wa Nzambi.”
17 Mwene watambula dikáwu, wasakidila Nzambi, anga uzwela: “Tambulenu o dikáwu didi, dibhitisyenu-dyu mudyenu.
18 Ngi mi tangela kwila: Tundé lelu katé ku pholo, ki nganda nwa dingi ku vinyu yiyi katé kyoso kyanda kwiza o Utuminu wa Nzambi.”
19 Mwene wakwata we o mbolo, wasakidila Nzambi, wa ibukujula anga u ibhana ku maxibulu, yu wambe: “O mbolo yiyi ilombolola o mukutu wami, anda ubhakula phala o mbote yenu. Bhangenu jinga kyenyiki mu ku ngibanza eme.”
20 Kyene we kyabhange ni dikáwu. Kyoso kyazubha kudya o Phasu, mwene wambe: “O dikáwu didi, dilombolola o kikutu kyóbhe bhukaxi ka manyinga mami, anda kwa zunzumuna phala o mbote yenu.
21 “Maji ijiyenu-kyu kwila, o muthu wanda ngi sumbisa, wala kumoxi n’eme ku meza.
22 Mu kidi, o Mon’a muthu wanda fwa mwene kála kyosoneke mu Mikanda Ikôla. Maji lamba dya yó woso wanda mu sumbisa!”
23 Kyenyiki, ene amateka ku dibhwidisa se nanyi mudyâ weji bhanga kiki.
24 Ene anga amateka we kuzoka se nanyi wexile o dikota mudyâ.
25 Mwene wa atangela, wixi: “O jinguvulu ja ngongo jene mubhanga o athu kala abhika, o atwameni yâ a ejiya kala akwa kubhanga o mbote.
26 Ki kyene kyatokala kubhita bhukaxi kenu. Maji o dikota mudyenu, akale kala mwéne o ndenge, o wala ku pholo, akale kala o selevende.
27 Kyenyiki, nanyi o dikota, yó waxikama ku meza, inga yó wa mu sidivila? O waxikama ku meza, ki mwene o dikota? Maji eme ngala bhukaxi kenu kala yó u mi sidivila.
28 “Énu mwaxala kumoxi n’eme mu jiphaxi jami.
29 Kyenyiki, ngi bhanga kikutu ni enu phala kutumina, kála Tata yami kyabhange kikutu n’eme,
30 phala mudye, munwe ku meza yami mu Utuminu wami, ni mu xikame ku yandu, phala kufundisa o dikwinyi ni kiyadi kya miji ya Izalayele.
31 “Ximá, Ximá, ívwa! Satanaji wamesena ku mi wanuna, kala o kidimakaji kya wanuna o tiliku ku ibhyate.
32 Maji eme ngene mu kusambela, phala o kixikanu kyé ki kizoze. Eye-phe kyoso ki wanda vutuka, swinisa o jiphange jé.”
33 Mwene anga u mwambela, wixi: “Ngana, eme ngala polondo phala kuya kumoxi n’eye, kikale mu kaleya mba mw’alunga.”
34 Maji Jezú wa muvutwila: “Phetele, ngi kutangela kwila, lelu, ande dya dikolombolo kukokola, eye wa-nda ngi dituna lutatu kwila, ki wa ng’ijiya.”
35 Mwene wa atangela dingi, wixi: “Kyoso ki nga mi tumikisa sé kwambata mbwenga ya kitadi, né mbwenga ya kúdya, né jihayi,* o kwila kwa mi kambele kima?” Ene atambwijila: “Kana!”
36 Kyenyiki, mwene wa atangela: “Kindala-phe, woso wala ni mbwenga ya kitadi ni ya kúdya, a yambate, woso wakambe xibhata, a sumbise o divunga dyê, n’a sumbe xibhata imoxi.
37 Mukonda ngi myambela kwila, o kima kyosonoke kyatokala ku dikumbidila kokwami, exi: ‘Mwene a mu bundu kumoxi ni ifumbe.’ Kiki kya mu dikumbidila kokwami.”
38 Ene anga a mwambela: “Ngana, bhabha twala ni jixibhata jiyadi.” Mwene wambe: “Jiji jasoko.”
39 Mu kutunda, mwene wayi ku Mulundu wa Midiva kala kyexile kyá mubhanga, anga o maxibulu a mukayela.
40 Kyoso kyabhixila kwenyóko, mwene wa atangela: “Kolokotenu mu kusamba phala ki mudibhale mu jitendasá.”
41 Mwene wa asondoloka bhofele,* wafukama, yu wamateka o kusamba,
42 wixi: “Tata, se kibhana, o dikáwu* didi ngi katule-dyu. Maji-phe ki kibhite kala ki ngamesena eme, maji kala ki wamesena eye.”
