O polofeta Mozé wambe kwila se tubelesela o Itumu ya Nzambi, twandatambula mabesá. (Matendelelu 10:13; 11:27) Etu kitutokala kubelesela Nzambi mukonda dya wôma wa kutukaxtikala. O idifwa yambote ya Nzambi itubhangesa kumubelesela mukonda twamuzolo, etu ki tumesena kubhanga kima kyosokyoso ki muluwalesa. “O henda ya kuzola Nzambi yenyiyi, o kwaluka o ijila yê.”—1 Nzwá 5:3.

Maji kyebhi o kubelesela Nzambi kubhekela mabesá? Tala mawukexilu ayadi.

“Eme Jihova Nzambi yé, u ku longa kyoso kya wabha, hé u ku endesa mu njila i wa fwama kwenda mu ku di-tela.”—IZAYA 48:17.

Jihova Nzambi, o Mubhangi wetu, watwijiya anga utubhana itendelesu i twabhindamena. Se twamesena kwila o ilongesu yê itukwatekesa kusola ni unjimu, twatokala kwijiya ihi yamesena Nzambi kokwetu bhukaxi ka Maka mê ni kubelesela o ilongesu yê.

“A beta o kuzediwa oso évwa o maka ma Nzambi anga a ma lunda!”—LUKA 11:28.

Lelu, mazunda ni mazunda a athu abelesela o Mak’â Nzambi ala ni kisangusangu kyakidi. Mukifika, tala o phangu ya diyala ku Espanha wexile mutalata akwa ni undanda, katé mwene ni muhatu wê. Sayi kizuwa mwene watange yasoneka polofeta Mozé yalungu ni ukexilu wambote wa Zuze mon’â Jakobo. Zuze amusumbisa kala mubhika, amutatela umbangi wa makutu ya amute mukaleya sé kikuma; Ne kiki mwene wasuluka kukala muthu wahenda, watululuka, uloloka akwa. (Dimatekenu, ibatulu 37-45) O diyala mukwa Espanha wambe: “O kuxinganeka mu phangu ya Zuze, kwangiswinisa kukala ngi muthu wambote, ni kuditumina jihânji. Kindala, ngasanguluka kumwenyu wami.”

O Mak’â Nzambi atubhana itendelesu yavulu yalungu ni kyebhi kitwatokala kutalatala akwetu. Dilonge kyambote o maka yá mumilongi yakayela.