Гәло Хԝәде Дӧайед Мә Дьбьһе?
Дьбәкә тӧ дьфькьри, ԝәки Хԝәде дӧайед тә набьһе. Һәрге ӧса нә, тӧ тʹәне нини. Гәләк мәрьва дӧада дәрһәԛа проблемед хԝә Хԝәдерʹа готьнә, ле диса жи проблемед ԝан сафи нәбунә. Гәло әв те һʹәсабе, ԝәки Хԝәде гӧһ надә дӧайед мә? На! Кʹьтеба Пирозда те готьне, кӧ чахе әм лайиԛ дӧа дькьн, Хԝәде мә дьбьһе. Кʹа әм шеԝьр кьн Кʹьтеба Пироз дәрһәԛа ве йәке чь дьбежә.
ХԜӘДАЙЕ КӦ ДӦА ДЬБЬҺЕ.
«Әй тӧ, йе кӧ дӧайан дьбьһизә, ԝе һʹәму мьров бен ба тә» (Зәбур 65:2).
Һьнә мәрьв баԝәр накьн, кӧ Хԝәде дӧайед ԝан дьбьһе, ле диса жи дӧа дькьн, чьмки дӧа ԝана дьлрʹьһʹәт дькә. Бь рʹасти дӧа нә тʹәне дәрмане дьла йә, ле һе зедә йә, әв али мә дькә, ԝәки бәр проблемед хԝә тәйах кьн. Кʹьтеба Пироз мә дьдә баԝәркьрьне, ԝәки «Хӧдан [Йаһоԝа, ДТʹ] * незьки ԝан һʹәмуйан ә, кӧ банг дькьне, әԝ йед кӧ, жь дьл банг дькьне . . . фәрйада ԝан дьбьһизә у ԝан рʹьзгар дькә» (Зәбур 145:18, 19).
Әм дькарьн баԝәр бьн, ԝәки Йаһоԝа Хԝәде дӧайед хьзмәткʹаред хԝә дьбьһе. Жь бо һʹьзкьрьне әԝ дьбежә: «Һуне банги мьн бькьн у һуне һәрʹьн у жь мьнрʹа дӧа бькьн у әзе ԝә бьбьһизьм» (Йерәмйа 29:12).
ХԜӘДЕ ДЬХԜАЗӘ, ԜӘКИ ТӦ ԜИРʹА ДӦА БЬКИ.
«Һәр гав дӧа бькьн» (Рʹомайи 12:12).
Кʹьтеба Пироз мә һелан дькә, ԝәки һәр гав «дӧа бькьн». Әʹйан ә, ԝәки Йаһоԝа Хԝәде дьхԝазә кӧ әм ԝирʹа дӧа бькьн (Мәтта 26:41; Әфәси 6:18).
Гәло чьма Хԝәде дьхԝазә, кӧ әм ԝирʹа дӧа бькьн? Ԝәрен әм шеԝьр кьн: Мәсәлә, бав ша дьбә, гава кӧрʹе ԝи дьбежә: «Баво, дькари али мьн бьки?» Һәмьки бав ида занә зарʹерʹа чь лазьм ә у әԝ чь тʹәхмин дькә. Ле диса жи чахе бав әван гьлийа дьбьһе, әв йәк ԝирʹа дьдә кʹьфше, ԝәки зарʹ итʹбарийа хԝә ԝи тинә у әԝана һәврʹа незик ьн. Анәгори ԝе йәке, чахе әм Йаһоԝа Хԝәдерʹа дӧа дькьн, ӧса әм ԝирʹа дьдьнә кʹьфше кӧ итʹбарийа хԝә ԝи тиньн у дьхԝазьн незики ԝи бьн (Мәтʹәлок 15:8; Аԛуб 4:8).
ХԜӘДЕ БЬ РʹАСТИ БОНА ТӘ ХӘМ ДЬКӘ.
«Һʹәму хәмед хԝә бавежьнә сәр ԝи, чьмки әԝ бона ԝә хәм дькә» (1 Пәтрус 5:7).
Хԝәде дьхԝазә, ԝәки әм дӧа бькьн, чьмки әԝ мә һʹьз дькә у бона мә хәм дькә. Әв һʹәму тьшти занә дәрһәԛа проблем у хәмед дьле мә, у дьхԝазә али мә бькә.
Даԝьд Пʹадша жийина хԝәда Йаһоԝа Хԝәдерʹа гәләк дӧа дькьр, дьле хԝә ԝирʹа вәдькьр у аликʹари жь ԝи дьхԝәст (Зәбур 23:1-6). Хԝәде һьндава Даԝьдда чаԝа бу? Хԝәде Даԝьд һʹьз дькьр у гӧһ дьда гәләк дӧайед ԝи (Кʹаред Шандийа 13:22). Әм дькарьн бежьн, ԝәки Хԝәде гӧһ дьдә дӧайед мә жи, чьмки әԝ бона мә хәм дькә.
«ӘЗ ЖЬ ХӦДАН ҺʹӘЗ ДЬКЬМ, ЧЬМКИ ӘԜ ДӘНГЕ МЬН . . . ДЬБЬҺИЗӘ»
Әв гьли ньвискʹаре зәбурәке готийә. Әԝи заньбу, ԝәки Хԝәде дӧайед ԝи дьбьһе. У әве йәке гәләк али ԝи дькьр. Ӧса әԝи хԝә дьһа незики Хԝәде тʹәхмин дькьр. Бь сайа ве йәке әԝи ԛәԝат дьстанд у чәтьнайада тәйах дькьр (Зәбур 116:1-9).
Чахе әм баԝәр ьн кӧ Хԝәде дӧайед мә дьбьһе, әм һелан дьбьн бәрдәԝам кьн һәр гав дӧа бькьн. Ԝәрен әм бьньһерʹьн мәсәла Педро, кʹижан кӧ Испанйайеда алийе бакʹӧре дьжи. Әԝи кӧрʹе хԝәйи 19 сали жь бо ԛәзийе ӧнда кьр. Педро дәрде хԝәйи гьранда дьле хԝә Хԝәдерʹа вәдькьр у бе сәкьнандьн бәрдьли у аликʹари жь Хԝәде дьхԝәст. Гәло Хԝәде щаба дӧайед ԝи да? Педро дьбежә: «Йаһоԝа щаба дӧайед мьн да. Әԝи бь сайа баԝәрмәнда бәрдьли у һелани да мьн у жьна мьн».
Гәләк щар Хԝәде бь аликʹарийа һәвалед мәйи незик щаба дӧайед мә дьдә, кʹижан кӧ тенә һәԝара мә у бәрдьлийе дьдьн
Рʹаст ә дӧа кӧрʹе Педро вәнәгәрʹанд, ле гәләк али ԝи у малбәта ԝи кьр. Жьна ԝи Марийа Кармен дьбежә: «Бь дӧа дәрде дьле мьн сьвьк бу. Мьн заньбу, ԝәки Йаһоԝа Хԝәде мьн фәʹм дькә, чьмки гава мьн ԝирʹа дӧа дькьр, мьн әʹдьлайи у рʹьһʹәтийа дьл тʹәхмин дькьр».
Чаԝа Кʹьтеба Пироз ӧса жи сәрһатийед мәрьва рʹьнд дьдьнә кʹьфше, ԝәки Хԝәде гӧһ дьдә дӧайед мә. Ле һәмьки Хԝәде щаба һʹәму дӧа надә. Гәло чьма Хԝәде щаба һьнә дӧа дьдә, ле щаба һьнәка на?
^ абз. 5 Йаһоԝа, наве Хԝәде йә (Зәбур 83:18).
