ဖဲနသးသမူတံၤသကိးတဂၤ တတီဒီးနၤအခါ
ဖဲနသးသမူတံၤသကိး တတီဒီးနၤအခါ နသးကဟးဂီၤဒိၣ်မးလီၤ. ဘၣ်ဆၣ် ပှၤတနီၤနီၤန့ၣ် ပျၢ်ကွံာ်အသးသမူတံၤသကိး တၢ်ကမၣ် ခီဖျိလၢ အပီၢ်ယၢ်လီၤက့ၤအသးအဃိ ဒီးမၤဂ့ၤထီၣ်က့ၤဝဲ အတၢ်ဆီဟံၣ်ဆီဃီန့ၣ်လီၤ. * ဘၣ်ဆၣ် အတၢ်ဆီဟံၣ်ဆီဃီ ဂၢၢ်ကျၢၤမ့ၢ်ဂ့ၤ တဂၢၢ်ကျၢၤမ့ၢ်ဂ့ၤ ဖဲအဝဲသ့ၣ် သ့ၣ်ညါလၢအသးသမူတံၤသကိး တတီဘၣ်အခါန့ၣ် အဝဲသ့ၣ်သးဟးဂီၤဝဲဒိၣ်မးလီၤ. အဃိ ပှၤလၢတူၢ်ဘၣ်တၢ်ဒ်အံၤတဖၣ် လဲၤခီဖျိဝဲကန့ၢ်ဒ်လဲၣ်.
လံာ်စီဆှံအဆၢတဖၣ်လၢ မၤစၢၤပှၤသ့
သးသမူတံၤသကိး လၢအတီတဖၣ်န့ၣ် အသးမ့ၢ်ဘၣ်ဒိသနာ်က့ လံာ်စီဆှံ မၤမုာ်ထီၣ်က့ၤအသးသ့ဝဲလီၤ. ဒီးအဝဲသ့ၣ်သ့ၣ်ညါထီၣ်လၢ ကစၢ်ယွၤထံၣ်အဝဲသ့ၣ်မဲာ်ထံမဲာ်နိ ဒီးဒိသူၣ်ဒိသးအဝဲသ့ၣ်န့ၣ်လီၤ.—မၤလကံ ၂:၁၃-၁၆.
“ဖဲယဘၣ်ယိၣ်ဘၣ်ဘီတၢ် ဒီးယသူၣ်ကိၢ်သးဂီၤအခါန့ၣ်, နမၤမုာ်ယၤ ဒီးမၤသးခုယၤလီၤ.”—စံးထီၣ်ပတြၢၤ ၉၄:၁၉, ခ့ခါစှီၤကျိာ်.
ဘ့(လ်) အဝဲတဲက့ၤဝဲဒ်အံၤ “ဖဲယဖးဘၣ်လံာ်စီဆှံတဆၢန့ၣ်အခါ ယထံၣ်တမှံကွၢ်လၢ ယဟိဝၤယွၤမ့ၢ်ကစၢ်တဂၤလၢ အမၤမုာ်ထီၣ်က့ၤယသး ဒ်ပၢ်လၢအိၣ်ဒီး တၢ်သးကညီၤတဂၤအသိးန့ၣ်လီၤ.”
“နတီဒီးပှၤလၢအတီဒီးနၤ.”—စံးထီၣ်ပတြၢၤ ၁၈:၂၅, ခ့ခါစှီၤကျိာ်.
ခါမဲၤ အဝၤန့ၣ် တတီဒီးအီၤ ယံာ်လၢအလါတဖၣ်ညါလီၤ. အဝဲတဲလၢ “ယဝၤန့ၣ် တတီဒီးယၤနီတစဲးဘၣ်. ဘၣ်ဆၣ် ယနာ်န့ၢ်ယဟိဝၤယွၤသ့လၢ အကတီဒီးယၤထီဘိ ဒီးတပာ်တ့ၢ်ယၤ နီတဘျီဘၣ်.”
“သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညး . . . ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသး.”—ဖံလံးပံၤ ၄:၆, ၇.
မ့မ့ၢ် ၡါၡၢၤန့ၣ် တဲဝဲလၢ “လံာ်စီဆှံတဆၢအံၤန့ၣ် ယဖးဝံၤဖးက့ၤအီၤလီၤ. ခီဖျိလၢ ယဃ့ထုကဖၣ် အါထီၣ်မးအါထီၣ်အဃိ ကစၢ်ယွၤဟ့ၣ်ယၤတၢ်သူၣ်မံသးမုာ် လၢယတၢ်အိၣ်မူပူၤလီၤ.”
ဒ်ပဖးတ့ၢ်ပှၤဂ့ၢ်လၢထးတဖၣ်န့ၣ် တဘျီတခီၣ်အဝဲသ့ၣ်ကိးဂၤဒဲး တူၢ်ဘၣ်လၢ အဲၣ်ဒိးတူၢ်ၡူကွံာ်အသးလီၤ. ဘၣ်ဆၣ် အဝဲသ့ၣ်နာ်ယဟိဝၤယွၤ ဒီးဒိးန့ၢ်ဘၣ်တၢ်ဂံၢ်တၢ်ဘါ လၢယွၤအကလုၢ်ကထါအပူၤန့ၣ်လီၤ. ဘ့(လ်) တဲဝဲဒ်အံၤ “ဖဲတၢ်ခဲလၢာ် လဲၤတပျာ်အသးလၢ ယတၢ်အိၣ်မူပူၤအခါ ယတၢ်နာ်န့ၣ် မၤစၢၤယၤလၢ ယတၢ်အိၣ်မူန့ၣ် အိၣ်ပှဲၤဒီးအခီပညီဒံးန့ၣ်လီၤ. လၢညါယလဲၤတ့ၢ်ဒ် ‘တၢ်သံအကဒုအကစၢၢ်ကဆူးပူၤဒၣ်လဲာ်န့ၣ်,’ ကစၢ်ယွၤအိၣ်ဒီးယၤလီၤ.”—စံးထီၣ်ပတြၢၤ ၂၃:၄.
^ ဒ်သိးနကသ့ၣ်ညါအါထီၣ်တၢ်ဂ့ၢ်ဘၣ်ဃးဒီး မ့ၢ်နကြၢးပျၢ်အတၢ်ကမၣ်ဧါ တကြၢးပျၢ်ဧါန့ၣ် ကွၢ်လံာ်လၢအမ့ၢ် ပၢၢ်ထီၣ် (Awake!) လါအ့ဖြ့ၣ် ၂၂, ၁၉၉၉ တဘ့ၣ်န့ၣ်တက့ၢ်. အခိၣ်တီမ့ၢ်ဝဲ “ဖဲနသးသမူတံၤသကိး တတီဒီးနၤအခါ.” ကွၢ်ကဘျံးပၤ ၃, ၅ ဒီး ၉ တက့ၢ်.
You May Also Like
တၢးထီခိးတၢ်
မ့ၢ်ကစၢ်ယွၤအိၣ်ဒီး တၢ်ဒိသူၣ်ဒိသးဧါ
လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ ပာ်သူၣ်ပာ်သးပှၤ, နၢ်ပၢၢ်ပှၤ ဒီးဒိသူၣ်ဒိသးပှၤ.
