PHANGE Eliza * wambe: “O kulenduka kwa jiphange jami mu nzumbi, kyene o kima kya ngikwatekesa dingi ku mwenyu.” Mwene wexile muzwela o kima kya mukwatekesa dingi kuxikina o kidi kya Bibidya. Kyene we kyabhiti ni phange Ana, mwene wambe: “Ku dimatekenu eme ngaxikina o kidi, ki mukonda dya ilongesu ya Bibidya kana, maji mukonda o Jimbangi ja Jihova exile mu ngitalatala ni kulenduka.” Kindala o jiphange Eliza ni Ana awabhela kutanga o Bibidya ni ku ixinganeka, maji o kulenduka kwa jiphange kwa akwatekesa kyavulu.

Kyebhi ki tutena kulondekesa o kulenduka kuswinisa o athu atukondoloka? Bhukaxi ka maukexilu ayadi: Mu izwelu yetu ni ibhangelu yetu. Mu kusuluka twandamona se tulondekesa o kulenduka kwa nanyi.

O muhatu wala ni kilunji amutumbula kiki mu divulu dya Jisabhu kibatulu 31: “O dimi dyê, dyejidila kulenduka.” (Jisa. 31:26) Mwene wehela kwila o ukexilu wa kulenduka kwê, umubhangesa kuxinganeka se ihi yandazwela ni kyebhi kyandazwela. O jitata abhingi we kuzwela ni kulenduka. Jitata javulu ejiya kyambote kwila, kyoso kyazwela ni twana twâ ni njinda, o twana andadivwa kyayibha. Se o jitata azwela nawu mu ukexilu yú, nange o twana kanda kwabhana mátwi mba kwa belesela. Maji kyoso o jitata kyazwela ni kulenduka kwoso, o twana andasota kwa evwa ni kwa belesela.

Kikale se wala ni mona mba kana, kyebhi ki utena kuzwela ni kulenduka kwoso? O divulu dya Jisabhu 31:26 ditubhana ndunge imoxi: “[Mwene] kya jikula dikanu, u zwela ni uhete mba unjimu.” Kiki kilombolola kusola o izwelu yetu ni ukexilu wetu wa kuzwela, ni unjimu woso. Kima kyambote kudibhwidisa: ‘O ima inganda zwela yandabhangesa o jingivwidi jami kukala ni njinda, inga yanda tululukisa o maka?’ (Jisa. 15:1) Kyenyiki kima kyambote kubanza ande dya kuzwela.

O sabhu yamukwa yambe kiki: “Sayi athu, [uzwelelu] wâ u toma ku mixima kala jiphondo ja xibhata.” (Jisa. 12:18) Kyoso ki tuxinganeka kyebhi o izwelu ni ukexilu wetu wa kuzwela itena kuluwalesa mba kusangulukisa akwetu, kiki kyanda tuswinisa kulanga o ima i tuzwela. Kyoso ki tuzwela ni kulenduka, kitwanda zwela ima iluwalesa akwetu mba kuzwela nawu ni kuthathamana. (Efe. 4:31, 32) Mu kiki twanda tena kukatula o ibanzelu yayibha phala tutene kukala ni ibanzelu yambote. Jihova watulongo phangu yambote ku musoso wa selevende yê. Elija wakexile ni wôma. O anju yexile muzwela bhu kididi kya Jihova, ni “dízwi dya lenduka kyambote, dya talala.” (1 Jis. 19:12) O kulenduka ki twatokala ngó ku kulondekesa bhukaxi ka izwelu yetu, maji we bhukaxi ka ibhangelu yetu. Kyebhi ki tutena kubhanga kiki?

Tukayela o phangu ya Jihova mu kutumbula izwelu yahenda ni kubhanga ima iswinisa akwetu. (Efe. 4:32; 5:1, 2) Phange Eliza, twamutumbula ku dimatekenu dya milongi yiyi, wambe kiki yalungu ni kulenduka kwa mulondekesa o Jimbangi ja Jihova: “Kyoso eme ni mwiji wami kya tutangela phala kuxisa o inzo ni lusolo, makaza ayadi a Jimbangi ja Jihova  abhingi kithangana ku salu yâ, ya eza mu tukwatekesa kulongela o imbamba. Mu kithangana kyenyókyo, eme kingexile luwa mudilonga o Bibidya!” O ukexilu yú wa henda wabhangesa phange Eliza kukala dingi ni hanji ya kudilonga o Bibidya.

Phange Ana, twamutumbula we ku dimatekenu dya milongi yiyi, waximana we o kulenduka kwa mulondekesa o Jimbangi ja Jihova. Mwene wambe: “Kuma o athu mu ngongo aditalatala kyayibha, kwa ngibhonzele kyavulu kudyelela o athu.” Mwene wambe dingi: “Kyoso ki ngejidile o Jimbangi ja Jihova, eme ki nga adyelele. Ngexile mu dibhwidisa: ‘Mukonda dyahi ene amungilondekesa o henda yiyi?’ Maji o kulenduka kwa kidi kwa ngilondekesa o mulongexi wami wa Bibidya, kwa ngibhangesa ku mudyelela.” Ihi yabhiti? Phange Ana wambe: “Mu kubhita kithangana, ngamateka kuxinganeka dingi mu ima ingakexile mudilonga.”

