ಹೌದು ಪಡೆಯುತ್ತೇವೆ. ಯೆಹೋವನ ಸಾಕ್ಷಿಗಳಾದ ನಾವು ಔಷಧ ಮತ್ತು ವೈದ್ಯಕೀಯ ಚಿಕಿತ್ಸೆಯನ್ನು ಖಂಡಿತ ಪಡೆಯುತ್ತೇವೆ. ಉತ್ತಮ ಆರೋಗ್ಯವನ್ನು ಕಾಪಾಡಿಕೊಳ್ಳಲು ನಾವು ಪ್ರಯತ್ನಿಸಿದರೂ ಕೆಲವೊಮ್ಮೆ ನಮಗೆ ‘ವೈದ್ಯರ ಅಗತ್ಯವಿರುತ್ತದೆ.’ (ಲೂಕ 5:31) ಅಷ್ಟೇ ಯಾಕೆ, ಮೊದಲನೇ ಶತಮಾನದ ಲೂಕನಂತೆ ಇಂದು ಸಹ ಯೆಹೋವನ ಸಾಕ್ಷಿಗಳಲ್ಲಿ ಅನೇಕರು ವೈದ್ಯರಾಗಿದ್ದಾರೆ.​—ಕೊಲೊಸ್ಸೆ 4:14.

 ಹಾಗಿದ್ದರೂ ಕೆಲವು ಚಿಕಿತ್ಸೆಗಳು ಬೈಬಲ್‌ ಮೂಲತತ್ವಗಳಿಗೆ ವಿರುದ್ಧವಾಗಿವೆ. ಅಂಥವುಗಳನ್ನು ನಾವು ಸ್ವೀಕರಿಸುವುದಿಲ್ಲ. ಉದಾಹರಣೆಗೆ, ನಾವು ರಕ್ತ ಪೂರಣವನ್ನು ಸ್ವೀಕರಿಸುವುದಿಲ್ಲ ಏಕೆಂದರೆ ಬೈಬಲ್‌ ಅದನ್ನು ನಿಷೇಧಿಸುತ್ತದೆ. (ಅಪೊಸ್ತಲರ ಕಾರ್ಯಗಳು 15:20) ಅದೇ ರೀತಿ, ಮಾಟಮಂತ್ರಕ್ಕೆ ಸಂಬಂಧಿಸಿದ ಚಿಕಿತ್ಸೆ ಅಥವಾ ಚಿಕಿತ್ಸಾ ವಿಧಾನಗಳನ್ನು ಬೈಬಲ್‌ ನಿಷೇಧಿಸುತ್ತದೆ.​—ಗಲಾತ್ಯ 5:​19-21.

 ಹಾಗಿದ್ದರೂ ಇಂದಿರುವ ಅನೇಕ ವೈದ್ಯಕೀಯ ಚಿಕಿತ್ಸೆಗಳು ಬೈಬಲ್‌ ಮೂಲತತ್ವಗಳಿಗೆ ವಿರುದ್ಧವಾಗಿರುವುದಿಲ್ಲ. ಇಂಥ ವಿಷಯದಲ್ಲಿ ಯಾವ ಚಿಕಿತ್ಸೆಯನ್ನು ಸ್ವೀಕರಿಸಬೇಕು ಎಂಬುದು ವೈಯಕ್ತಿಕ ಆಯ್ಕೆಯಾಗಿದೆ. ಚಿಕಿತ್ಸಾ ವಿಧಾನವೊಂದು ಒಬ್ಬರಿಗೆ ಸರಿಯೆನಿಸಬಹುದು ಆದರೆ ಇತರರು ಅದನ್ನು ನಿರಾಕರಿಸಬಹುದು.​—ಗಲಾತ್ಯ 6:5.