Дькʹәвә нава ве йәке, нә кӧ тʹәне наве тә у бәжьн-бала тә, ле һе зедә. Демәк ль вьр хәбәрдан дьчә дәрһәqа wе йәке, кӧ чь щурʹәйи тӧ дьжийи, чь баwәр дьки у хәйсәте тә ча нә. Бь рʹасти жи һʹәму тьшт дькʹәвә нава ве йәке, бь сайа чь жи тӧ дьби әw мәрьве кӧ ньһа йи.

Чахе тӧ рʹьнд хwә нас дьки у зани чь дьхwази, һьнге те нәһели wәки һәвал у мәрьвед дьн сәр тә контрол бькьн у һʹӧкӧм кьн.

Адриан кӧ 18 сали йә, дьбежә: «Һʹәчʹи зәʹф мәрьв wәк маникен ьн. Әwана хwәха нажберьн кӧ кʹижан кʹьнщи ль хwә кьн; дәwса wан йед дьн дьжберьн».

Кортней кӧ 16 сали йә, дьбежә: «Әз һин бум чаwа хwә ль тьштед рʹаст бьгьрьм, һәла һе чахе әw пʹьрʹ зор ә. Әз дькарьм бежьм кӧ һәвалед мьн бь рʹасти кʹи нә, чьмки әз тедәрдьхьм бь wе йәке, кӧ әwана хwә чь щурʹәйи кʹьфш дькьн у әз чаwа мә һьндава wанда».

ПРИНСИПА КʹЬТЕБА ПИРОЗ: «У нәкʹәвьнә кьрасе бәнде ве дьнйайе, ле сәр һʹьше хwәда wәрьн» (Рʹомайи 12:2).

Бьфькьрә сәр wе йәке, һәла бь рʹасти тӧ йәки чаwа ни, у тӧ дьхwази мәрьвәки чаwа би. Бона ве йәке дькари бьфькьри сәр алийе хwәйи qәwи, сьст у кӧ чь баwәр дьки. Дь ве йәкеда wе али wә бькьн пьрсед кӧ жере ньвисар ьн. Жь кʹәрәма хwә щаба wан пьрса хwәрʹа бежьн.

Алийе тәйи qәwи: Чь фәрәсәтед тә һәнә? Әз чьда qәwи мә? (Мәсәлә: Әз wәʹде хwәда дьчьмә щийа? Әз хwәгьрти мә? Әз хәбатһʹьз ьм? Әз мәрʹд ьм?) Чь тьштед баш әз дькьм?

ШИРӘТ: Бона тә зор ә бьфькьри ль сәр wан тьштед qәнщ, кӧ тә кьр йан гот? Жь де, бав йан һәваләки хwә бьпьрсә, wәки әwана тәрʹа бежьн кӧ кʹижан тьштед баш әwана нав тәда дьвиньн, у чьма?

ПРИНСИПА КʹЬТЕБА ПИРОЗ: «Бьра һәр кәс кьрьнед хwә бьдә сәр мезине у паши һьнге жь хwә рʹази бә, нә кӧ хwә һьмбәри һәвале хwә кә» (Галати 6:4).

Алийе тәйи сьст: Әз гәрәке сәр чь бьхәбьтьм? Һʹәчʹи зәʹф чь чах әз тʹәхмин дькьм кӧ дькарьм бькʹәвьм бәр байе тьштед нәрʹаст? Һе зедә кʹижан дәрәщада әз дькарьм хwәгьртьне бьдьмә кʹьфше?

ПРИНСИПА КʹЬТЕБА ПИРОЗ: «Һәгәр әм бежьн: ‹Гӧне мә тʹӧнә›, әм хwәха хwә дьхапиньн» (1 Йуһʹәнна 1:8).

Нормә: Әз бь кʹижан норма дьжим у чьма? Әз Хwәде баwәр дькьм? Чь әз дамә баwәркьрьне кӧ Хwәде һәйә? Әз кʹижан шьхӧли һʹәсаб дькьм ча нәрʹаст у чьма? Дәрһәqа ахьрийе әз чь баwәр дькьм?

ПРИНСИПА КʹЬТЕБА ПИРОЗ: «Һьнге фьрасәте тә хwәй кә у аqьле мьqатийе ль тә бькә» (Мәтʹәлок 2:11).