Twamono kwila o henda yalondekesa o jiphange mu kilunga yakwatekesa kyavulu phange Eliza ni phange Ana, yi ya abhangesa kukala dingi ni hanji ya kudilonga o Bibidya. O kulenduka kwa alondekesa o jiphange mu kilunga, kwa akwatekesa we kumateka kudyelela Jihova ni jiselevende jê.

Sayi athu awabhela kwolela ni kulondekesa kulenduka mukonda dya ukexilu wa asase mba mukonda dya kididi mwatungu. Kima kyambote kumona kwila sayi athu awabhela kuxila akwâ, mukonda kyene kya asase mba mukonda kyene o kifwa kyâ. Maji se tulondekesa ngó o kulenduka mukonda dya ima yiyi, kifwaphe ki twamulondekesa o kulenduka kutunda kwa Nzambi.—Sokesa ni Ika. 28:2.

O kulenduka kutunda kwa Nzambi kubhanga mbandu ku kibundu kya nzumbi ikôla. (Nga. 5:22, 23) Kiki, kitulondekesa kuma twabhingi o kikwatekesu kya nzumbi ikôla ya Nzambi, phala tutene kulondekesa o kulenduka kwa kidi. Kyoso ki tubhanga kiki, twamukayela o phangu ya Jihova ni ya Jezú. Kuma tu Jikidistá, twamesena o mbote ya akwetu mu kidi. Kyenyiki twanda londekesa o kulenduka ku akwetu, mu kwijiya kuma twazolo Jihova Nzambi ni kwila twa azolo we. Mu kiki o kulenduka kwetu kwandatunda moxi dya muxima, ni kwila Nzambi wanda kiwabhela.

Ki kubhonzo kulondekesa o kulenduka kwa yó a tulondekesele kyá o kulenduka mba kwa yó u twejiya. (2 Sam. 2:6) O ukexilu umoxi wa kubhanga kiki, o kwasakidila. (Kol. 3:15) Maji se tumona kuma sayi muthu kafwama ku mulondekesa o kulenduka?

Xinganeka mu maka enyá: Jihova mwéne o phangu yabetakota yakulondekesa o ngalasa yê. Bhukaxi ka Maka mê, mwene utulonga disá dyadikota dyalungu ni kulondekesa o kulenduka. O kizwelu “ngalasa” kimoneka veji javulu mu Mikanda ya Ngeleku. Kyebhi Nzambi kya tulondekesa o kulenduka mba o ngalasa yê?

Xinganeka ku mazunda ni mazunda a athu ene mwalondekesa ngalasa kwa Jihova, mu kwabhana yoso yabhindamena phala kukala ku mwenyu. (Mat. 5:45) Mu kidi, katé mwene ni athu kejidile Jihova, mwene wa alondekesele o kulenduka mba o ngalasa yê. (Efe. 2:4, 5, 8) Mu kifika, mwene wabhana o ujitu wê wa betakota, Mon’ê umoxi-élele, phala o athu oso ku mundu. Poxolo Phawulu wambe kuma Jihova wa twidikisa o ngalasa yê mu ukexilu wakatunda. (Efe. 1:7) Né mwene se tuta kituxi ni kuluwalesa Jihova, mwene usuluka mu kutwendesa ni kutulonga. O ilongesu yê ni izwelu yê, yedi kala “masumi-sumi ma mvula.” (Mate. 32:2) Kitutena kufuta o kulenduka kwoso kwene mu tulondekesa mwene. Mu kidi, se Jihova ka tulondekesele o kulenduka mba o ngalasa yê, kitweji kala ni kidyelelu phala o hádya.—Sokesa ni 1 Ph. 1:13.

Sé phata, o kulenduka kwa Jihova kutula ku muxima wetu, ku tuswisina we. Kyenyikiphe, mu veji dya kulondekesa ngó o kulenduka ku athu ofele, tubhangyenu yoso mu kukayela o phangu ya Jihova mu kulondekesa jinga o kulenduka ku athu oso. (1 Te. 5:15) Kyoso kitulondekesa o kulenduka, kwedi kala túbhya mu kithangana kya kixibhu. Se tubhanga kiki, twandaswinisa o jindandu ni jiphange jetu mu nzumbi, o jikoleka jetu ja salu mba ja xikola, ni jivizinyu jetu.

Xinganeka ku jindandu ni jiphange jé mu kilunga, andatena kukatula mbote mu izwelu ni ibhangelu yê yalenduka. Nange mu kilunga kyé mwala phange wabhindamena kikwatekesu phala kulanga o inzo yê, kulanga o njaludim mba kubhanga ima kala kuya mu kitanda. Mbaphe mu sidivisu ya kuboka, kyoso ki umona muthu wabhindamena kikwatekesu, o kwila utena kudibhakula phala ku mukwatekesa?

Se twehela o “kulenduka” kuswinisa o izwelu yetu ni ibhangelu yetu, twamukayela o phangu ya Jihova