Dɛn bin gi nayn pan Jiova Witnɛs dɛn satifiket fɔ tɛl dɛn tɛnki fɔ we dɛn de “ɛp” di wan dɛn we bin de na di say usay dɛn kin put di wan dɛn we kin kam insay pɔsin in kɔntri bɔt dɛn nɔ kin kam di rayt we. Na di Curtin Immigration Detention Centre we de nia Dabi na di Wɛst pat na Ɔstrelia, na in bin gi dɛn di satifiket. *

Ɛni wik, Jiova Witnɛs dɛn bin de go fɛn di pipul dɛn fɔ yɛri dɛn ɛkspiriɛns dɛn ɛn fɔ tɔk to dɛn bɔt di Baybul in mɛsej fɔ gi dɛn op. Kristofa Ridɔch we na di religious and cultural liaison officer na di ples bin tɔk se, “Afta dɛn kam fɛn dɛn, di we aw di pipul dɛn bin de biev, bin chenj, dɛn bigin fɔ biev fayn ɛn wi tɛl Jiova Witnɛs dɛn tɛnki fɔ dat bikɔs dɛn de rili sho se dɛn bisin bɔt ɔda pipul dɛn.”

Mista Ridɔch bin tɔk bak se di satifiket we dɛn gi di Witnɛs dɛn na jɔs smɔl tin nɔmɔ fɔ tɛl dɛn tɛnki fɔ we dɛn de “ɛp di wan dɛn we wi de kia fɔ.” I bin “prez dɛn famili dɛn, dɛn kɔngrigeshɔn dɛn, ɛn di tin dɛn we dɛn biliv.”