•  Тӧ гәрәке чь бьзаньби

•  Тӧ чь дькари бьки

•  Щаһьлед дьн чь дьбежьн

Тӧ дьхԝази ԝәки де-бав итʹбарийа хԝә тә биньн? Ԝәки ӧса нә избат кә кӧ тӧ мәрьвәки бь итʹбар и. Әԝ мина ве йәке йә кӧ тӧ пʹәре банке пашда вәдьгәрʹини. Һәгәр тӧ ԝәʹдәда пʹәре банке бьди, банк ԝе итʹбарийа хԝә тә бинә у ԝе кредитед дьһа мәзьн жи бьдә тә. Малда жи ӧса нә, тӧ гәрәке гӧрʹа де-баве хԝә бьки, чьмки әв борщдарийа тә йә. Һәгәр тӧ һәртʹьм гӧрʹа ԝанда би, де-бав ԝе бьвиньн кӧ дькарьн итʹбарийа хԝә тә биньн у ԝе дьһа зедә азайе бьдьнә тә. Ле һәгәр тӧ һәр гав хԝәйе созе хԝә нини, һьнге тӧ итʹбарийа ԝан һьндава хԝә һеди-һеди ӧнда дьки.

Ԝәʹдә лазьм ә, ԝәки итʹбари ԛазанщ ки. Сәва кӧ де-бав һе зедә азайе бьдьнә тә, әԝана гәрәке баԝәр бьн кӧ тӧ йәки бь итʹбар и. Ле сәва ве йәке ԝәʹдә лазьм ә.

СӘРҺАТИ: «Гава әз һе нәгьһишти бум, мьн рʹьнд заньбу кӧ де-баве мьн чь жь мьн дәʹԝа дькьн. Әз бәр ԝан те бежи йәки гӧһдар бум, ле дьзикава мьн чь дьхԝәст ве йәке жи дькьр. Ахьрийеда, де-бав ида итʹбарийа хԝә мьн нәдьанин. Ле паше мьн фәʹм кьр кӧ әԝ йәк рʹаст нинә. Һәрге дьхԝази һе зедә азайе бьстини, фелбазийа нәкә у йәки бь итʹбар бә. Бь щурʹәки майин те нькарьби итʹбарийа ԝан ԛазанщ ки» (Крейг).

Рʹастийе бежә һәрге тәрʹа чәтьн ә жи. Әм гьшк жи шашийа дькьн, ле чахе тӧ гьлийа дәве хԝәда дьгьри, у тьштәки жь ԝана вәдьшери, әԝана ԝе тәда дӧдьли бьн. Ле һәгәр тӧ һәртʹьм рʹастийе дьбежи, һәла һе гава тәрʹа чәтьн ә жи, әԝана ԝе фәʹм бькьн кӧ тӧ дькари шашийед хԝә бини рʹуйе хԝә. У әԝ йәк нишан дькә кӧ тӧ йәки гьһишти йи у бь итʹбар и.

«Гава тӧ шашийа дьки әԝ найе һʹәсабе кӧ мәрьв ԝе ида итʹбарийа хԝә тә нәйньн, ле һәгәр тӧ ԝан шашийа вәдьшери, һьнге итʹбари ӧнда дьбә» (Анна).

Кʹьтеба Пироз дьбежә: «Әм ... дьхԝазьн кӧ һәр тьшти рʹаст бькьн» (Ибрани 13:18).

• Бьфькьрә: Гава де-бав жь тә дьпьрсьн кӧ те кʹӧда һәрʹи, тӧ һәр гав ԝанрʹа рʹастийе дьбежи йан тьштәки вәдьшери? Йан жи гава әԝана дьхԝазьн пебьһʹәсьн тӧ кʹидәре буйи у тә чь дькьр, тӧ һәр тьшти дьбежи ԝан, йан тӧ нахԝази әԝана һаш жь һʹәму тьшти һәбьн?

Йәки щабдар бә. Гӧрʹа ԛәйдед де-баве хԝә бькә. Шьхӧлед мале ԝәʹдәда бькә. Гава щикида дьчи, дәрәнги нәкʹәвә. Мәкʹтәбеда жи йәки щабдар бә у рʹьнд һин бә. Ԝәʹдәда ԝәрә мал.

«Һәгәр де-баве тә изьн данә тә тʹәви һәвалед хԝә щикида һәрʹи, у готьнә тә еваре һʹәта сьһʹәта 9 гәрә ида мал би, ле тӧ ниве 11 һати, ида һивийе нибә кӧ щарәкә дьн әԝана ԝе тә бәрʹдьн» (Рйан).

Кʹьтеба Пироз дьбежә: «Һәр кәсе хӧрща хԝә һьлгьрә» (Галати 6:5).

• Бьфькьрә: Тӧ ԝәʹдәда тейи мал? Тӧ шьхӧлед мале ча лазьм ә дьки? Тӧ гӧрʹа де-баве хԝә дьки һьнге жи, гава тӧ нахԝази? Тә навәки ча хԝәрʹа ԛазанщ кьрийә?

Бь сәбьр бә. Һәгәр тә итʹбарийа де-бава ӧнда кьрийә, ԝәʹдә лазьм ә кӧ диса ԛазанщ ки. Ләма жи дьхԝази нахԝази тӧ гәрә сәбьр ки.

«Ԝәʹдәки әз һерс дькʹәтьм, чьмки де-баве мьн һьндьк азайи дьданә мьн. Әз дьфькьрим кӧ ида мәзьн ьм. Ле мьн фәʹм нәдькьр кӧ гьһиштибуна мәрьв салед ԝива гьредайи нинә. Мьн жь де-баве хԝә һиви кьр кӧ изьне бьдьнә мьн әз итʹбарийа ԝан ԛазанщ кьм. Рʹаст ә сәва ве йәке ԝәʹдә лазьм бу, ле ахьрийеда һʹал баш бу. Мьн фәʹм кьр ԝәки итʹбари нә кӧ сале мәрьвва гьредайи йә, ле кьред ԝива» (Рейчел).

Кʹьтеба Пироз дьбежә: «Хԝә әʹнәнә кьн» (2 Корьнтʹи 13:5).

• Бьфькьрә: Тӧ ча дькари хԝә әʹнәнә ки, ԝәки де-баве тә диса итʹбарийа хԝә тә биньн?

ШИРӘТ: Хԝәрʹа нете дайнә, ԝәки һәр тьшти ԝәʹдәда бьки, ча лазьм ә шьхӧле мале бьки, ԝәʹдәда бейи мал у тьштед майин жи бь пʹәргалийе бьки. Бьра де-баве тә дәрһәԛа ве нета тә бьзаньбьн у жь ԝана бьпьрсә кӧ тӧ гәрәке диса чь бьки, ԝәки әԝана бькарьбьн һе зедә итʹбарийа хԝә тә биньн. Паше һәр тьшти бькә ԝәки ве ширәта Кʹьтеба Пироз бьди хәбате: «Хәйсәте хԝәйи бәре жь хԝә дур хьн, ԝи мәрьве кәвьни кӧ бь һавьжийед һʹьләкʹарва дерьсбуйи йә» (Әфәси 4:22). Дӧдьли нәбә ԝәки де-баве тә ԝе пешдачуйина тә бьвиньн!