O Bibidia i zuela: ‘Kioso o ua mu tumina muthu ua iibha, o mundu u kumba.’—Jisabhu 29:2.

O misoso iezala ni atumini avulu a tumina ni usuéia ni ku bhekela hadi iavulu ku mundu uâ. Maji ko jinguvulu joso a bhanga kiki, kana. Saí jinguvulu a banza ku bhanga ima iambote ku mundu uâ. Maji kioso kia mateka o ku tumina, sumbala a mesena ku bhanga ima iambote, a mona kuila ala ni jinguma javulu a mesena uá o ku tumina. Mba mu ku tumina kuâ a banza ngó mu mbote iâ, o ia mundu kana. O diiala uexile seketa ku unguvulu ua Estados Unidos, Henry Kissinger, uambe: “O Musoso, misabhu ia ima ki ia tundu kiambote, vondadi a kambe o ku i kumbidila.”

O Bibidia i zuela ué: ‘O njila ienda o muthu ki iene bhu lukuaku lua muthu.’ (Jelemiia 10:23) O athu akua ituxi, kala ni unjimu ua soko phala ku batula kiambote o maka mê. Se o athu ka tena ku batula kiambote o maka mê, kiebhi-phe kia-nda tena ku batula o maka a athu engi? U tena ku mona se mukonda diahi o athu ka mu tena ku zubha o hadi mu ngongo? Kienhiki, o jinguvulu ene a beta-kota mu ku bhekela o hadi!

Jezú uambe: “Kiene kia m’ijidila ku athu oso, kuma muala mu jixibulu jami, se mua di zolo mu dienu.”—Nzuá 13:35.

O atuameni a jingeleja, ene mu longa kuila o athu a tokala ku di zolo ni ku dibhana kiambote. Maji ene kene mu tena ku kuatekesa o akaiedi iâ, ku kaiela o kitumu kia ku zola ni ku batula o kathombo ku mixima iâ. Mu veji dia ku a kuatekesa ku kala ni henda ku muxima, o jingeleja ene mu bhangesa o athu ku di muanga, ku kamba ku belesela o itumu, ni ku bhânga kala muthu ni mukuá. Ku disukilu dia divulu diê, O Cristianismo e as Religiões do Mundo, o mukua ku longa teologia, Hans Küng, ua soneka: “O ita ia jinguvulu, iene  mu jibha dingi athu avulu mukonda dia kikuatekesu kia jingeleja.”

Atuameni avulu a jingeleja ene mu xikina ué kuila, ki kituxi diiala ni muhatu ku zeka kumoxi ande dia ku kazala, o diiala ku kala ni ahatu avulu, ni mala ku zeka ni mala ni akuâ. O ukexilu iú uene mu bheka mauhaxi avulu ku athu, ku seluka, kuimita sé ku mesena, makaza ku di xisa, miji ku di muanga ni ku bheka ndolo iavulu.

“Maji muthu-phe u dianguka, ki mu sanga o hanji iê-muène iiaibha, anga i mu bhomba. Kienhiki o hânji iaiibha ienhi’ii, ki i zubha o kuimita, i vuala kituxi. O kituxi k’ila kiza ku kitala, ki vuala kalunga.”—Tiiaku 1:14, 15.

Mukonda dia kituxi ki tua lundula, tuene mu lueza kiavulu ni ku bhânga ni jihanji ja ‘ku bhanga o jivondadi ja xitu.’ (Efezo 2:3) Ki bhonza kiavulu o muthu ku dituna o jihanji ja iibha kioso kia kala ni kithangana kia ku bhanga o kima kia iibha. Maji se tuehela o jihanji ja iibha ku tumina o mukutu uetu, tu tena ku kala ni ibhidi iavulu ku muenhu.

O diiala, P. D. Mehta, ua soneka: “O hadi ioso i tala o athu, kijila mu jihanji jetu ja iibha, kala o luímbi.” O jihanji ni ifua ia iibha—kála o uhôlua, ji droga, ji joko ja iibha, ku bhanga undumbu, ni ima ia mukuá—iene mu bheka ibhidi ku “athu avulu ambote” ni ku bheka hadi iavulu ku miji iâ, ku makamba, ni ku athu a mukuá. Mukonda dia ukexilu ua athu akua ituxi, tua tokala ku xikina o izuelu ia Bibidia: “Tua k’ijiia kuila o ibhangelu ioso hanji ia kuata kukema mu misusu kala ia kuvuala katé kindala.”—Loma 8:22.

O Bibidia i zuela kuila, Satanaji, muene “o nzambi iaiibha ia mundu iú” ni kuila muéne uala kumoxi ni jinzumbi ja iibha a ji xana madimonho.—2 Kolindo 4:4; Dijingunuinu 12:9.

Kala ki bhanga Satanaji, o madimonho a mu kalakala mu ku nganala o athu. O poxolo Phaulu ua zuela o maka enhá mu kuzuela: ‘O ku luua kuetu ki kua ku luua ni athu mu xitu, maji tu luua ni ifuxi ia jinzumbi ja phulu ku ididi ia diulu, tu luua ni atumini, tu luua ni akutende, tu luua ni enexi a kithangana kia kitombe’iki mu ngongo.’—Efezo 6:12.

Sumbala o madimonho a uabhela ku kuatesa uôma ku athu, maji kiki ki kiene o kikalakalu kiâ kia beta o kota. Ene a mesena ku nganala o athu phala ka bheze o Nzambi Muteni-a-Ioso, Jihova. (Jisálamu 83:18) O ibhangelu ia uanga kála, o ku zambula ni umbanda, ima iene mu bhanga o madimonho phala ku nganala o athu. Kiki kiene ki bhangesa Jihova ku tu dimuna ku iluezu, ni ku tu langa ku mibhetu ia Satanaji ni madimonho.—Tiiaku 4:7.

Hama jiiadi ja mivu kudima, o Bibidia ia kanene: ‘Ijiia na-kiu-phe, kuma: Mu izuua isukidila-ku kua-nda kuíza jithembu ja bhonzo.’

Mu kuzuela ihi i bhangesa o jithembu jiji ku bhonza, o Bibidia i zuela dingi: “Kuma athu a kà kala azodi a ene ngó, injenji, akua ukumbu, a tènda akuâ, . . . ka moneka henda ia muthu, kene kuloloka, akua kutatela ngó akuâ, keji kufikisa jihanji, a kaka, a di zemba ni ima iambote. En’ia a bhanga ufe, a thathamana, a vula izala. A kala azodi i jivondadi jâ, ki azodi a Nzambi, kana!” Kienhiki, o hadi ioso iene ku mundu ijila mukonda tuala mu “izuua isukidila-ku.”—2 Timote 3:1-4.

Mu ima ioso i tua di longo mu milongi íii, ki tuejiia kiá se mukonda diahi o athu ka tena ku zubha o hadi ioso ku mundu, sumbala ni vondadi iala na-iu ia ku i zubha? Kuebhi-phe ku tu tena ku sota o kikuatekesu? Tua tokala ku tala ku Mubhangi uetu ua kanena “ku buika o ibhangelu ia Diabhu” ni ia akaiedi’ê. (1 Nzuá 3:8, NW) Mu milongi ia kaiela, tua-nda di longa ihi ia-nda bhanga Nzambi phala ku zubha o ima ioso i bhekela o hadi mu ngongo.