43 Anga kutukuluka anju yatundu ku dyulu, ya mu swinisa.
44 Jezú anga ukala ni kikote kyadikota, yu wasambe dingi ni nguzu. O suwalu yê, yabhiluka kála manyinga ambomba bhoxi.
45 Kyazubha kusamba, mwene wayi bhwakexile o maxibulu, wa asange ya azeka ni malamba avulu.
46 Mwene wa atangela: “Mwa muzeka mukonda dyahi? Balumukenu, kolokotenu mu kusamba, phala ki mudibhale mu jitendasá.”
47 Kyoso mwene kyakexile hanji muzwela, kwabhixila kifuxi, Juda, watokala ku kwinyi ni kiyadi kya jipoxolo, mwéne wa atwamenene, mwene anga uzukama kwa Jezú phala ku mubhana nzobole.
48 Maji Jezú wa mutangela, wixi: “Juda, wa mu sumbisa o Mon’â muthu ni nzobole imoxi?”
49 Kyoso o athu a mu kondolokele kyamono o ima yeji bhita, ambe: “Ngana, o kwila tukwata o jixibhata phala kubhânga nawu?”
50 Muthu umoxi ku maxibulu, wakwama o mubhika wa mukunji wadikota, mu ku mubatula o dítwi dya kadilu.
51 Maji Jezú wambe: “Kwabhu kyá!” Mwene wakwata ku dítwi dya mubhika, yu wa musake.
52 Jezú anga utangela o akunji a makota, o jikabhitangu ja tembulu ni adyakime a mundu, ayile mu mukwata, wixi: “Enu mweza ni jixibhata ni jimbangala kala ngi kifumbe?
53 Kyoso ki ngakexile kumoxi ni enu mu tembulu izuwa yoso, enu ki mwa ngi kutu. Maji kiki kyene o kithangana kyenu ni kithangana kya kitombe kutumina.”
54 Kyenyiki, a mukutu, anga a mwambata mu inzo ya mukunji wadikota. Maji Phetele wakexile mu mukayela dikanga.
55 Kyoso kya wika túya mukaxi ka kithadi anga axikama mu kwota, Phetele waxikama we mukaxi kâ.
56 Sayi kilumba* kya mumono mu kwota túya, wa mutale swí, yu wambe: “O diyala didi wakexile we mu kwenda kumoxi ni Jezú.”
57 Mwene waditunu, yu wambe: “Muhatu, eme ki nga mwijiya.”
58 Mu kubhita kakithangana muthu wa mukwá wa mumono, yu wambe: “Eye we wakexile mu kwenda kumoxi ni mwene.” Maji Phetele wambe: “Eme kana!”
59 Kyabhiti ola imoxi, diyala dya mukwá wakexile mu jijila ni kuzwela: “Mu kidi, o diyala didi wakexile we kumoxi ni mwene, mukonda mukwa Ngalileya!”
60 Phetele-phe wambe: “Eme ki ngejiya o kima ki wa muzwela.” Mu kithangana kyenyókyo, kyoso kyakexile hanji muzwela, o dikolombolo dya kokola.
61 Kyenyiki, o Ngana wasakuka, yu watale swí kwa Phetele. Phetele anga ulembalala o kima kya mu tangele Ngana, kyoso kyambe: “Lelu, ande dya dikolombolo kukokola, eye wanda ngi dituna lutatu.”
62 Mwene watundu bhenyobho, anga udila kyavulu.
63 O mala akutile Jezú, amateka ku mu sebhulula ni ku mubeta.
64 Kyoso kyazubha ku mu vunga o pholo, ene ambe, exi: “Se u polofeta, tutangele, nanyi wakubeta?”
65 Ene a mutangela dingi ima ya mukwá yayibha.
66 Mu kamene, o adyakime a mundu ni akunji a makota ni jimesene ja kulonga o Kijila adyongeka. Ene a mwambata mu inzo ya kufundisa, ya a mwambela exi:
67 “Se u Kidistu, tutangele.” Mwene-phe wa ambela, wixi: “Né mwene se nga mi tangelele, enu kimweji xikina.
68 Né se nga mi bhangele ibhwidisu, kimweji ngi tambwijila.
69 Kyenyiki, tundé lelu, o Mon’â muthu wanda xikama ku kadilu ka Nzambi, Muteni wa Yoso.”
70 Mukonda dya kiki-phe ene oso a mwibhwidisa, exi: “Mbé eye u Mon’â Nzambi?” Mwene wa atangela, wixi: “Énu mwene mwa mu kitanga kwila ngi Mon’â Nzambi.”
71 Ene ambe: “O kwila twa bhingi dingi jimbangi? Mukonda etu twevu yazwela mu kanu dyê.”
Footnotes
^ Mba, “kithuthume.”
^ Mba, “jisandalya.”
^ Mu Ngel.: “kadikanga ngó kwila ditadi a di takula-bhu.”
^ Mba, “kopho.”
^ O kilumba kiki, wexile selevende ya mukunji wa dikota.
