2 Timoti 3:1-17
3 Bɔt no se insay di las dez, tin go tranga ɛn bad.
2 Pipul dɛn go lɛk dɛnsɛf, dɛn go lɛk mɔni, dɛn go de bost, dɛn go de tink se dɛn bɛtɛ pas ɔda pipul dɛn, dɛn go de tɔk bad bɔt Gɔd ɛn pipul dɛn, dɛn nɔ go de obe dɛn mama ɛn papa, dɛn nɔ go gɛt wan tɛnki, dɛn go de kɔmɔt biɛn dɛn kɔmpin,*
3 dɛn nɔ go lɛk dɛn kɔmpin mɔtalman, dɛn nɔ go de agri wit ɔda pipul dɛn, dɛn go de pwɛl pɔsin in nem, dɛn nɔ go ebul kɔntrol dɛnsɛf, dɛn go wayl, dɛn nɔ go lɛk fɔ du gud,
4 dɛn go bi ɛnimi to dɛn padi dɛn, dɛn go trangayes, dɛn go prawd, dɛn go lɛk ɛnjɔymɛnt bɔt dɛn nɔ go lɛk Gɔd,
5 dɛn go de mek lɛk se dɛn de sav Gɔd, bɔt dɛn nɔ go de liv dɛn layf da we de; nɔ miks wit dɛn kayn pipul dɛn de.
6 Sɔm pan dɛn pipul ya de yuz kɔni we fɔ go insay os dɛn ɛn kapchɔ uman dɛn we wik bikɔs ɔf dɛn sin dɛn, di difrɛn difrɛn tin dɛn we dɛn uman ya kin want na in de kɔntrol dɛn,
7 dɛn de lan ɔltɛm bɔt stil dɛn nɔ ɛva ebul fɔ no di kɔrɛkt tin bɔt di trut.
8 Di we aw Janis ɛn Jambris bin de agens Mozis, na so bak dɛn wan ya de agens di trut. Dɛn kayn pipul ya dɛn maynd rili kɔrɔpt ɛn Gɔd nɔ gladi fɔ dɛn, bikɔs dɛn nɔ de liv dɛn layf akɔdin to di tin dɛn we wi biliv.
9 Bɔt dɛn nɔ go go bifo igen, ɔlman go si klia wan se dɛn fulish, jɔs lɛk aw dɛn bin si am pan dɛn tu man dɛn.
10 Bɔt yu rili dɔn fala di tin dɛn we a de tich, di we aw a de liv mi layf, di tin we a want fɔ du, di kayn fet we a gɛt, di we aw a de peshɛnt, di lɔv we a gɛt, di bia we a de bia,
11 ɛn yu no bɔt di sɔfa we dɛn mek a sɔfa na Antiɔk, na Aykoniɔm, ɛn Listra. A bia we dɛn bin de mek a sɔfa, ɛn di Masta sev mi frɔm ɔl dɛn tin dɛn de.
12 Infakt, ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.
13 Bɔt wikɛd pipul dɛn ɛn di wan dɛn we de ful pipul dɛn go de bad-ɔf mɔ ɛn mɔ, dɛn go de ful pipul dɛn ɛn ɔda pipul dɛn go ful dɛn.
14 Bɔt yu kɔntinyu fɔ fala di tin dɛn we yu dɔn lan ɛn we dɛn ɛp yu fɔ biliv, bikɔs yu no udat lan yu dɛn tin dɛn de,
15 ɛn frɔm di tɛm we yu na bin yɔŋbebi, yu dɔn no di oli tin dɛn we dɛn rayt, we ebul fɔ mek yu gɛt sɛns we go mek yu sev bikɔs yu gɛt fet pan Krays Jizɔs.
16 Na Gɔd dayrɛkt di wan dɛn we rayt ɔl di Skripchɔ dɛn ɛn dɛn gud fɔ tich, fɔ kɔrɛkt pɔsin, fɔ sɛtul tin dɛn di rayt we, ɛn fɔ tren pɔsin fɔ du wetin rayt,
17 so dat pɔsin we de sav Gɔd go rili ebul ɛn rili rɛdi fɔ du ɔlkayn gud wok.
Futnot
^ Ɔ “dɛn go kɔmɔt biɛn Gɔd.”
